ប៉ាគីស្ថាន៖តុលាការកំពូលបានព្យួរសេចក្តីសម្រេចរបស់តុលាការយោធាក្នុងការប្រហារជីវិតអ្នកទោស
នៅថ្ងៃព្រហស្បតិ៍ ទី១៦ មេសា តុលាការកំពូលក្នុងប្រទេសប៉ាគីស្ថានបានចេញមុខជំទាស់នឹងការសម្រេចចិត្តបស់តុលាការយោធាដែលបញ្ជាឲ្យប្រហារជីវិតអ្នកមានទោសប្រហារជីវិតជាប់សង្ស័យក្នុងសំណុំរឿងបាញ់ប្រហារនៅសាលាយោធាក្នុងទីក្រុងប៉េស្ហាវ៉ាកាលពីខែមករាកន្លងទៅ។ គួររម្លឹកជូនថា ប៉ុន្មានសប្តាហ៍ ក្រោយព្រឹត្តិការណ៍បាញ់ប្រហារក្នុងសាលាយោធានៅប៉េស្ហាវ៉ាមក សភាប៉ាគីស្ថានបានធ្វើវិសោធនកម្មច្បាប់រដ្ឋធម្មនុញ្ញដោយបានអនុញ្ញាតឲ្យបង្កើតតុលាការយោធាពិសេសឡើងសម្រាប់កាត់ក្តីរឿងរ៉ាវទាក់ទងនឹងភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
គេពិតជានៅចំាបានមិនភ្លេចកាលពីខែមករាកន្លងទៅ ជនប្រដាប់អាវុធមួយក្រុមបានចូលបាញ់ប្រហារនៅក្នុងសាលាយោធាមួយក្នុងទីក្រុងប៉េស្ហាវ៉ាដោយបានផ្តាច់ជីវិតមនុស្សយ៉ាងតិច ១៥០នាក់ ក្នុងនោះមានសិស្សសាលាជាង ១៣០នាក់។ ក្រោយព្រឹត្តិការណ៍បង្ហូរឈាមនោះភ្លាម រដ្ឋាភិបាលក៏បានចាត់វិធានការចាស់ដៃដោយសម្រេចបង្កើតឲ្យមានតុលាការយោធាសម្រាប់កំចាត់បណ្តាញឧទ្ទាមឲ្យដល់ឫសគល់។ ជាក់ស្តែងនៅដើមខែមេសានេះ តុលាការយោធាបានកាត់ទោសប្រហារជីវិតជនឧទ្ទាមសង្ស័យចំនួន ៦នាក់ និងដាក់គុកមួយជីវិតម្នាក់ដែលជាប់ពាក់ព័ន្ធនឹងទង្វើភេរវនិយម។ គួរបញ្ជាក់ជូនថា ដំណើរការកាត់ទោសនោះមិនត្រូវបានគេផ្សព្វផ្សាយជាសាធារណៈទេ ហើយគេក៏មិនដឹងថា តើជនជាប់ចោទទំាងនោះបានចោទប្រកាន់ពីបទអ្វីខ្លះទេ។
ក៏ប៉ុន្តែ និងដោយផ្អែកលើបណ្តឹងតវ៉ារបស់សមាគមក្រុមមេធាវីនៃតុលាការកំពូលដែលប្រឆំាងនឹងធម្មនុញ្ញភាពរបស់តុលាការយោធា ចៅក្រមទំាង ១៧រូបនៃតុលាការកំពូលក៏បានចេញមុខព្យួរសេចក្តីសម្រេចចិត្តរបស់តុលាការយោធានៅថ្ងៃព្រហស្បតិ៍ ទី១៦ មេសា។ តុលាការកំពូលបានបញ្ជាក់ថា អ្នកទោសដែលកាត់ទោសដោយតុលាការយោធាមានសិទ្ធិប្តឹងឧទ្ទរណ៍។ ទន្ទឹមគ្នានេះ លោកអាស្មា យ៉ាហានយា មេធាវីដ៏មានឥទ្ធិពល និងជាសកម្មជនសិទ្ធិមនុស្សក៏បានដាក់បណ្តឹងតវ៉ាពីដំណើរការកាត់ដោយសម្ងាត់របស់តុលាការយោធា និងការវិនិច្ឆ័យទោសគ្មានតម្លាភាព។ ម្យ៉ាងទៀត លោកអាស្មាក៏បានបន្ថែមថា លោកនឹងបន្តប្រឆំាងនឹងការកាត់ទោសលើជនសង្ស័យផ្សេងទៀត ប្រសិនបើលោកគិតថាតុលាការយោធាបានរំលោភសិទ្ធិមនុស្ស។
គួររម្លឹកជូនថា សភាបានផ្តល់សុពលភាពឲ្យតុលាការយោធាមានដំណើរការរយៈពេល២ឆ្នំា។ តែគេត្រូវហ៊ានទទួលស្គាល់ថានៅក្នុងប្រទេសប៉ាគីស្ថាន យោធាត្រូវបានគេចាត់ទុកជាស្ថាប័នដែលមានអំណាចខ្លំាង ហើយអំណាចយោធា និងអំណាចស៊ីវិលបានប្រជែងកម្លំាងគ្នាជាប់ជាប្រចំា។ ក្រោយទទួលបានឯករាជ្យពីអង់គ្លេសក្នុងឆ្នំា ១៩៤៧ មក ប៉ាគីស្ថានស្គាល់តែជម្លោះផ្ទៃក្នុង និងរដ្ឋប្រហារយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ