ចិនគ្រោងផលិតយន្តហោះទម្លាក់គ្រាប់បែកយុទ្ធសាស្រ្តរយៈចម្ងាយឆ្ងាយ
កាសែតផ្លូវការរបស់ចិនបានចេញផ្សាយនៅថ្ងៃអង្គារនេះថា ចិនមានបំណងចង់ផលិតយន្តហោះទម្លាក់គ្រាប់បែកដែលអាចហោះបានក្នុងរយៈចម្ងាយឆ្ងាយ អាចបំបាំងខ្លួនមិនឲ្យរ៉ាដាចាប់បាន និងអាចធ្វើការវាយប្រហារដោយប្រើគ្រាប់បែកនុយក្លេអ៊ែរ។ គម្រោងផលិតយន្តហោះទម្លាក់គ្រាប់បែករយៈចម្ងាយឆ្ងាយនេះត្រូវបានធ្វើឡើង នៅក្នុងពេលដែលចិនកំពុងមានជម្លោះដែនសមុទ្រជាមួយប្រទេសក្នុងតំបន់អាស៊ី និងក្នុងពេលដែលអាមេរិកកំពុងតែព្យាយាមបង្កើនវត្តមាន នៅក្នុងតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
យោងតាមអ្នកជំនាញខាងកងទ័ពចិន ដែលដកស្រង់ដោយកាសែតផ្លូវការ China Daily គម្រោងផលិតយន្តហោះទម្លាក់គ្រាប់បែកយុទ្ធសាស្រ្តរយៈចម្ងាយឆ្ងាយ ត្រូវបានរៀបចំធ្វើឡើងដោយការិយាល័យជំនាញនៃកងទ័ពចិន និងបានទទួលនូវការឯកភាពពីសំណាក់លោកប្រធានាធិបតីស៊ី ជីនពីង។
គោលដៅដែលបានដាក់ចេញដោយកងទ័ពចិន គឺចង់បានយន្តហោះទម្លាក់គ្រាប់បែក ដែលអាចផ្ទុកគ្រាប់បែកបានច្រើន និងអាចហោះទៅធ្វើការវាយប្រហារបានឆ្ងាយរហូតដល់តំបន់មហាសមុទ្រប៉ាស៊ីហ្វិក។
ចិនទទួលស្គាល់ថាខ្លួននៅមានការយឺតយ៉ាវច្រើនខាងវិស័យបច្ចេកវិទ្យាយោធា ហើយគម្រោងផលិតយន្តហោះទម្លាក់គ្រាប់បែកយុទ្ធសាស្រ្តនេះអាចនឹងត្រូវចំណាយពេលជាច្រើនឆ្នាំ ហើយត្រូវធ្វើជាដំណាក់កាល។
នៅក្នុងដំណាក់កាលដំបូង ចិនគ្រោងផលិតឲ្យបាននូវយន្តហោះទម្លាក់គ្រាប់បែក ដែលអាចផ្ទុកគ្រាប់បែកបាន ១០តោន និងអាចធ្វើការវាយប្រហារនៅក្នុងរង្វង់ ៨ពាន់គីឡូម៉ែត្រ ដោយមិនចាំបាច់ចាក់សាំងលើអាកាស ពោលគឺ អាចហោះទៅវាយប្រហារដល់កោះមួយចំនួនរបស់អាមេរិក នៅក្នុងតំបន់មហាសមុទ្រប៉ាស៊ីហ្វិក។ ក៏ប៉ុន្តែ យន្តហោះទម្លាក់គ្រាប់បែកនៅក្នុងគម្រោងដំណាក់កាលដំបូងនេះ មិនទាន់មានសមត្ថភាពបំបាំងកាយពីរ៉ាដា ដូចជា យន្តហោះទម្លាក់គ្រាប់បែកធុន B-2 របស់អាមេរិកនៅឡើយទេ ដោយសារតែបច្ចេកវិទ្យាបំបាំងកាយនេះ វាហួសពីសមត្ថភាពរបស់ចិន។
ទោះជាយ៉ាងណា នៅក្នុងរយៈពេលវែងទៅមុខ ចិននៅតែរក្សាមហិច្ឆតា ចង់ផលិតឲ្យបានយន្តហោះទម្លាក់គ្រាប់បែកបំបាំងកាយ ដែលអាចធ្វើសកម្មភាពនៅក្នុងរយៈចម្ងាយអន្តរទ្វីប។
គម្រោងផលិតយន្តហោះទម្លាក់គ្រាប់បែកយុទ្ធសាស្រ្តរយៈចម្ងាយឆ្ងាយ នឹងបង្កើនសមត្ថភាពកងទ័ពចិនក្នុងយុទ្ធសាស្រ្តវាយលុកទៅលើគូសត្រូវ ដែលជារបត់ដ៏សំខាន់មួយ នៅក្នុងយុទ្ធសាស្រ្តទ័ពចិន ដែលកន្លងមក ផ្តោតតែទៅលើយុទ្ធសាស្រ្តការពារខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ