ជប៉ុនចង់ចូលរួមផលិតមីស៊ីលជាមួយអង្គការអាត្លង់ទិក អូតង់
ចុះផ្សាយនៅថ្ងៃ៖
ស្តាប់ - ០៤:០៤
ជប៉ុនកំពុងចាប់អារម្មណ៍ចង់ចូលរួមនៅក្នុងកម្មវិធីផលិតមីស៊ីលបាញ់ របស់អង្គការអូតង់។ តាមទីភ្នាក់ងារព័ត៌មានអង់គ្លេស Reuters ដែលបានដកស្រង់ប្រភពពីមន្រ្តីការពារជាតិជប៉ុន និងអាមេរិក ជប៉ុនបានទទួលការគាំទ្រ និងជំរុញ ពីទីក្រុងវ៉ាស៊ីនតោន ឲ្យចូលរួមនៅក្នុងគម្រោងផលិតមីស៊ីលរបស់អូតង់។ វ៉ាស៊ីនតោនសង្ឃឹមថា ការចូលរួមរបស់ជប៉ុន នៅក្នុងអង្គការអូតង់ នឹងបើកផ្លូវឲ្យកងទ័ពជប៉ុនអាចផ្តើមសហការផ្នែកយោធាជាមួយជាតិដទៃទៀត នៅអាស៊ី ដែលនេះ មិនធ្លាប់មានទេ ចាប់តាំងពីចប់សង្រ្គាមលោកលើកទី ២។
កងទ័ពជប៉ុនចង់ចូលរួមនៅក្នុងគម្រោងផលិតមីស៊ីលរបស់អូតង់។ គឺទីភ្នាក់ងារព័ត៌មានអង់គ្លេស Reuters ដែលបានចុះផ្សាយដំណឹងនេះ ដោយបានដកស្រង់សំដីរបស់មន្រ្តីជប៉ុនពីររូប ដែលនិយាយ ប៉ុន្តែ សុំមិនបញ្ចេញឈ្មោះ។ មន្រ្តីជប៉ុនបាននិយាយថា កាលពីខែឧសភាកន្លងទៅ មន្រ្តីកងទ័ពជើងទឹកជប៉ុនបានធ្វើដំណើរទៅចូលរួម កិច្ចប្រជុំ នៅទីក្រុងឡាអេ ដើម្បី ស្វែងយល់ឲ្យបានស៊ីជម្រៅ ពីគម្រោងផលិតមីស៊ីល របស់អូតង់។
គម្រោងផលិតមីស៊ីល Sea sparrow ដែលជំនាញខាងបាញ់កប៉ាល់ចម្បាំង និងយន្តហោះ ក្នុងរយៈចម្ងាយជិត ត្រូវបានបង្កើតឡើង នៅឆ្នាំ ១៩៦៨ ទៅតាមគំនិតផ្តួចផ្តើមរបស់អាមេរិក។ គោលដៅ គឺអភិវឌ្ឍមីស៊ីល Sea sparrow ឲ្យកាន់តែ ទំនើប និងមានប្រសិទ្ធិភាពជាដរាប។ បច្ចុប្បន្ននេះ មានប្រទេស១២ ដែលនៅក្នុងនោះ ដឹកនាំ ដោយអាមេរិកបានចូលរួមនៅក្នុងគម្រោងផលិតមីស៊ីលប្រភេទនេះរបស់អូតង់។ បើសិន ជប៉ុនចូលរួមចំណែក នៅក្នុងគម្រោងផលិតមីស៊ីល Sea sparrowរបស់អូតង់ នោះ ប្រទេសចូលរួមផ្សេងទៀត ជាពិសេស អាមេរិកនឹងឃើញសម្រាលបន្ទុកចំណាយរបស់ខ្លួនជាស្វ័យប្រវត្តិ។
នៅឆ្នាំ ២០១៤ ប្រមុខរដ្ឋាភិបាលជប៉ុន បានធ្វើដំណើរទីក្រុងព្រុចស៊ែល ដើម្បីចុះហត្ថលេខាលើកិច្ចព្រមព្រៀង សហការជាមួយអូតង់ ដើម្បីប្រយុទ្ធប្រឆាំងនឹងក្រុមចោរសមុទ្រ ឬជួយសង្រ្គោះ ក្នុងករណីមានគ្រោះមហន្តរាយធម្មជាតិ។ ប៉ុន្តែ នេះជាលើកទី១ ដែលជប៉ុនចង់សហការផ្នែកយោធា ជាមួយអូតង់។ ការប៉ុនប៉ង ចង់ចូលរួមរបស់កងទ័ពជប៉ុន នៅក្នុងគម្រោងផលិតមីស៊ីលរបស់អង្គការអូតង់ រឹតតែបញ្ជាក់ពីមហិច្ឆតាយោធារបស់នាយករដ្ឋមន្រ្តីជប៉ុន លោកស៊ីនហ្សូ អាបេ។ នៅដើមឆ្នាំនេះ លោកអាបេ មកពីគណបក្សជាតិ និងអភិរក្សនិយម បានប្រកាសបង្កើនថវិកាយោធា ដល់ ៤២ពាន់លានដុល្លារ ដែលចំនួននេះ ច្រើន មិនធ្លាប់ នៅក្នុងរយៈពេល ៧០ឆ្នាំចុងក្រោយ។ នៅឆ្នាំមុនវិញ រដ្ឋាភិបាលរបស់លោកអាបេដដែល បានប្រកាសដកចេញ បម្រាម ដែលហាមមិនឲ្យជប៉ុន លក់អាវុធ ទៅបរទេស អស់ ៤ទសវត្សរ៍មកហើយ។ នាយករដ្ឋមន្រ្តីជប៉ុនបានដកបម្រាមលក់អាវុធរបស់ជប៉ុន ដោយប្រុងប្រយ័ត្នបំផុត គឺមិនធ្វើឲ្យប៉ះពាល់ដល់រដ្ឋធម្មនុញ្ញ សន្តិភាព ដែលនឹងអាចបង្កកំហឹង ប្រឆាំងពីក្រុមនិយមសន្តិភាព ក្នុងប្រទេស នោះទេ។ ម្តងហើយ ម្តងទៀត នាយករដ្ឋមន្រ្តីជប៉ុនបាននិយាយការពារនយោបាយរបស់លោកថា ត្រូវតែធ្វើ នៅក្នុងកាលៈទេសៈ ដែលជប៉ុនកំពុងប្រឈមនឹងការពង្រីកឥទ្ធិពលយោធារបស់ទីក្រុងប៉េកាំង។
ដោយពិតទៅ សព្វថ្ងៃនេះ ក្រុមហ៊ុនក្នុងស្រុកជប៉ុន មានសមត្ថភាពផលិតមីស៊ីល Sea sparrowរួចទៅហើយ នៅក្រោមកិច្ចព្រមព្រៀង សហការផលិតជាមួយ អូតង់ និងអាមេរិក។ ប៉ុន្តែ មីស៊ីលSea sparrowរបស់ជប៉ុនត្រូវផលិតឡើង សម្រាប់តែកងទ័ពជប៉ុនតែប៉ុណ្ណោះ គឺមិនអាចត្រូវនាំចេញទៅលក់នៅ បរទេសបានទេ។ តាមមន្រ្តីយោធាអាមេរិក បើសិនជប៉ុនចូលរួម នៅក្នុងគម្រោងផលិតអាវុធរបស់អូតង់ នោះជប៉ុនក៏បានប្រយោជន៍ច្រើនដែរ ជាពិសេស ក្នុងរឿងនាំចេញ ទាំងបច្ចេកវិទ្យាយោធា និងសព្វាវុធ ទៅលក់នៅបរទេស។ ម្យ៉ាងទៀត អាមេរិកចង់ឲ្យជប៉ុន ចូលរួម នៅក្នុងគម្រោងផលិតមីស៊ីលរបស់អូតង់ ក៏ព្រោះតែអាមេរិកមើលឃើញពីសមត្ថភាព និងសក្តានុពលបច្ចេកវិទ្យាយោធារបស់ជប៉ុន។ គេអាចនិយាយបានថា អាមេរិក ចង់ឃើញជប៉ុនដើរតួសំខាន់ នៅក្នុងគម្រោងអភិវឌ្ឍន៍ បច្ចេកវិទ្យា សព្វាវុធ នៅអាស៊ី ដើម្បី យកទៅទប់ទល់នឹងចិន។ អាមេរិកដែលគាំទ្រ ឲ្យរដ្ឋាភិបាលជប៉ុនពង្រីកមុខមាត់យោធានៅបរទេស ជាអ្នកខ្នះខ្នែងជួយឲ្យកងទ័ពជប៉ុន បានទទួលគម្រោងសាងសង់នាវាមុជទឹក ឲ្យប្រទេសអូស្ត្រាលី។ អាមេរិកដែលបែរទៅបោះយុថ្កា យុទ្ធសាស្រ្តយោធា នៅអាស៊ី ចង់បានណាស់ ចង់ឲ្យសម្ព័ន្ធមិត្តទាំងពីររបស់ខ្លួន អូស្ត្រាលី និងជប៉ុន សហការគ្នា ផ្នែកយោធា ដើម្បី ទប់ទល់នឹងមហាអំណាចចិន នៅអាស៊ី។
រដ្ឋាភិបាលជប៉ុនវិញ ដែលទើបដករួចខ្លួនពីចំណងច្បាប់ និងកំពុងឃើញឱកាសហុចឲ្យយ៉ាងដូច្នេះ នៅបានបោះដៃ សហការផ្នែកយោធាជាមួយប្រទេសដែលកំពុងមានជម្លោះជាមួយចិន នៅសមុទ្រចិនខាងត្បូង។ នៅខែមិថុនាមុន លោកនាយករដ្ឋមន្រ្តីជប៉ុន នៅបានយល់ព្រមជាមួយប្រធានាធិបតីហ្វីលីពីនក្នុងរឿងដោះដូរ បច្ចេកវិទ្យាកងទ័ព និងសព្វាវុធរវាងប្រទេសទាំងពីរ។ ចំណែក នៅខែឧសភា កន្លងទៅ លោកនាយករដ្ឋមន្រ្តីអាបេ បានយល់ព្រមព្រៀង ចាប់ផ្តើមកិច្ចពិភាក្សា ដែលនិយាយពីការផ្ទេរសម្ភារៈ និងបច្ចេកវិទ្យាយោធា ទៅឲ្យម៉ាឡេស៊ី ដែលជាភាគីជម្លោះជាមួយចិន នៅសមុទ្រចិនខាងត្បូង មិនចាញ់ហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ