ចិន និងអូស្រ្តាលី៖ចំណាយពេលចរចា ១០ឆ្នំាទើបសម្រេចបានកិច្ចព្រមព្រៀងដោះដូរសេរី
នៅថ្ងៃពុធ ទី១៧ មិថុនានេះ ប្រទេសចិន និងអូស្រ្តាលីបានចុះហត្ថលេខាលើមហាកិច្ចព្រមព្រៀងដោះដូរដោយសេរីរវាងគ្នា។ ពិធីចុះហត្ថលេខាត្រូវបានធ្វើឡើងនៅក្នុងទីក្រុងកង់បេរ៉ា ប្រទេសអូស្រ្តាលីរវាងលោករដ្ឋមន្រ្តីក្រសួងពាណិជ្ជកម្មអូស្រ្តាលីអ៊ិនឌ្រូ រ៉ូប (Andrew Robb) និងសមភាគីចិនលោកហ្កាវ ហ៊ូឆេង។ អ្វីជាការកត់សម្គាល់ មហាកិច្ចព្រមព្រៀងដោះដូរដោយសេរីបានសម្រេចឡើង បន្ទាប់ពីចិន និងអូស្រ្តាលីបានជួបជជែកតថ្លៃគ្នាយ៉ាងតានតឹងអស់រយៈពេល ១០ឆ្នំា។ លោកនាយករដ្ឋមន្រ្តីអូស្រ្តាលីតូនី អាបូតបានចាត់ ទុកថ្ងៃចុះហត្ថលេខានេះថា ជាថ្ងៃប្រវត្តិសាស្រ្តនៃការពង្រីកទំនាក់ទំនងពាណិជ្ជកម្មចិន និងអូស្រ្តាលី។
ចុះផ្សាយនៅថ្ងៃ៖
ស្តាប់ - ០៥:២៣
ប្រទេសចិនជាដៃគូពាណិជ្ជកម្មទី១ របស់អូស្រ្តាលីដែលការដោះដូរពាណិជ្ជកម្មរវាងគ្នាមានទំហំទឹកប្រាក់ដល់ទៅជាង ១២០ ០០០លានដុល្លារក្នុង១ឆ្នំាៗ។ នៅឆ្នំា ២០១៤ ចិនថែមទំាងបានក្លាយជាប្រទេសវិនិយោគទី១ នៅក្នុងប្រទេសអូស្រ្តាលីស្ថិតនៅពីមុខសហរដ្ឋអាមេរិក។ ១ភាគ៤ នៃផលិតផលនំាចេញរបស់អូស្រ្តាលីបាននំាចូលប្រទេសចិន ពិសេសវត្ថុធាតុដើម រួមមានធ្យូង និងរ៉ែដែក។ ទន្ទឹមគ្នានេះ ក៏មានទឹកដោះគោ និងសាច់ ពិសេសគឺសាច់គោ។
តែគេក៏មិនត្រូវភ្លេចនិយាយទេថាសព្វថ្ងៃនេះ ផលិតផលអូស្រ្តាលីនំាទៅចិនត្រូវបានរដ្ឋអំណាចប៉េកំាងតម្រូវឲ្យបង់ពន្ធថ្លៃណាស់ គឺរហូតដល់ទៅ ៤០%។ តែជាមួយនឹងកិច្ចព្រមព្រៀងដែលទើបបានចុះហត្ថលេខាថ្ងៃនេះ មានផលិតផលអូស្រ្តាលីនំាចូលស្រុកចិនជាង ៨៥% នឹងត្រូវរួចពន្ធ រួមមាន ស្រា សាច់ ត្រី និងផលិតផលធ្វើចេញពីទឹកដោះគោដែលចិនជាប្រទេសនំាចូលច្រើនជាងគេក្នុងលោក។ បច្ចុប្បន្ននេះ ផលិតផលធ្វើពីទឹកដោះគោរបស់អូស្រ្តាលីដែលនំាចូលស្រុកចិនត្រូវបានចិនយកពន្ធដល់ទៅ ២០% តែចាប់ពីពេលនេះដល់ ១១ឆ្នំាខាងមុខ តម្លៃពន្ធនេះនឹងត្រូវលប់ចោលទំាងស្រុង។ ចំណែកម្សៅទឹកដោះគោសម្រាប់ទារកក៏នឹងត្រូវរួចពន្ធចាប់ពីពេលនេះទៅ ៤ឆ្នំាខាងមុខដែរ។
ទាក់ទងនឹងសាច់គោអូស្រ្តាលីនំាចូលស្រុកចិនអាចនឹងកើនឡើងបន្ថែមជាមួយនឹងកិច្ចព្រមព្រៀងថ្ងៃនេះ ព្រោះចាប់ពីពេលនេះទៅ ៩ឆ្នំាខាងមុខ ចិនលែងយកពន្ធលើសាច់គោនំាចូលពីអូស្រ្តាលីទៀតឡើយ ពន្ធដែលសព្វថ្ងៃមានកម្រិតពី១២ ទៅ ២៥%។ ដោយឡែក នៅមានផលិតផលមួយចំនួនដែលមិនជាប់ពាក់ព័ន្ធនឹងកិច្ចព្រមព្រៀងថ្មីនេះទេ រួមមានស្ករ អង្ករ និងស្រូវសំឡី។
លោកតូនី អាបូត៖ថ្ងៃនេះជាថ្ងៃប្រវត្តិសាស្រ្ត
ជាថ្នូរចំពោះចិនវិញ អូស្រ្តាលីនឹងលុបចោលសិទ្ធិនំាចូលចំនួន ៥% ទាក់ទងនឹងគ្រឿងអេឡិចត្រូនិច និងគ្រឿងម៉ាស៊ីនរបស់ចិនក្នុងទឹកដីអូស្រ្តាលី។ ទន្ទឹមគ្នានេះ ទីក្រុងកង់បេរ៉ានឹងជួយសម្រួលផ្នែករដ្ឋបាលចំពោះអ្នកវិនិយោគចិនដែលចង់ទៅរកស៊ីនៅប្រទេសអូស្រ្តាលី ពិសេសអ្នកវិនយោគឯកជនអាចនឹងដាក់ប្រាក់ទុនដល់ទៅ ១ ០០០លានដុល្លារអូស្រ្តាលីដោយមិនចំាបាច់មានការយល់ព្រមពីក្រុមប្រឹក្សាឃ្លំាមើលវិនិយោគបរទេស។ ចិន និងអូស្ត្រាលីទាញបានផលប្រយោជន៍ដូចគ្នាពីកិច្ចព្រមព្រៀងថ្ងៃនេះ តែអ្នកដែលទាញចំណេញបានច្រើនជាងគេ គឺអូស្រ្តាលី។
លោកនាយករដ្ឋមន្រ្តីអូស្រ្តាលីតូនី អាបូតបានថ្លែងសាទរ និងថែមទំាងចាត់ទុកថ្ងៃចុះហត្ថលេខាថ្ងៃនេះថា ជាថ្ងៃប្រវត្តិសាស្រ្តសម្រាប់អូស្រ្តាលី។ ក៏ប៉ុន្តែ និងបើទោះបីជាកិច្ចព្រមព្រៀងដែលអូស្រ្តាលីបានចុះហត្ថលេខាជាមួយចិនថ្ងៃនេះបានអនុញ្ញាតឲ្យអូស្រ្តាលីទទួលបានប្រយោជន៍ច្រើនជាងកិច្ចព្រមព្រៀងដែលអូស្រ្តាលីមានជាមួយសហភាពអឺរ៉ុប អាមេរិក និងកាណាដាក៏ដោយ ក៏ក្រុមសហជីពអូស្រ្តាលីមិនអាចលាក់កំបំាងពីក្តីបារម្ភរបស់ខ្លួនបានឡើយ ពិសេសគឺលំហូរបុគ្គលិក កម្មករចិនក្នុងទឹកដីអូស្រ្តាលី។
ចិន និងអូស្រ្តាលីបានចំណាយពេលចរចា ១០ឆ្នំា
គឺតំាងពីឆ្នំា ២០០៥ មកម្ល៉េះដែលចិន និងអូស្រ្តាលីបានផ្តើមជួបចរចាគ្នាក្នុងការស្វែងរកកិច្ចព្រមព្រៀងដោះដូរដោយសេរីរវាងគ្នា។ តែភាគីទំាងពីរចេះតែបន្តនិយាយមិនចុះសម្រុងគ្នាជុំវិញការចង់បានយ៉ាងទទូចរបស់ចិន។ ទីក្រុងប៉េកំាងបានទាមទារឲ្យទីក្រុងកង់បេរ៉ាលប់ចោលការដាក់កម្រិតលើការវិនិយោគជាមួយរោងចក្រ សហគ្រាសរបស់រដ្ឋ។ ការប្រទាញប្រទង់គ្នាបានកើតឡើងរហូតដល់មានអន្តរាគមន៍ពីលោកនាយករដ្ឋមន្រ្តីអូស្រ្តាលី តូនី អាបូត និងលោកប្រធានាធិបតីចិនស៊ី ជីនពីងកាលពីខែវិច្ឆិកា ឆ្នំា ២០១៤ កន្លងទៅ។
លោកតូនី អាបូ និងលោកស៊ី ជីនពីងបានប្រកាសរួមគ្នាពីការផ្តល់សារៈសំខាន់ និងការឲ្យតម្លៃខ្លំាងលើកិច្ចចរចាដែលឥស្សរជនទំាងពីរចង់ឲ្យមានកិច្ចព្រមព្រៀងឆាប់ៗ។ តំាងពីពេលនោះមក កិច្ចចរចាក៏មានល្បឿនកាន់តែលឿនរហូតសម្រេចបានការចុះហត្ថលេខាថ្ងៃនេះ។ សូមជម្រាបជូនថា មុនប្រទេសចិន អូស្រ្តាលីបានចុះហត្ថលេខាលើកិច្ចព្រមព្រៀងតម្លៃពន្ធទំនិញជាមួយជប៉ុន និងកូរ៉េខាងត្បូង ហើយនៅថ្ងៃខាងមុខ អូស្រ្តាលីកំពុងសម្លឹងឃើញមហាយក្សអាស៊ីមួយទៀត គឺឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ