ចិនចាត់វិធានការប្រឆំាងនឹងរដ្ឋអាជ្ញា និងអ្នកស៊ើបអង្កេតក្នុងរឿងពុករលួយ
នៅក្នុងប្រទេសចិន រដ្ឋអំណាចបានប្រកាសចេញនូវវិធានការទប់ស្កាត់ទង្វើសម្លាប់ខ្លួនឯងនៅក្នុងយុទ្ធនាការប្រយុទ្ធប្រឆំាងនឹងអំពើពុករលួយ។ ចាប់ពីពេលនេះតទៅ រដ្ឋអាជ្ញា និងអ្នកស៊ើបអង្កេតរឿងអាស្រូវពុករលួយនឹងត្រូវផ្តន្ទាទោស ប្រសិនបើការងារស៊ើបអង្កេតរបស់ពួកគេលើមន្រ្តីណាម្នាក់នំាឲ្យមន្រ្តីរូបនោះសម្លាប់ខ្លួនឯងចោល។ វិធានការរបស់រដ្ឋាភិបាលក្រុងប៉េកំាងរបៀបនេះបានធ្វើឡើង បន្ទាប់ពីមានព្រឹត្តិការណ៍ធ្វើអត្តឃាតរបស់មន្រ្តីជាន់ខ្ពស់ជាច្រើនរូបដែលជាប់អង្កេតរឿងអាស្រូវពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
តំាងពី ២ឆ្នំាកន្លងទៅនេះដែលចិនបានបើកមហាយុទ្ធនាការប្រយុទ្ធប្រឆំាងនឹងអំពើពុករលួយនៅផ្ទៃក្នុងគណបក្សកម្មុយនិស្តចិន និងនៅក្នុងរោងចក្រ សហគ្រាសរដ្ឋ។ យុទ្ធនាការនេះបានបណ្តាលឲ្យមានមន្រ្តីជាន់ខ្ពស់ជាច្រើនរូបបាត់បង់មុខតំណែង ព្រមទំាងឈានទៅធ្វើអត្តឃាតសម្លាប់ខ្លួនឯងចោលទៀតផង។ ជាក់ស្តែងថ្មីៗនេះ អគ្គនាយកក្រុមហ៊ុនម្នាក់ដែលមានទុនវិនិយោគរាប់សិបលានដុល្លារត្រូវបានគេរកឃើញព្យួរ ក ស្លាប់នៅក្នុងការិយាល័យរបស់គាត់។ ការព្យួរ ក សម្លាប់ខ្លួនឯងរបស់អគ្គនាយកក្រុមហ៊ុនរូបនោះបានកើតមានឡើង ចំពេលដែលក្រុមអ្នកស៊ើបអង្កេតរឿងពុករលួយបានចុះទៅពិនិត្យ ឆែកឆេរនៅក្នុងក្រុមហ៊ុនរបស់គាត់។
បើគិតតំាងពីឆ្នំា ២០១២ មក មានមន្រ្តីជាន់ខ្ពស់ក្នុងគណបក្ស និងក្នុងរដ្ឋាភិបាលយ៉ាងតិច ៥០នាក់បានសម្លាប់ខ្លួនដោយសារតែជាប់ក្នុងការស៊ើបអង្កេតរឿងពុករលួយ។ គឺនៅក្នុងន័យនេះហើយបានជាកាលពីថ្ងៃព្រហស្បតិ៍ ទី៦ សីហា តុលាការកំពូលប្រជាមានិតចិនដែលជាអ្នកគ្រប់គ្រងរដ្ឋអាជ្ញានៅតុលាការទូទំាងប្រទេសចិនបានផ្សព្វផ្សាយជាសាធារណៈនូវសេចក្តីណែនំាចំនួន ៨ចំណុច។ កម្មវត្ថុ គឺជួយតម្រែតម្រង់រដ្ឋអាជ្ញាពីរបៀបស៊ើបអង្កេតទៅលើមន្រ្តីជាន់ខ្ពស់ណាដែលរំលោភអំណាច និងស៊ីសំណូកសូកប៉ាន់។
យោងតាមសេចក្តីណែនំាដដែល អ្នកស៊ើបអង្កេត និងរដ្ឋអាជ្ញានឹងត្រូវព្យួរការងារ រួចផ្តន្ទាទោសតាមច្បាប់ ប្រសិនបើការងារស៊ើបអង្កេតរបស់គេបានធ្វើឡើងផ្ទុយនឹងច្បាប់ និងគ្មានលក្ខណទទួលខុសត្រូវ ពិសេសបើការស៊ើបអង្កេតលើមន្រ្តីណាម្នាក់បានធ្វើឲ្យមន្រ្តីនោះរត់គេចខ្លួន រងរបួស ឬមួយក៏សម្លាប់ខ្លួនឯងចោល។ ទន្ទឹមគ្នានេះ សេចក្តីណែនំាក៏បានហាមមិនរដ្ឋអាជ្ញាមិនឲ្យទទួលសំណូកពីមន្រ្តី ឬរោងចក្រ សហគ្រាសដែលជាប់សង្ស័យរឿងពុករលួយ ឬមួយក៏ប្រើទារុណកម្មផ្សេងៗដើម្បីទទួលចម្លើយសារភាព។
ក្នុងឆ្នំា ២០១៣ អ្នកស៊ើបអង្កេត ៥នាក់ និងរដ្ឋអាជ្ញាម្នាក់បានទទួលទោសជាប់គុកពី ៤ខែទៅ ១៤ឆ្នំាពីបទបានធ្វើឲ្យចៅហ្វាយក្រុមហ៊ុនម្នាក់សម្លាប់ខ្លួនដោយជ្រមុជក្នុងទឹក បន្ទាប់ពីពួកគេបានធ្វើទារុណកម្មលើចៅហ្វាយក្រុមហ៊ុននោះឲ្យសារភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ