ភូមា៖តើលោកទីន ចវនឹងដើរតួនាទីជាប្រធានាធិបតីពិត ឬមួយគ្រាន់ជាតុកតារបស់លោកស្រីអ៊ុង សានស៊ូជី?
ចុះផ្សាយនៅថ្ងៃ៖
ស្តាប់ - ០៥:២៩
នៅក្នុងប្រទេសភូមា គេបានស្គាល់ និងឃើញហើយឈ្មោះ ព្រមទាំងរូបរាងប្រធានាធិបតីថ្មី គឺលោកទីន ចវ។ មានអាយុ ៦៩ឆ្នាំ លោកទីន ចវជាមនុស្សជិតដិតម្នាក់របស់លោកស្រីអ៊ុង សានស៊ូជី ប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យ។ គឺគណបក្សប្រឆាំងដ៏ធំមួយនេះហើយដែលទទួលបានជោគជ័យយ៉ាងភ្លូកទឹក ភ្លូកដីនាការបោះឆ្នោតសភាកន្លងមក។ តាមពិតទៅ តំណែងប្រធានាធិបតីជាតំណែងដែលលោកស្រីអ៊ុង សានស៊ូជីសំឡឹងចង់បានតាំងពីយូរមកហើយ តែត្រូវបានរារាំងដោយច្បាប់រដ្ឋធម្មនុញ។ តែលោកស្រីធ្លាប់បានបញ្ជាក់រួចហើយថា ទោះបីមិនមានតំណែងជាប្រធានាធិបតីក៏ដោយ ក៏លោកស្រីនឹងស្ថិតពីលើលោកប្រធានាធិបតីដែរ។ បើអ៊ីចឹង លោកទីន ចវមិនមែនជាតុកតារបស់លោកស្រីអ៊ុង សានស៊ូជីទេ ឬយ៉ាងណា?
នៅទីបំផុត តួអង្គដែលបានក្លាយជាប្រធានាធិបតីភូមាពេលនេះ មិនមែនជាតួឯកស្រីលោកស្រីអ៊ុង សានស៊ូជីទេ តែជាតួឯកប្រុសលោកទីន ចវមានអាយុ ៦៩ឆ្នាំ។ តាមពិតទៅ តួឯកស្រីក៏ចង់បានតំណែងកំពូលមួយនេះដែរ តែមកពីរដ្ឋធម្មនុញ្ញបានហាមឃាត់។ ច្បាប់រដ្ឋធម្មនុញ្ញដែលបានហាមមិនឲ្យអ្នកនយោបាយភូមារូបណាដែលមានគូស្រករជាជនបរទេស ឬមួយកូនចៅជាជនបរទេសឡើងកាន់តំណែងប្រធានាធិបតីបានទេ។ ជាការពិត កម្មវត្ថុរបស់របស់លោកស្រីអ៊ុង សានស៊ូជីក្នុងនាមជាប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យដែលជាគណបក្សប្រឆាំង គឺដណ្តើមជោគជ័យនៅក្នុងការបោះឆ្នោតសភា។ កម្មវត្ថុមួយនេះត្រូវបានសម្រេចដូចក្តីប្រាថ្នា ព្រោះគណបក្សប្រឆាំងមួយនេះទទួលបានជោគជ័យយ៉ាងភ្លូកទឹក ភ្លូកដីនាការបោះឆ្នោតកន្លងមក។
តែទន្ទឹមគ្នានេះ ក៏គេមិនត្រូវភ្លេចនិយាយពីមហិច្ឆតាពិតរបស់លោកស្រីជ័យលាភីរង្វាន់ណូបែលសន្តិភាពអ៊ុង សានស៊ូជីទេ។ មហិច្ឆតានោះ គឺគ្មានអ្វីក្រៅពីតំណែងប្រធានាធិបតីឡើយ នោះបើទោះបីជាលោកស្រីដឹងថា កំពុងជាប់អន្ទាក់ដោយច្បាប់រដ្ឋធម្មនុញ្ញសល់ពីសម័យរបបសឹកក៏ដោយ។ សូមជម្រាបជូនថាពីដំបូងឡើយ ពោលមុននឹងបង្ខំចិត្តបោះបង់កៅអីប្រធានាធិបតីទៅឲ្យលោកទីន ចវ លោកស្រីអ៊ុងសានស៊ូជីបានប្រឹងប្រែងចរចាគ្រប់បែបយ៉ាងជាមួយក្រុមមេដឹកនាំយោធា ដើម្បីឈានទៅកែប្រែមាត្រាខ្លះនៃច្បាប់រដ្ឋធម្មនុញ្ញក្នុងគោលដៅអនុញ្ញាតឲ្យលោកស្រីអាចឡើងអង្គុយកៅអីប្រធានាធិបតីបាន។
រូបលោកស្រីអ៊ុង សានស៊ូជីខ្លួនឯងបានដឹងយ៉ាងច្បាស់ថា លោកស្រីពិបាកនឹងនិយាយបញ្ចុះបញ្ចូលក្រុមមេដឹកនាំយោធាឲ្យកែប្រែរដ្ឋធម្មនុញ្ញ ហើយនៅខាងក្រុមមេដឹកនាំយោធាទៀតសោត ក៏មានការប្រយ័ត្នប្រយែងខ្លាំងណាស់ចំពោះបញ្ហានេះ ពោលមិនចង់យក ក ទៅលនឹងអន្ទាក់ដោយខ្លួនឯងនោះទេ។ នៅក្រោយការបោះឆ្នោតដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យទទួលបានជោគជ័យធំធេង លោកស្រីអ៊ុង សានស៊ូជីធ្លាប់បានថ្លែងក្នុងន័យព្រមានទុកជាមុនថា ទោះបីជាលោកស្រីមិនបានក្លាយជាប្រធានាធិបតីក៏ដោយ ក៏លោកស្រីនឹងស្ថិតនៅពីលើប្រធានាធិបតីដែរ។
តាមរយៈពាក្យសម្តីមួយឃ្លានេះនាំឲ្យគេយល់បានភ្លាមថា ទោះបីជារូបតួអង្គណាមួយបានក្លាយជាតួឯកក៏ដោយ ក៏តួឯករូបនោះបានដើរតួនាទីត្រឹមជាតួឯកនិមិត្តរូបប៉ុណ្ណោះ។ គឺនៅក្នុងន័យនេះឯងបានជាលោកស្រីអ៊ុង សានស៊ូជីសម្រេចជ្រើសយករូបលោកទីន ចវ ហើយជម្រើសនេះទៀតសោតក៏មិនមែនជាជម្រើសចៃដន្យដែរ។ មិនមែនជាជម្រើសចៃដន្យ ព្រោះទី១ លោកជាមនុស្សជិតដិតជាងគេម្នាក់ និងជាមិត្តភក្តិពីកុមារភាព ទី២ លោកទីន ចវជាមនុស្សដែលលោកស្រីទុកចិត្ត។ ផ្អែកតាមរដ្ឋធម្មនុញ្ញភូមា អំណាចស្ថិតក្នុងកណ្តាប់ដៃប្រធានាធិបតី តែសំណួរដែលកំពុងចោទពេលនេះគឺថា តើលោកប្រធានាធិបតីថ្មីទីន ចវនឹងដើរតួនាទីពិតរបស់ខ្លួនដោយមិនទទួលឥទ្ធិពលពីអ្នកដទៃដើម្បីធ្វើកំណែទម្រង់ប្រទេស ឬមួយក៏គ្រាន់ជាតួអង្គនិមិត្តមួយរងចាំតែអនុវត្តន៍នូវអនុសាសន៍របស់អ្នកដទៃ ពិសេសគឺលោកស្រីអ៊ុងសានស៊ូជី?
ក្រុមអ្នកវិភាគស្ថានការណ៍នយោបាយភូមាបានយល់ឃើញដូចគ្នាពីអត្តចរិត និងមហិច្ឆិតារបស់លោកស្រីអ៊ុង សានស៊ូជីដែលមិនចូលចិត្តនៅក្រោមគេ និងស្តាប់បញ្ជាអ្នកដទៃ។ គឺជាស្រ្តីមួយរូបដែលចូលចិត្តគ្រប់គ្រង និងធ្វើការងារដោយខ្លួនតាំងពីការងារធំដុំដល់ការងារកំប៉ិកកំប៉ុក។ ជាក់ស្តែងថ្មីៗនេះ លោកស្រីបានដឹកនាំសកម្មជនដើរប្រមូលសម្រាម ឬមួយក៏គិតគូរពីការរៀបចំអនាគតលំនៅដ្ឋានរបស់អ្នកតំណាងរាស្រ្តក្នុងបក្សលោកស្រីជាដើម។ ក្នុងនាមជាប្រធានបក្ស លោកស្រីអ៊ុងសានស៊ូជីមិនញញើតនឹងប្រើអំណាចរបស់ខ្លួនទេ។ មកដល់ត្រង់ចំណុចនេះនាំឲ្យមានសំណួរចោទឡើងថា តើលោកទីន ចវមិនមែនកំពុងធ្វើជាប្រធានាធិបតីតុកតារបស់លោកស្រីអ៊ុង សានស៊ូជីទេ ឬយ៉ាងណា?
វាហាក់ដូចជារហ័សពេកដែលគេអាចផ្តល់ចម្លើយណាមួយចំពោះសំណួរនេះ តែអ្វីដែលគេអាចផ្តល់ការយល់ឃើញបាននោះគឺថា ការដើរតួនាទីជាប្រធានាធិបតីក្រៅរបងមិនមែនជាសញ្ញាល្អទេសម្រាប់រូបលោកស្រីផ្ទាល់ ក៏ដូចជាប្រទេសភូមា។ អំណួត និងមោទនភាពជ្រុលហួសហេតុរបស់លោកស្រីអ៊ុង សានស៊ូជីអាចនឹងបង្កគ្រោះថ្នាក់ដល់ដំណើរការកសាងលទ្ធិប្រជាធិបតេយ្យដ៏ក្មេងខ្ចីរបស់ភូមាដែលធ្លាប់ស្ថិតក្រោមរបបសឹកអស់រយៈពេលជិត ៥០ឆ្នាំ។ លោកស្រីអ៊ុង សានស៊ូជីអាចពិភាក្សា ពិគ្រោះយោបល់ និងឲ្យជាអនុសាសន៍ខ្លះចំពោះលោកទីន ចវដែលជាមនុស្សរបស់ខ្លួន តែមិនត្រូវធ្វើឲ្យជ្រុលហួសដែនកំណត់ឡើយ។ បើពុំនោះសោតទេ ប្រទេសភូមានឹងមិនត្រឹមក្លាយទៅជាវត្ថុនៃការលេងសើចប៉ុណ្ណោះទេ តែគឺស្ថាប័នប្រធានាធិបតីតែម្តងដែលនឹងត្រូវចុះខ្សោយ និងគ្មានប្រសិទ្ធភាព។
យ៉ាងណាក៏ដោយនៅចំពោះមុខ គ្មានសញ្ញាណាមួយដែលបង្ហាញពីទង្វើទាំងអស់នេះនៅឡើយទេ ហើយការឡើងអង្គុយកៅអីប្រធានាធិបតីរបស់លោកទីន ចវទៀតសោតក៏ទទួលបានការគាំទ្រពីមជ្ឈដ្ឋានទូទៅនៅភូមាដែរ។ អ្វីដែលគេកំពុងរង់ចាំនៅថ្ងៃខាងមុខ គឺការចូលបំពេញការងាររបស់លោកទីន ចវដែលត្រូវចាប់ផ្តើមពីថ្ងៃទី១ មេសាខាងមុខ ទន្ទឹមគ្នានឹងការងាររបស់រដ្ឋាភិបាលថ្មី។ ទន្ទឹមគ្នានេះ គ្រប់គ្នាក៏កំពុងរង់ចាំអុតមើលថា តើលោកស្រីអ៊ុង សានស៊ូជីនឹងយល់ព្រមទទួលតំណែងរដ្ឋមន្រ្តីក្រសួងណាមួយ ឬមួយក៏បន្តស្ថិតជាអ្នកតំណាងរាស្រ្តដូចសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ