ប្រធានាធិបតីចិនទៅប៉ាគីស្ថានជាមួយនឹងគម្រោងវិនិយោគ៤៦ពាន់លានដុល្លារ
ប្រធានាធិបតីចិន ផ្តើមទស្សនកិច្ចផ្លូវរដ្ឋ រយៈពេល២ថ្ងៃ ចាប់ពីថ្ងៃចន្ទ ទី ២០មេសានេះ នៅប្រទេសប៉ាគីស្ថាន។ លោកស៊ី ជីនពីងធ្វើដំណើរទៅទីក្រុងអ៊ីស្លាម៉ាបាតជាមួយនឹងគម្រោងវិនិយោគរបស់ចិន នៅប៉ាគីស្ថាន ដែលមានតម្លៃប្រមាណ៤៦ពាន់លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
លោកស៊ី ជីនពីងនឹងក្លាយជាប្រធានាធិបតីចិនទី មួយ ក្នុងរយៈពេល ៩ឆ្នាំចុងក្រោយនេះ ដែលដាក់ជើងជាន់ទឹកដីប៉ាគីស្ថាន។ នៅមួយថ្ងៃមុន ប្រមុខដឹកនាំកំពូលរបស់ចិនផ្តើមទស្សនកិច្ចក្នុងទីក្រុងអ៊ីស្លាម៉ាបាត ភាគីប៉ាគីស្ថានបានប្រកាសឲ្យដឹងពីគម្រោងវិនិយោគរបស់ចិន នៅប៉ាគីស្ថាន ដែលតម្លៃ៤៦ពាន់លានដុល្លារ។ តាមរដ្ឋមន្រ្តីទទួលបន្ទុកគម្រោងអភិវឌ្ឍន៍ប៉ាគីស្ថាន ទឹកប្រាក់៤៦ពាន់លានដុល្លារមានបូកបញ្ចូលផងដែរ គម្រោងការដែលកំពុងដំណើរការរួចហើយ នៅប៉ាគីស្ថាន។
នៅក្នុងដំណើរទស្សនកិច្ច នៅប៉ាគីស្ថាន ប្រធានាធិបតីចិន លោកស៊ី ជីនពីងត្រូវគេរំពឹងថា នឹងចុះហត្ថលេខាលើកិច្ចព្រមព្រៀង ជាច្រើន ជាពិសេស ការសហការរវាងប្រទេសទាំងពីរក្នុងគម្រោងផ្គត់ផ្គង់ថាមពល និងការសាងសង់ហេដ្ឋារចនាសម្ព័ន្ធ។ ក្នុងមួយទសវត្សរ៍ចុងក្រោយនេះ ទំនាក់ទំនងពាណិជ្ជកម្មរវាងចិន និងបាគីស្ថានបានកើនឡើង ពី៤ពាន់លានដុល្លារ មក១២ពាន់លានដុល្លារ កាលពីឆ្នាំមុន។ នៅក្នុងដំណើរទស្សនកិច្ចទៅប្រទេសចិន នៅក្រោយជាប់ឆ្នោតជានាយករដ្ឋមន្រ្តីប៉ាគីស្ថាន លោកណាវ៉ា ស្ហារីហ្វធ្លាប់បានប្រកាសវាយតម្លៃថា ទំនាក់ទំនងចិន និងប៉ាគីស្ថានផ្អែមជាងទឹកឃ្មុំទៅទៀត។
សហប្រតិបត្តិការចិន និងប៉ាគីស្ថាន មានច្រើនជាងការសាងសង់ហេដ្ឋារចនាសម្ព័ន្ធ ព្រោះចិន និងប៉ាគីស្ថាន មានគម្រោងបង្កើតតំបន់សេដ្ឋកិច្ចរវាងប្រទេសទាំងពីរ។ កាលពីឆ្នាំ ២០១៣ ប៉ាគីស្ថានបានប្រគល់កំពង់ផែទឹកជ្រៅ Gwadarមួយទៅឲ្យក្រុមហ៊ុនរដ្ឋចិនកាន់កាប់។ តាមរយៈកំពង់ផែនេះ ទីក្រុងប៉េកាំងនឹងចំណេញច្រើន ដោយអាចកាត់បន្ថយផ្លូវដឹកជញ្ជូនប្រេង ពីតំបន់ដើមបូព៌ា បានយ៉ាងច្រើនម៉ឺនគីឡូម៉ែត្រ ពោលគឺចិននឹងប្រើហេដ្ឋារចនាសម្ព័ន្ធក្នុងស្រុកប៉ាគីស្ថានដើម្បីដឹកផ្ទាល់តែម្តង សំដៅតំបន់ភាគខាងលិចប្រទេសចិន ដែលនៅជាប់ព្រំដែនជាមួយប៉ាគីស្ថាន។
ក្រៅតែពីបញ្ហាសេដ្ឋកិច្ច នៅប៉ាគីស្ថាន ប្រធានាធិបតីចិន គ្រោងផងដែរ នឹងជជែកជាមួយនាយករដ្ឋមន្រ្តីប៉ាគីស្ថានពីបញ្ហាសន្តិសុខ។ តាមអតីតមេបញ្ជាការទ័ពប៉ាគីស្ថានម្នាក់ ទីក្រុងប៉េកាំងខ្លាចថា ក្រុមប្រដាប់អាវុធ អ៊ីស្លាមជ្រុលនិយមរបស់ប៉ាគីស្ថានឆ្លងចូលទៅក្នុងខេត្តស៊ីនជាំងរបស់ចិន ដែលនៅជាប់ព្រំប្រទល់ជាមួយប៉ាគីស្ថាន។ ចិនធ្លាប់បានប្រកាសថា គឺក្រុមភេរវជនមកពីបរទេសចូលទៅបង្កភេរវកម្មក្នុងខេត្តស៊ីនជាំង។ ដូច្នេះ ចិនដែលចង់ធានាសុវត្ថិភាពសន្តិសុខនៅតាមព្រំដែន ជាមួយប៉ាគីស្ថានចង់ទាមទារឲ្យប៉ាគីស្ថានបញ្ជាក់ធានាថា នឹងគ្មានក្រុមប្រដាប់អាវុធ អ៊ីស្លាមជ្រៀតចូលទៅបង្កអសន្តិសុខក្នុងទឹកដីចិន ជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ