ជនជាតិបារាំងមិនស្ថិតនៅក្នុងបញ្ជីឈ្មោះអ្នកទោសដែលឥណ្ឌូណេស៊ីត្រូវប្រហារជីវិតនៅថ្ងៃខាងមុខ
អាជ្ញាធរឥណ្ឌូណេស៊ី កាលពីថ្ងៃសៅរ៍ បានជូនដំណឹងផ្លូវការ ប្រាប់ទៅសមីជន អ្នកទោស៩នាក់ ថា ពួកគេនឹងត្រូវប្រហារជីវិត នៅពេលឆាប់ៗខាងមុខ។ តាមអ្នកនាំពាក្យរបស់អាយ្យការឥណ្ឌូណេស៊ី ជនជាតិបារំាង Serge Atlaoui ត្រូវបានដកចេញពីបញ្ជីអ្នកទោសដែលត្រូវប្រហារជីវិត។ សេចក្តី ជូនដំណឹងរបស់តុលាការឥណ្ឌូណេស៊ី ធ្វើឡើង នៅថ្ងៃតែមួយ ដែលប្រធានាធិបតីបារាំង លោកហ្រ្វង់ស័រ ហូឡង់បានព្រមានពីផលវិបាកផ្នែកការទូត ក្នុងទំនាក់ទំនងបារាំង ក្នុងករណីដែលឥណ្ឌូណេស៊ីប្រហារជីវិតជនជាតិបារាំង Serge Atlaoui។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្តីសង្ឃឹមចាប់មានជាថ្មី នៅពេលអាយ្យការឥណ្ឌូណេស៊ីបានបញ្ជាក់ថា ជនជាតិបារាំង Serge Atlaoui ត្រូវបានដកចេញពីបញ្ជីឈ្មោះអ្នកទោសដែលត្រូវប្រហារជីវិត ដោយសារការជួញដូរគ្រឿងញៀន។ ទាំងមេធាវី និងក្រសួងការបរទេសបារាំង មានការប្រុងប្រយ័ត្នមិនទាន់ហ៊ានធ្វើអត្ថាធិប្បាយណាដែលថា ជនជាតិបារាំងនឹងរួចខ្លួនទាំងស្រុងពីទោសប្រហារជីវិត នៅឥណ្ឌូណេស៊ីនៅឡើយទេ។
នៅថ្ងៃសៅរ៍ ប្រធានាធិបតីបារាំង ដែលសន្យាធ្វើគ្រប់មធ្យោបាយ ដើម្បីជួយ Serge Atlaouiឲ្យចាកផុតពីទោសប្រហារជីវិតនៅឥណ្ឌូណេស៊ី។ បានប្រកាសព្រមានរដ្ឋាភិបាលឥណ្ឌូណេស៊ីពីផលវិបាក ក្នុងករណីដែលឥណ្ឌូណេស៊ីប្រហារជីវិតជនជាតិរបស់ខ្លួន។
តាមTony Spontana អ្នកនាំពាក្យរបស់អាយ្យការឥណ្ឌូណេស៊ី Serge Atlaouiមិនស្ថិតនៅក្នុងបញ្ជីឈ្មោះអ្នកទោសដែលត្រូវប្រហារជីវិត នៅក្នុងពេលខាងមុខ ដោយសារតែសំណុំរឿងរបស់ Serge Atlaouiកំពុងស្ថិតនៅក្នុងនិតិវិធីរបស់តុលាការរដ្ឋបាល។ ការអនុវត្តទោសប្រហារជីវិតអ្នកជួញដូរគ្រឿងញៀន នៅឥណ្ឌូណេស៊ី បានរងការរិះគន់ និងតវ៉ាពីសហគមន៍អន្តរជាតិរួមទំាងសហភាពអឺរ៉ុប។ នៅថ្ងៃសៅរ៍ រដ្ឋមន្រ្តីការបរទេសអូស្ត្រាលីបាននិយាយថា អូស្ត្រាលីបានទទួលការជូនដំណឹងពីឥណ្ឌូណេស៊ី និងគ្មានសង្ឃឹមថា ជនជាតិរបស់ខ្លួនទាំងពីរនាក់នឹងអាចរួចផុតពីការប្រហារជីវិតរបស់អាជ្ញាធរឥណ្ឌូណេស៊ីនោះទេ។
នៅថ្ងៃសៅរ៍ អាជ្ញាធរឥណ្ឌូណេស៊ីបានជូនដំណឹងទៅដល់មន្រ្តីទូតរបស់ប្រទេសដែលមានជនជាតិរបស់ខ្លួន ត្រូវប្រឈមនឹងការកាត់ទោសប្រហារជីវិត ក្នុងរឿងជួញដូរគ្រឿងញៀន។ អ្នកទោស ៩នាក់ ដែលនៅក្នុងនោះ មានជនបរទេស៨នាក់ មកពីប្រទេសអូស្ត្រាលី ប្រេស៊ីល នីហ្សេរីយ៉ា និងហ្វីលីពីន នឹងត្រូវគេប្រហារជីវិត ដោយបាញ់នឹងគ្រាប់កាំភ្លើងនៅលើកោះ Nusakampangan។ អ្នកនាំពាក្យមិនបានបញ្ជាក់ពីថ្ងៃដែលអ្នកទោសត្រូវគេប្រហារជីវិតទេ។ ប៉ុន្តែ តាមមេធាវីរបស់អ្នកទោសជាតិហ្វីលីពីន អាជ្ញាធរបានជូនដំណឹងប្រាប់កូនក្តីរបស់គាត់ថា រូបនាងនឹងត្រូវគេប្រហារជីវិតនៅថ្ងៃអង្គារខាងមុខ។
នៅឥណ្ឌូណេស៊ី តាមច្បាប់ អាជ្ញាធរត្រូវជូនដំណឹង បើកឱកាសឲ្យជនជាប់ទោសបានជួបនិយាយ ពាក្យសំដីចុងក្រោយ ជាមួយក្រុមគ្រួសារ ឲ្យបាន៣ថ្ងៃមុន ថ្ងៃប្រហារជីវិត។ ច្បាប់ប្រឆាំងគ្រឿងញៀនត្រូវគេចាត់ទុកជាច្បាប់ដែលតឹងខ្លាំងជាងគេនៅលើពិភពលោក។ មានគ្រឿងញៀនតិចតួចជាប់ខ្លួន ក៏អាចធ្វើឲ្យគេជាប់ទោសប្រហារជីវិតដែរ គឺដូចនៅវៀតណាម ថៃ ម៉ាឡេស៊ីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ