មនុស្សជំនិតរបស់អតីតប្រធានាធិបតីចិនហ៊ូ ជិនតាវ ជាប់អង្កេតពុករលួយ
គណបក្សកុម្មុយនិស្តចិន បានប្រកាសនៅថ្ងៃចន្ទទី ២២ធ្នូ នេះ បើកអង្កេតប្រឆាំងនឹងទីប្រឹក្សារបស់អតីតប្រធានាធិបតីចិន លោក ហ៊ូ ជិនតាវ ពីបទពុករលួយ។ នៅក្នុងសេចក្តីជូនដំណឹងដ៏ខ្លី ការិយាល័យទទួលបន្ទុកប្រយុទ្ធប្រឆាំងនឹងអំពើពុករលួយរបស់បក្សកុម្មុយនិស្ត បានបញ្ជាក់ថា លោក លីង ជីហួ ជាប់សង្ស័យរំលោភវិន័យបក្សយ៉ាងធ្ងន់ធ្ងរ។ រំលោភវិន័យបក្ស ជាភាសាកុម្មុយនិស្តដែលអាជ្ញាធរចិនប្រើជំនួសពាក្យថា “ប្រព្រឹត្តអំពើពុករលួយ”។
ចុះផ្សាយនៅថ្ងៃ៖
ស្តាប់ - ០១:៤៤
មេដឹកនាំជាន់ខ្ពស់ចិន កាន់តែកំពូលៗឡើង ត្រូវបានផ្តួលចេញពីតំណែង ឬជាប់សំណាញ់ប្រយុទ្ធប្រឆាំងនឹងអំពើពុករលួយរបស់លោក ស៊ីជិនពីង។ សំណុំរឿងចុងក្រោយគឺ ពាក់ព័ន្ធនឹងអតីតប្រធានសន្តិសុខចិន ហើយនៅថ្ងៃនេះ ដល់វេនលោក លីង ជីហួម្តង។
មាន អាយុ ៥៨ឆ្នាំ ល្បីខាងស្និទ្ធនឹងអតីតប្រធានាធិបតីចិន ហ៊ូជិនតាវ (២០០៣-២០១៣)បំផុត មានតួនាទីអនុប្រធានសន្និសីទពិគ្រោះនយោបាយបក្សកុម្មុយនិស្តចិន តែមិនបានឡើងឋាន្តរសក្តិអ្វីសោះ ពេលរុះរើថ្នាក់ដឹកនាំបក្សនៅឆ្នាំ២០១២ហើយ ថែមទាំងបាត់បង់តួនាទីយុទ្ធសាស្ត្រពីដៃទៀត។ កាលណោះអ្នកសង្កេតការណ៍ ចាប់ផ្តើមសង្ស័យថាមានអ្វីប្រែប្រួលមិនធម្មតា ហើយការចោទប្រកាន់នៅថ្ងៃចន្ទ អាចបញ្ជាក់បានកាន់តែច្បាស់អំពីសម្បុរនយោបាយសម្រាប់លោក លីង ជីហួតែម្តង។
បើតាមប្រភពខ្លះ លោក លីង ជីហួ ត្រូវបានបញ្ចុះ បន្ទាប់មកដកហូតចេញពីតំណែង តាំងពីខែកញ្ញាឆ្នាំ២០១២មក ក្រោយផ្ទុះរឿងអាស្រូវកូនប្រុសស្លាប់ក្នុងគ្រោះថ្នាក់ចរាចរណ៍ បើកឡានម៉ាក Ferrari ឌុបស្រីពីរនាក់ម្នាក់ស្រាតននោល កាលពីថ្ងៃទី ១៨មីនា ២០១២ នៅទីក្រុងប៉េកាំង។ គ្រោះថ្នាក់ចរាចរណ៍នេះ បានធ្វើឱ្យថ្នាក់ដឹកនាំបក្សកុម្មុយនិស្តទើសទាល់បំផុត។ កូនអ្នកដឹកនាំជិះឡានតម្លៃជិតលានដុល្លារ តើបានលុយមកពីណា ?! ចំណែកលោក លីង ឆេងសែ ជាប្អូនប្រុស ក៏ត្រូវបានដកចេញតំណែងអនុប្រធានសន្និសីទពិគ្រោះបក្សប្រចាំខេត្តស៊សង់ហ្ស៊ី កាលពីខែមិថុនាកន្លងទៅ ក្នុងបទចោទប្រកាន់ដូចគ្នា “រំលោភវិន័យបក្សធ្ងន់ធ្ងរ”។
តាំងពីបានក្លាយជាប្រធានធិបតីចិនមក លោក ស៊ីជីនពីង បានយកការប្រយុទ្ធប្រឆាំងនឹងអំពើពុករលួយជាអាទិភាពចំបងរបស់បក្ស ប៉ុន្តែអ្នកឯកទេសសង្ស័យលើប្រសិទ្ធិភាពពិតនៃយុទ្ធនាការនេះ ព្រោះតុលាការមិនឯករាជ្យ និងគ្មានការធ្វើកំណែទម្រង់ប្រព័ន្ធនយោបាយឱ្យបានស៊ីជម្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ