ការបំផ្ទុះគ្រាប់ផ្ទួនៗគ្នា សម្លាប់មនុស្ស៧នាក់ នៅប្រទេសចិន
នៅភាគខាងត្បូង ប្រទេសចិន កាលពីល្ងាចថ្ងៃពុធ ទី ៣០កញ្ញា មានការផ្ទុះគ្រាប់ផ្ទួនៗគ្នា ជាច្រើនកន្លែងដែលបានបណ្តាលឲ្យមានមនុស្សស្លាប់ ៧នាក់ បាត់ខ្លួន ២នាក់ និងរបួស ជាង៥០នាក់។ នេះបើតាមតួលេខផ្តល់ដោយ ប៉ូលិសក្រុង លុយឆេង ដែលស្ថិតនៅក្នុងខេត្តស្វយ័តក្វាងស៊ី។ តាមទីភ្នាក់ងារព័ត៌មានចិនថ្មី នៅថ្ងៃតែមួយ មានករណីបំផ្ទុះគ្រាប់ជាង១៥ នៅតាមស្ថាប័ន និងកន្លែងសាធារណៈក្នុងទីក្រុងលុយឆេង។ ព្រឹត្តិការណ៍នេះកើតឡើងតែនៅមួយថ្ងៃមុន ប្រជាជនចិនរៀបចំបុណ្យជាតិដែលត្រូវចាប់ផ្តើមនៅថ្ងៃព្រហស្បតិ៍ទី ១តុលានេះ។
ចុះផ្សាយនៅថ្ងៃ៖
យោងតាមវិទ្យុជាតិចិន កញ្ចប់ឥវ៉ាន់មានបង្កៃគ្រាប់ផ្ទុះបានផ្ទុះនៅរសៀលថ្ងៃពុធ នៅតាមកន្លែងចំនួន ១៣ផ្សេងៗគ្នា ដូចជានៅផ្សារទំនើប មន្ទីរពេទ្យ ពន្ធនាគារ អគាររដ្ឋាភិបាល និងស្ថានីយ៍រថយន្តក្រុង ដែលស្ថិតនៅកណ្តាល និងជាយក្រុងលុយឆេង ក្នុងខេត្តក្វាងស៊ី ដែលស្ថិតនៅក្បែរព្រំដែនចិន ជាមួយប្រទេសវៀតណាម។ នៅថ្ងៃដដែល គេនៅបានរាយការណ៍ទៅប៉ូលិស ពីកញ្ចប់ឥវ៉ាន់ជាង៦០ ផ្សេងទៀត ដែលគេសង្ស័យថា មានបង្កប់គ្រឿងផ្ទុះ។
រូបថត ដែលគេឃើញចាក់ផ្សាយនៅតាមទូរទស្សន៍រដ្ឋចិន បានបង្ហាញពីទំហំខូចខាតដ៏ធ្ងន់ធ្ងរ ដែលបណ្តាលមកពីកម្លាំងខ្លាំងរបស់គ្រាប់ផ្ទុះ ដូចជាអគារបាក់ស្រុតចុះ គំនរអគារបាក់បែក ខ្ចរខ្ចាយទៅលើផ្លូវ ឬរថយន្តដែលប៉ើងផ្ងារជើងជាដើម។
តាមការិយាល័យស៊ើបអង្កេតបទឧក្រិដ្ឋរបស់ក្រសួងសន្តិសុខរដ្ឋចិន ដែលដកស្រង់ដោយកាសែតក្នុងស្រុកចិន នៅក្រោយហេតុការណ៍បំផ្ទុះគ្រាប់ប៉ូលិសបានឃាត់ខ្លួនជនសង្ស័យ ម្នាក់ អាយុ ៣៣ឆ្នាំ ដែលជាប្រជាជនរស់នៅក្រុងលុយឆេង។ តើការបំផ្ទុះគ្រាប់នៅច្រើនកន្លែងបែបនេះ ជាសកម្មភាពភេរវកម្ម ឬជាទង្វើធ្វើឡើងដោយជនអស់សង្ឃឹម។ តាមកាសែតក្នុងខេត្តក្វាងស៊ី អ្នកទទួលខុសត្រូវប៉ូលិសចិន បានចាត់ទុកសកម្មភាពបំផ្ទុះគ្រាប់ថា បទឧក្រិដ្ឋ ប៉ុន្តែ មិនមែនជាភេរវកម្មនោះទេ។
នៅប៉ុន្មានឆ្នាំចុងក្រោយនេះ ប្រទេសចិនឧស្សាហ៍រងការវាយប្រហារ មិនថា ដោយក្រុមប្រើកាំបិតចាក់សម្លាប់មនុស្ស អំពើភេរវកម្មសំដៅផ្សារ ឬស្ថានីយ៍រថភ្លើង។ ប្រជាជនចិនមួយចំនួនក៏ធ្លាប់ប្រើគ្រឿងផ្ទុះ វាយប្រហារទៅលើអគាររដ្ឋ ឬកន្លែងសាធារណៈ ដែលពួកគេចាត់ទុកថា ជាអ្នកធ្វើឲ្យពួកគេរងគ្រោះយ៉ាងអយុត្តិធម៌បំផុតនោះ។ ព្រឹត្តិការណ៍បំផ្ទុះគ្រាប់តាមរយៈកញ្ចប់ឥវ៉ាន់ កើតឡើង នៅមួយថ្ងៃមុនប្រជាជនចិនត្រូវឈប់សម្រាក នៅឱកាសបុណ្យជាតិ។ ១តុលា ជាថ្ងៃរំលឹកខួបកំណើតសាធារណរដ្ឋប្រជាមានិតចិន ដែលម៉ៅសេទុងបានប្រកាសបង្កើតឡើង នៅឆ្នាំ១៩៤៩។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ