ចិន៖ផ្ទុះឃ្លំាងស្តុកសារធាតុគីមី និងជាតិផ្ទុះបណ្តាលឲ្យស្លាប់ជាង ៤០នាក់ និងរបួសជាង ៥២០នាក់
នៅក្នុងប្រទេសចិន មានព្រឹត្តិការណ៍ផ្ទុះឆេះយ៉ាងសន្ធោសន្ធៅចំនួន ២ដងបន្តបន្ទាប់គ្នាកាលពីជិតអធ្រាត្រយប់ថ្ងៃពុធឆ្លងចូលថ្ងៃព្រហស្បតិ៍ ទី១៣ សីហានេះ។ ព្រឹត្តិការណ៍ផ្ទុះនោះបានកើតមានឡើងនៅក្នុងទីក្រុងកំពង់ផែធៀនជីនស្ថិតប៉ែកខាងជើងប្រទេសចិន។ គេនៅមិនទាន់ដឹងពីមូលហេតុនៃគ្រោះថ្នាក់ផ្ទុះនោះនៅឡើយទេ តែបានបង្កឲ្យមានមនុស្សស្លាប់ និងរបួសជាច្រើននាក់ ព្រមទំាងបង្កឲ្យមានការខូចខាតទ្រព្យសម្បតិយ៉ាងច្រើនសម្បើម។ លោកប្រធានាធិបតីស៊ី ជីនពីងបានបញ្ជាឲ្យរដ្ឋអំណាចប្រើគ្រប់មធ្យោបាយ និងប្រឹងប្រែងឲ្យអស់លទ្ធភាពដើម្បីជួយសង្រ្គោះជនរងគ្រោះ និងសន្យាផ្តន្ទាទោសចាស់ដៃចំពោះអ្នកដែលបានបង្កឲ្យមានគ្រោះថ្នាក់ផ្ទុះនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៩
គឺនៅវេលាម៉ោង ១១ និង ៣០នាទីយប់ ម៉ោងក្នុងប្រទេសចិនក្នុងថ្ងៃពុធ ទី១២ សីហា ត្រូវជាម៉ោង ១០ និង៣០នាទីយប់ ម៉ោងក្នុងប្រទេសកម្ពុជាដែលព្រឹត្តិការណ៍ផ្ទុះយ៉ាងសម្បើមមួយបានកើតមានឡើងនៅក្នុងឃ្លំាងស្តុកផលិតផលគីមី និងជាតិផ្ទុះស្ថិតក្នុងទីក្រុងធៀនជីន។ ទីក្រុងធៀនជីន គឺជាទីក្រុងកំពង់ផែឧស្សាហកម្ម ពាណិជ្ជកម្មមួយយ៉ាងសំខាន់របស់ចិន និងជាទីក្រុងកំពង់ផែពាណិជ្ជកម្មស្ថិតចំណាត់ថ្នាក់ទី១០ ក្នុងលោក។ ផ្អែកតាមស្ថិតិក្នុងឆ្នំា ២០១៣ ឲ្យដឹងថា ទីក្រុងកំពង់ផែធៀនជីនមានមនុស្សរស់នៅប្រមាណជា ១៥លាននាក់ និងមានចម្ងាយប្រមាណជា ១៤០គីឡូម៉ែត្រស្ថិតប៉ែកអាគ្នេយ៍ទីក្រុងប៉េកំាង។
ព្រឹត្តិការណ៍ផ្ទុះបានកើតឡើងចំនួន ២ដងដែលលើកទី១ និងទី២ មានរយៈពេលខុសគ្នា ៣០វិនាទី។ ការផ្ទុះលើកទី១ មានកម្លំាងស្មើនឹងការបំផ្ទុះជាតិផ្ទុះ TNT ចំនួន ៣តោន ចំណែកការផ្ទុះលើកទី២ នៅ ៣០វិនាទីក្រោយមក គឺមានកម្លំាងស្មើនឹងការបំផ្ទុះជាតិផ្ទុះ TNT ដល់ទៅ ២១តោន។ ឥទ្ធិពលនៃកម្លំាងផ្ទុះទំាងពីរលើកបានធ្វើឲ្យរង្គើផ្ទៃដីក្នុងរង្វង់ ៣គីឡូម៉ែត្រពីកន្លែងផ្ទុះ។ តាមទីភ្នាក់ងារវាស់កម្រិតរញ្ជួយដីចិនឲ្យដឹងថា ការផ្ទុះលើកទី១ មានឥទ្ធិពលស្មើនឹងកម្លំាងរញ្ជួយដីក្នុងកម្រិត ២,៣រ៉ិចទ័រ រីឯការផ្ទុះលើកទី២ មានកម្រិត ២,៩រ៉ិចទ័រ។
កម្លំាងផ្ទុះទំាងពីរលើកបានបណ្តាលឲ្យមានមនុស្សស្លាប់ភ្លាមៗយ៉ាងតិច ៤៤នាក់ ក្នុងនោះមានអ្នកពន្លត់អគ្គីភ័យចំនួន ១២នាក់ និងអ្នករងរបួសជាង ៥២០នាក់ ក្នុងនោះមានប្រមាណជា ៦០នាក់កំពុងស្ថិតក្នុងស្ថានភាពស្ទើរស្លាប់ ស្ទើររស់។ កម្លំាងផ្ទុះបានធ្វើឲ្យកញ្ជក់អាគារផ្ទុះបែក ប្រេះស្រាំជា ១០០០បំណែក ព្រមទំាងបណ្តាលឲ្យមានការបាក់ស្រុតដំបូលផ្ទះរបស់ប្រជាជន។ នៅឯកំពង់ផែ មានរថយន្តថ្មីៗប្រមាណជា ៦០០គ្រឿងដែលកំពុងចតដើម្បីដឹកចេញបានទទួលរងការឆាបឆេះគ្មានសល់។
រដ្ឋាភិបាលព្រមានផ្តន្ទាទោសចាស់ដៃចំពោះជន្មលើស
ជាង ១២ម៉ោង ក្រោយការផ្ទុះ គេនៅតែមិនទាន់អាចដឹងពីមូលហេតុដើមដែលឈានឲ្យមានការផ្ទុះនៅក្នុងឃ្លំាងស្តុកផលិតផលគីមី និងជាតិផ្ទុះ។ តែមានការលើកឡើងថា អ្វីៗបានចាប់ផ្តើមដំបូងពីការឆេះកុងទ័រន័រមួយដែលដាក់ពេញដោយជាតិផ្ទុះនៅកំពង់ផៃធៀនជីន ហើយមូលហេតុនៃការឆេះកុងទ័រន័រនោះ ក៏គេមិនទាន់ដឹងដែរ។ ក្រុមអ្នកពន្លត់ភ្លើងក៏បានរួសរាន់ចេញអន្តរាគមន៍ទៅពន្លត់កុងទ័រន័រដែលកំពុងឆាបឆេះ ហើយពេលនោះក៏មានការផ្ទុះ រួចឆ្លងឆាបឆេះផ្ទុះដល់ឃ្លំាស្តុកផលិតផលគីមី និងជាតិផ្ទុះដែលស្ថិតក្បែរនោះ។
យោងតាមប៉ូលិស ឃ្លំាងស្តុកផលិតផលគីមីប្រកបដោយគ្រោះថ្នាក់ និងជាតិផ្ទុះនោះ ជាកម្មសិទ្ធិរបស់ក្រុមហ៊ុនឯកជនមួយឈ្មោះ Tianjin Dongjiang Port Rui Hai International Logistics Co. Ltd.។ រដ្ឋាភិបាលផ្តើមចាត់វិធានការស៊ើបអង្កេត ដោយមានការឃាត់ខ្លួនថ្នាក់ដឹកនំា និងអ្នកទទួលខុសត្រូវក្រុមហ៊ុនជាច្រើនរូប។ លោកប្រធានាធិបតីស៊ី ជីនពីងបានអំពាវនាវឲ្យរដ្ឋអំណាចប្រើគ្រប់មធ្យោបាយ និងប្រឹងប្រែងឲ្យអស់លទ្ធភាពក្នុងការជួយសង្រ្គោះជនរងគ្រោះ ព្រមទំាងសន្យាផ្តន្ទាទោសចាស់ដៃចំពោះជនល្មើស និងក្រុមហ៊ុនដែលមានការធ្វេសប្រហែសក្នុងផ្នែកសន្តិសុខ។
អ្វីដែលរដ្ឋអំណាចកំពុងបារម្ភខ្លំាងជាងគេនោះ គឺផលវិបាកសុខភាពរបស់ពលរដ្ឋដែលស្ថិតក្បែរនោះ ដោយសារតែពួកគេបានស្រូបយកផ្សែងពុលគីមីហោះវិលវល់ក្នុងបរិយាកាស ព្រមទំាងវត្តមានសារធាតុគីមីដែលខ្ទាតចេញពីឃ្លាំងស្តុកដោយឥទ្ធិពលកម្លំាងផ្ទុះ។ អ្វីដែលបន្តជាអាដ៍កំបំាងពេលនេះ គឺបរិមាណសារធាតុគីមី និងបរិមាណជាតិផ្ទុះ ព្រមទំាងប្រភេទរបស់វាដែលមាននៅក្នុងឃ្លំាងស្តុកនោះ។
ចិនបានស្គាល់គ្រោះមហន្តរាយផ្ទុះរោងចក្រញយដង
នេះមិនមែនជាលើកទី១ ទេដែលចិនបានស្គាល់គ្រោះថ្នាក់ស្រដៀងគ្នា ហើយបើតាមមើលទៅ គ្រោះថ្នាក់ពេលនេះទៀតក៏ប្រហែលជាមិនមែនជាលើកចុងក្រោយដែរ។ ថ្មីៗកន្លងទៅនេះ ពោលក្នុងខែកក្កដា មានមនុស្សស្លាប់ ១៥នាក់ និងរបួសជាង ១០នាក់ផ្សេងទៀតនៅក្នុងព្រឹត្តិការណ៍ផ្ទុះកន្លែងផលិតកំាជ្រួចដោយលួចលាក់មួយក្នុងខេត្ត Hebei ស្ថិតប៉ែកខាងជើងប្រទេសចិន។ ក្នុងខែសីហា ឆ្នំា ២០១៤ មានការផ្ទុះនៅក្នុងរោងចក្រផលិតគ្រឿងបន្លាស់រថយន្តមួយក្នុងស្រុក Kunshan ស្ថិតក្បែរទីក្រុងសៀងហៃដោយបណ្តាលឲ្យស្លាប់មនុស្ស ៧១នាក់។ កាលពីឆ្នំា ២០១៣ មានស្លាប់ ១៣នាក់ និងបាត់ខ្លួន ២០នាក់នៅក្នុងព្រឹត្តិការណ៍ផ្ទុះរោងចក្រផលិតជាតិផ្ទុះ។
ជាទូទៅ មូលហេតុនៃគ្រោះថ្នាក់ផ្ទុះត្រូវបានគេសម្គាល់ឃើញថា មកពីការធ្វេសប្រហែសផ្នែកសន្តិសុខ ពោលម្ចាស់ក្រុមហ៊ុន ឬមួយក៏ម្ចាស់រោងចក្រ សហគ្រាសមិនបានគោរពតាមបទដ្ឋានសន្តិសុខឲ្យបានត្រឹមត្រូវ។ ការធ្វើយ៉ាងនេះ គឺដើម្បីកេងចំណេញលុយ ដោយថៅកែសុខចិត្តសូកប៉ាន់ដើម្បីបិទភ្នែក បិទមាត់ចំពោះក្រុមអធិការដែលចុះទៅត្រួតពិនិត្យនៅក្នុងក្រុមហ៊ុន ឬរោងចក្រ សហគ្រាសរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ