ប៉ាគីស្ថាន៖រដ្ឋាភិបាលប្រកាសបង្កើតតុលាការយោធាដើម្បីកាត់ទោសពួកភេរវជន
ប្រទេសប៉ាគីស្ថាននឹងបង្កើតឲ្យមានតុលាការយោធាមួយសម្រាប់កាត់ទោសពួកភេរវជន នេះជាព័ត៌មានប្រកាសឲ្យដឹងនៅថ្ងៃពុធ ទី២៤ ធ្នូ នាឱកាសកិច្ចប្រជុំថ្នាក់ដឹកនំានយោបាយគ្រប់ជាន់ក្នុងគៅលដៅរៀបចំផែនការជាតិមួយប្រឆំាងនឹងភេរវនិយម។ ការសម្រេចយ៉ាងដូចនេះបានធ្វើឡើង មួយសប្តាហ៍បន្ទាប់ពីមានការវាយប្រហារសម្លាប់រង្គាលនៅក្នុងសាលារៀនមួយស្ថិតក្នុងទីក្រុងប៉េសាវ៉ាដោយបានបណ្តាលឲ្យមានមនុស្សស្លាប់ ១៤៩នាក់ ក្នុងនោះមានសិស្សសាលា ១៣៣នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
គឺរូបលោកនាយករដ្ឋមន្រ្តីប៉ាគីស្ថានណាវ៉ា ស្ហារី្វផ្ទាល់ខ្លួនដែលបានបញ្ជាក់ពីការបង្កើតឲ្យមានតុលាការយោធាមួយឡើងសម្រាប់កាត់ទោសពួកភេរវជន។ នៅក្នុងសុន្ទរកថាទៅកាន់ប្រជាជាតិនារំលងអធ្រាត្រយប់មិញ លោកណាវ៉ា ស្ហារី្វបានថ្លែងពីឱកាសជាប្រវត្តិសាស្រ្តមួយសម្រាប់ប្រទេសប៉ាគីស្ថានដើម្បីកំចាត់បណ្តាញភេរវនិយមឲ្យដល់ឫសគល់។ យោងតាមលោកស្ហារី្វ តុលាការយោធានឹងត្រូវដឹកនំាដោយមន្រ្តីយោធាជាន់ខ្ពស់ និងថា គម្រោងបង្កើតតុលាការយោធាដើម្បីកាត់ទោសពួកភេរវជនពេលនេះ គឺជាវិធានការមួយក្នុងចំណោមវិធានការចំនួន ១៧ចំណុចនៃយុទ្ធនាការប្រយុទ្ធប្រឆំាងនឹងភេរវនិយមដែលរដ្ឋាភិបាលត្រៀមអនុវត្តន៍ក្នុងរយៈពេល ២ឆ្នំា។ ក្រៅពីនោះ ក៏មានវិធានការបិទខ្ទប់ការឃោសនារបស់ពួកភេរវជននៅតាមប្រព័ន្ធអ៊ីនធ័រណេត និងតាមបណ្តាញសង្គម ព្រមទំាងបិទខ្ទប់ចំណូលរបស់ក្រុមភេរវនិយមផងដែរ។
« ថ្ងៃអន្សារបស់ពួកភេរវជនបានឈានមកដល់ហើយ និងដែលពួកគេត្រូវតែទទួលមេរៀនដ៏ល្វីងជូរចត់មួយដោយចៀសមិនរួច » នេះជាការបញ្ជាក់របស់លោកណាវ៉ា ស្ហារ្វី។ សុន្ទរកថាព្រមានរបស់លោកប្រមុខរដ្ឋាភិបាលប៉ាគីស្ថានពេលនេះបានធ្វើឡើង មួយសប្តាហ៍បន្ទាប់ពីពួកឧទ្ទាមតាលីបង់ប៉ាគីស្ថានបានវាយប្រហារនៅក្នុងសាលារៀនមួយស្ថិតក្នុងទីក្រុងប៉េសាវ៉ាដោយបានបណ្តាលឲ្យមានមនុស្សស្លាប់ ១៤៩នាក់ ក្នុងនោះមានសិស្សសាលា ១៣៣នាក់។ គួររម្លឹកជូនថា ៣ថ្ងៃ ក្រោយព្រឹត្តិការណ៍សោកសៅនៅប៉េសាវ៉ាមក ទីក្រុងអ៊ីស្លាម៉ាបាតបានបញ្ចេញប្រតិកម្មធ្វើឲ្យពិភពលោកភ្ញាក់ផ្អើល ដោយបានប្រកាសដាក់មានការអនុវត្តន៍ឡើងវិញនូវទោសប្រហារជីវិតសម្រាប់ពួកភេរវជន។ ទោសប្រហារជីវិតដែលប៉ាគីស្ថានបានព្យួរចោលតំាងពីឆ្នំា ២០០៨ មកម្ល៉េះ។
គ្រាន់តែក្នុងរយៈពេលប៉ុន្មានកន្លងទៅថ្មីៗនេះ រដ្ឋអំណាចបានប្រហារជីវិតដោយព្យួរ ក អ្នកមានទោសប្រហារជីវិតចំនួន ៦នាក់ និងបានប្រកាសឲ្យដឹងថា នឹងមានការព្យួរ ក ជាបន្តបន្ទាប់ទៀតនៅពេលខាងមុខ។ សូមជម្រាបជូនថាសព្វថ្ងៃនេះ មានអ្នកទោសទទួលទោសប្រហារជីវិតពីបទភេរវនិយមប្រមាណជា ៥០០នាក់កំពុងជាប់ក្នុងគុក ដោយរង់ចំាថ្ងៃព្យួរ ក របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ