គ្រោះរលំបាក់ដីសម្លាប់ កម្មករជីកត្បូង ភូមា ១០០នាក់
យ៉ាងហោចណាស់មានកម្មករជីកត្បូងភូមា ១០០នាក់ស្លាប់បាត់បង់ជីវិត នៅក្នុងគ្រោះថ្នាក់រំលំបាក់ដី ក្នុងបរិវេណការកន្លែងធ្វើអាជីវកម្មជីកត្បូងថ្លើមថ្ម។ តាមមន្រ្តីមូលដ្ឋាន និងជាប្រធានក្រុមជួយសង្រ្គោះ ព្រឹត្តិការណ៍នេះបានកើតមាននៅយប់ថ្ងៃសៅរ៍ទី ២១ វិច្ឆិកា នៅតំបន់ដាច់ស្រយាល Hpakant ដែលស្ថិតនៅ ប៉ែកខាងជើងប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ទាំងក្រុមជួយសង្រ្គោះរបស់កាកបាទក្រហម និងប៉ូលិស ទាហានភូមា សស្រាក់ សស្រាំនៅថ្ងៃអាទិត្យនេះ ដើម្បី ស្វែងរកជនរងគ្រោះ ដែលអាចកប់នៅក្រោមគំនរដីបាក់ កាលពីថ្ងៃសៅរ៍។ លោកនីឡា មីន អ្នកទទួលខុសត្រូវរដ្ឋបាលភូមា នៅតំបន់ Hpakant បាននិយាយថា នៅក្រោមគំនរដីបាក់ គេរកឃើញតែសាកសព ដែលរហូតមកដល់ថ្ងៃអាទិត្យ មានចំនួនយ៉ាងតិច ១០០នាក់។
តាមកាសែតក្នុងស្រុកភូមា គ្រោះថ្នាក់បានកើតឡើង នៅពេលដែលគំនរដី ដែលគេចាក់គរ ដូចភ្នំ បានបាក់រលំ សង្កត់ទៅលើកូនផ្ទះរបស់ កម្មករជីកត្បូងភូមា ដែលកំពុង លក់ ស្កប់ស្កល់ នៅយប់ថ្ងៃសៅរ៍។ តំបន់ Hpakant ជាកន្លែងដែលប្រជាជនក្រីក្រភូមា ចូលទៅជីក រ៉ែងដី ដែលគេជឿថា នៅសល់មានត្បូងថ្លើមថ្ម នៅក្រោយការធ្វើអាជីវកម្មរបស់ក្រុមហ៊ុនជីកត្បូង។
ភូមា ជាប្រទេសផលិតត្បូង ថ្លើមថ្មច្រើនជាងគេ នៅលើពិភពលោក។ នៅឆ្នាំ ២០១៤ ភូមាបានលក់ត្បូងថ្លើមថ្ម តម្លៃ ២៧ពាន់លានដុល្លារ ទៅទីផ្សារពិភពលោក។ ចិនជាប្រទេសនាំចូលត្បូងប្រភេទនេះ ពី ភូមាច្រើនជាងគេ ជាមួយនឹងការនាំចូលត្បូងថ្លើមថ្ម ដែលមានតម្លៃ ១២ពាន់លានដុល្លារ។ ចំណូលបានមកពីត្បូងថ្លើមថ្មតំណាងឲ្យពាក់កណ្តាលនៃផលិតផលក្នុងស្រុកសរុបរបស់ភូមា។ ប៉ុន្តែ តាមអង្គការការពារបរិស្ថាន Global Witness ការជីកយកត្បូងថ្លើមថ្មភាគច្រើនគឺធ្វើឡើង មិនត្រឹមត្រូវតាមស្តង់ដារ ខុសច្បាប់ និងមិនគោរព លក្ខខណ្ឌសន្តិសុខ។ តាមអង្គការ Global Witnessដដែល ទាំងអាជ្ញាធរ និងក្រុមហ៊ុនជីកត្បូង បិទភ្នែក ធ្វើមិនដឹង មិនលឺ បណ្តោយឲ្យប្រជាជនភូមា រាប់ពាន់នាក់ ដែលក្រីក្រ ចូលទៅរ៉ែងដី រកត្បូងថ្លើមថ្ម នៅកន្លែងចាក់ដី ដែលគ្មានសុវត្ថិភាព។
អង្គការការពារបរិស្ថាន Global Witnessនៅបានបរិហារផងដែរ សកម្មភាពជីកយកត្បូងយ៉ាងគំហុករបស់ក្រុមហ៊ុនឯកជន។ តាម Global Witness ការល្មោភរបស់ចិន ដែលចង់បានត្បូងថ្លើមថ្មរបស់ភូមា ជាដើមហេតុនៃការកាប់ព្រៃឈើ ដែលធ្លាប់តែខៀវស្រងាត់ នៅតំបន់ Hpakant នៅភូមា។ ម្យ៉ាងទៀត ត្បូងថ្លើមថ្មដ៏មានគុណភាពរបស់ភូមា ក៏ជាអ្នកនាំប្រាក់ចំណូលដ៏សំខាន់ សម្រាប់ការរស់រានរបស់ក្រុមទ័ពឧទ្ទាមកាឈីន ដែលនៅតែជាប់ដៃប្រយុទ្ធជាមួយ ទាហានរដ្ឋាភិបាលភូមា។ មេបក្សប្រឆាំង លោកស្រីអ៊ុងសាន ស៊ូជី ដែលទើបឈ្នះឆ្នោត ភូមា ធ្លាប់បានសន្យាហើយថា នឹងប្រយុទ្ធប្រឆាំងនឹងអំពើពុករលួយ និងកែលម្អសេដ្ឋកិច្ចភូមាឡើងវិញ ជាពិសេស ក្នុងរឿងឧស្សាហកម្មត្បូងថ្លើមថ្មនេះ តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ