ឥណ្ឌា និងបង់ក្លាដែសចុះកិច្ចព្រមព្រៀងប្រវត្តិសាស្រ្តបិទបញ្ចប់វិបត្តិដីភូមិតាមព្រំដែន
នាយករដ្ឋមន្រ្តី ឥណ្ឌា អ៊ីនដ្រា ម៉ូឌី នៅថ្ងៃសៅរ៍នេះ បានផ្តើមទស្សនកិច្ចផ្លូវរដ្ឋ ជាលើកទី១ នៅក្នុងប្រទេសបង់ក្លាដែស។ កម្មវត្ថុសំខាន់នៃទស្សនកិច្ចរយៈពេល២ថ្ងៃ របស់លោកម៉ូឌី គឺដោះស្រាយបញ្ហាព្រំដែន និងសញ្ជាតិរបស់ប្រជាជនដែលនៅរស់នៅតាមបណ្តោយព្រំដែនឥណ្ឌា និងបង់ក្លាដែស។ ប្រទេសទាំងពីរនឹងត្រូវចុះកិច្ចព្រមព្រៀងផងដែរ ទៅលើគម្រោងពាណិជ្ជកម្ម និងការសាងសង់ហេដ្ឋរចនាសម្ព័ន្ធ ក្នុង ប្រទេសបង់ក្លាដែស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៧
នាយករដ្ឋមន្រ្តីឥណ្ឌាបានធ្វើដំណើរទៅដល់ទីក្រុងដាកា នៅថ្ងៃសៅរ៍ ដើម្បីបិទបញ្ចប់បញ្ហាព្រំដែនឥណ្ឌា និងបង់ក្លាដែស។ នៅល្ងាចថ្ងៃសៅរ៍ រដ្ឋមន្រ្តីការបរទេសឥណ្ឌា និងបង់ក្លាដែស ក្រោមអធិបតីភាពរបស់នាយករដ្ឋមន្រ្តីឥណ្ឌា និងនាយករដ្ឋមន្រ្តីបង់ក្លាដែស បានចុះហត្ថលេខាលើកិច្ចព្រមព្រៀង ស្តីពីការដោះដូរ ទឹកដី និងប្រជាជន ដែលកំពុងរស់នៅតាមបណ្តោយព្រំដែនប្រទេសទាំងពីរ។
បច្ចុប្បន្ននេះ ដីភូមិសរុប ១៦២ ដែលមានប្រជាជនឥណ្ឌា និងបង់ក្លាដែស រស់នៅ ប្រមាណ ៦ម៉ឺននាក់ មានទីតាំងស្ថិតនៅក្នុងប្រទេសបង់ក្លាដែស និងឥណ្ឌា។ មានន័យថា ដីភូមិ ចំនួន ១១១ របស់ប្រជាជនបង់ក្លាដែស កំពុងស្ថិតនៅក្នុងទឹកដី ឥណ្ឌា ចំណែក ដីភូមិ ចំនួន ៥១ទៀត ដែលមានប្រជាជនឥណ្ឌារស់នៅ កំពុងស្ថិតនៅក្នុងទឹកដី បង់ក្លាដែស។
នេះជាវិបត្តិ បន្សល់ទុក តាំងពីសម័យអាណានិគមនិយមអង់គ្លេស។ មានពាក្យដំណាលថា តាំងពីមុនអង់គ្លេស ចូលទៅគ្រប់គ្រង នៅឥណ្ឌា មានស្តេចក្រាញ់ពីរអង្គ គឺ ម៉ាហារ៉ាចា របស់នគរ ខូចប៊ីហា និងណាវ៉ាប មកពីនគរ រ៉ង់ពួរ។ មហាក្សត្ររបស់នគរទាំងពីរ ដែលមានព្រំដែននៅជាប់គ្នា ឧស្សាហ៍លេងបាស្ការ ដោយយកដីភូមិក្នុងនគររបស់ខ្លួន មកធ្វើជារបស់ភ្នាល់។ ដីភូមិតូចៗ ដែលគេសរសេរឈ្មោះនៅ លើក្រដាស ត្រូវហុច ទៅ ហុចមក នៅពេលស្តេចណាមួយ ឈ្នះ ឬក៏ចាញ់។ បន្ទាប់មក នៅពេលអង់គ្លេស ប្រកាសពុះចែកទឹកដី ឥណ្ឌា និងប៉ាគីស្ថាន នៅឆ្នាំ ១៩៤៧ នគរខូចប៊ីហា ត្រូវកាត់ទៅឲ្យឥណ្ឌា ក្នុងពេលដែលនគរ រ៉ង់ពួរ ត្រូវក្លាយជាកម្មសិទ្ធិរបស់ប៉ាគីស្ថាន។ ដោយមានជំនួយពីឥណ្ឌា ប្រទេសបង់ក្លាដែស បានសង្រ្គាមផ្តាច់ទឹកដី ចេញពីប៉ាគីស្ថាន នៅឆ្នាំ ១៩៧១។ គឺតាំងពីពេលនោះហើយ ដែលវិបត្តិព្រំដែន និងអត្តសញ្ញាណរបស់ប្រជាជនឥណ្ឌា និងបង់ក្លាដែស បានផ្ទុះឡើង។
រាប់ទសវត្សរ៍មកហើយ ប្រជាជនទាំងបង់ក្លាដែស និងឥណ្ឌា ដែលរស់នៅក្នុង ដីភូមិ វង្វេង ភូមិសាស្រ្ត ជួបទុក្ខវេទនា គ្មានក្រដាសស្នាម គ្មានសញ្ជាតិ និងគ្មានរដ្ឋគ្រប់គ្រងពិតប្រាកដ។ ប្រជាជនឥណ្ឌា រស់នៅ ក្នុងទឹកដីបង់ក្លាដែស ថ្វីត្បិត មានអត្តសញ្ញាណជាប្រជាជនឥណ្ឌា ក៏ប៉ុន្តែ ពួកគេមិនបានទទួលការការពារ សន្តិសុខ សេវាសុខភាព អប់រំ ឬជំនួយអ្វីមួយ ពីរដ្ឋាភិបាលឥណ្ឌាទេ។ ចំណែកប្រជាជនបង់ក្លាដែស ក៏មានជោគវាសនាដូចគ្នា។ ពួកគេត្រូវអាជ្ញាធររបស់ប្រទេសរៀងៗខ្លួន បំភ្លេចចោល។ ទាំងប្រជាជនឥណ្ឌា ក្នុងទឹកដីបង់ក្លាដែស និងបង់ក្លាដែស ក្នុងប្រទេសឥណ្ឌា ត្រូវប្រឹងរស់ដោយខ្លួនឯង ដោយប្រកបរបរកសិកម្ម ឬជួញដូរតិចតួចជាមួយប្រជាជន សាសន៍ ដទៃ ដែលនៅឡោមព័ទ្ធភូមិរបស់ខ្លួន។
តាមកិច្ចព្រមព្រៀង ដែលត្រូវបានសភាឥណ្ឌា បោះឆ្នោត អនុម័ត កាលពីដើមខែមុន គឺ ដីភូមិចំនួន ៥១ ដែលស្ថិតនៅក្នុងប្រទេសបង់ក្លាដែស ប៉ុន្តែ មានប្រជាជនឥណ្ឌារស់នៅ នឹងត្រូវផ្ទេរឲ្យមកស្ថិតនៅក្នុងដែនដីឥណ្ឌា ចំណែក ដីភូមិចំនួន ១១១ដែលមានប្រជាជនបង់ក្លាដែសរស់នៅ នឹងត្រូវកាត់ចូលជាទឹកដីបង់ក្លាដែស។
កិច្ចព្រមព្រៀង ឥណ្ឌានិងបង់ក្លាដែសបញ្ជាក់ដែរថា នៅក្នុងដំណាក់កាលដោះដូរ ដីភូមិ ប្រជាជនឥណ្ឌា និងបង់ក្លាដែស មានសិទ្ធិជ្រើសរើសប្រទេសដែលខ្លួនចង់រស់នៅ។ អាជ្ញាធររបស់ប្រទេសនីមួយៗ ត្រូវផ្តល់សញ្ជាតិ ឲ្យប្រជាជន នៅក្រោយការដោះដូរដីភូមិចប់ជាស្ថាពរ។ ចាប់ពីថ្ងៃសៅរ៍ ថ្ងៃដែលចុះកិច្ចព្រមព្រៀងរវាងភាគីបង់ក្លាដែស និងឥណ្ឌា វិបត្តិដីភូមិ ដែលប្រទេសទាំងពីរ ជួបអស់រាប់ទសវត្សរ៍មកហើយ នឹងបិទបញ្ចប់ អំណើះតទៅ។ នាយករដ្ឋមន្រ្តីឥណ្ឌាលោកណារិនដ្រា ម៉ូឌី ធ្លាប់បង្ហាញឆន្ទៈ បិទបញ្ចប់បញ្ហាព្រំដែន ជាមួយបង់ក្លាដែស នោះបើទោះជាឥណ្ឌា ត្រូវខាត បាត់បង់ ដីប៉ុន្មានគីឡូម៉ត្រទៅឲ្យបង់ក្លាដែស ដោយសារកិច្ចកិច្ចព្រមព្រៀងក៏ដោយ។
ឥណ្ឌាចង់ទប់ទល់ប្រជែងឥទ្ធិពលជាមួយចិននៅបង់ក្លាដែស
បង់ក្លាដែស ជាប្រទេសជិតខាងក្រីក្រ ដែលធ្លាប់រណបឥណ្ឌា។ ប៉ុន្តែ រដ្ឋាភិបាលទីក្រុងញូវដេលី ចាប់បារម្ភ និងមន្ទិលសង្ស័យ ពីភាពស្មោះស្ម័គ្ររបស់ទីក្រុងដាការ បន្ទាប់ពីប្រទេសចិនចាប់លេចមុខ បញ្ចេញឥទ្ធិពលកាន់តែខ្លាំង នៅបង់ក្លាដែស ដែលនៅជាប់ជិតបង្កើយនឹងឥណ្ឌា។ ទំនាក់ទំនងយោធារវាងបង់ក្លាដែស និងចិន បានធ្វើឲ្យឥណ្ឌា ដេកមកលក់ បក់ក៏មិនល្ហើយ។ នៅចន្លោះឆ្នាំ២០០៩ និងឆ្នាំ ២០១៣ បង់ក្លាដែស ក្លាយជាប្រទេសទីបី ខាងទិញ នាំចូលអាវុធ ពីប្រទេសចិន និងកំពុងត្រៀមចាំទទួលនាវាមុជទឹកចិន ពីរគ្រឿងនាពេលខាងមុខ។ ទីក្រុងប៉េកាំងដែលបានផ្តល់ទុន សម្រាប់ធ្វើទំនើបកម្ម កំពង់ផែរ ធំជាងគេរបស់បង់ក្លាដែស កំពុងត្រៀមខ្លួន សាងសង់កំពង់ផែទឹកជ្រៅមួយទៀត នៅឈូងសមុទ្រ បង់ហ្កាល់ ដែលតាមពិតស្ថិតនៅមិនឆ្ងាយប៉ុន្មានពីដែនទឹក ឥណ្ឌា។ កាលពីឆ្នាំ ២០១០ នាយករដ្ឋមន្រ្តីបង់ក្លាដែស ធ្លាប់បានប្រកាសថា មិត្តភាពជាមួយចិន មានជាដរាប ហើយចិនជាប្រទេសតែមួយគត់ ដែលបង់ក្លាដែសអាចពឹងអាស្រ័យបាន។
ការប្រកាសជាផ្លូវការរបស់នាយករដ្ឋមន្រ្តីបង់ក្លាដែស មិនបានគេចផុតពីភ្នែកត្រចៀករបស់រដ្ឋាភិបាលឥណ្ឌាទេ។ នៅក្នុងអាណត្តិរបស់ខ្លួន នាយករដ្ឋមន្រ្តីឥណ្ឌា លោកណារិនដ្រា ម៉ូឌី បានសន្យា កសាង កេរ្តិ៍ឈ្មោះ និងពង្រីកដែនឥទ្ធិពលរបស់ឥណ្ឌា នៅអាស៊ី មិនឲ្យចាញ់ចិន។ ដោយបញ្ចប់បញ្ហាព្រំដែនជាមួយបង់ក្លាដែស ឥណ្ឌា ក៏មានមហិច្ឆតា បែរភូមិសាស្រ្តនយោបាយរបស់ខ្លួន តម្រង់ទៅរក ប្រទេសនៅអាស៊ី អាគ្នេយ៍ ផ្សេងទៀត ដោយឆ្លងកាត់ណេប៉ាល់ ឬប៉ូតង់ ដែលនៅស្ថិតនៅជាប់ព្រំដែនជាមួយមហាអំណាចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ