ក្រុមជនបិទមុខចូលចាក់សម្លាប់ប្រជាជនចិន នៅគុនមីង
នៅស្ថានីយ៍រថភ្លើង ក្នុងខេត្តគុនមីង ដែលស្ថិតនៅភាគនិរតីប្រទេសចិន ក្រុមឧក្រិដ្ឋមួយក្រុមបានចូលចាក់សម្លាប់ក្រុមអ្នកធ្វើដំណើរ កាលពីយប់ថ្ងៃសៅរ៍ ទី ១ មីនា។ យ៉ាងហោច មនុស្ស២៩នាក់ត្រូវគេចាក់សម្លាប់ និងមនុស្សច្រើនជាង ១៣០ត្រូវរងរបួស ក្នុងការវាយប្រហារ។ អាជ្ញាធរចិនបានចាត់ទុកសកម្មភាព របស់ជនល្មើស ថា ជាភេរវកម្ម និងដែលមានក្រុមជាតិអ៊ុយហ្គួរនៅស៊ីនជាំង ជាអ្នកនៅពីក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ភាពជ្រួលច្របល់បានផ្ទុះឡើង នៅស្ថានីយ៍មួយ ក្នុង ខេត្តគុនមីង នៅពេលជនមួយក្រុម ក្នុងសំលៀកបំពាក់ខ្មៅ ពាក់ក្រណាត់បាំងមុខ បានដើរចូលចាក់ក្រុមអ្នកធ្វើដំណើរជនជាតិចិន ដែលកំពុងតំរង់ជួរទិញសំបុត្ររទេះភ្លើង នៅយប់ថ្ងៃសៅរ៍ ទី ១ មីនា។ យោងតាម ជនរងគ្រោះ និងសាក្សី ក្រុមមនុស្សអាវខ្មៅដែលកាន់កាំបិត ស វែង ដើរសំដៅចាក់សម្លាប់មនុស្ស ដោយមិនរើសមុខ។
តាមទីភ្នាក់ងារព័ត៌មានចិនថ្មី មនុស្ស២៩នាក់បានស្លាប់នៅក្នុងថ្លុកឈាម ចំណែក មនុស្សជាង១៣០នាក់រងរបួស និងត្រូវគេបញ្ជូនទៅព្យាបាលនៅមន្ទីរពេទ្យ។ នៅកន្លែងកើតហេតុ ប៉ូលិសបានបាញ់សម្លាប់ជនឧក្រិដ្ឋបួននាក់។ ភ្លាមៗ ប៉ូលិសចិនបានចោទ ទម្លាក់កំហុសព្រឹត្តិការណ៍នៅយប់ថ្ងៃសៅរ៍ ថា ជាស្នាដៃរបស់ក្រុមបំបែកខ្លួនអ៊ុយហ្គួរនៅខេត្តស៊ីនជាំង។
ប្រជាជនអ៊ុយហ្គួរបានអះអាងថា ខ្លួនរងគ្រោះដោយសារអាជ្ញាធរចិន ដែលកំពុងដើរនយោបាយបង្រ្កាប បិទសិទ្ធិទាំងទៅលើវប្បធម៌ និងសាសនារបស់ជនជាតិអ៊ុយហ្គួរ។ ចាប់តាំងពី មានអំពើហិង្សា សម្លាប់មនុស្ស១៩៧នាក់ នៅស៊ីនជាំង កាលពីឆ្នាំ ២០០៩ ជនជាតិភាគតិចអ៊ុយហ្គួរត្រូវអាជ្ញាធរចិន ដៅជាមុខសញ្ញា និងតែងតែចោទប្រកាន់ទៅលើពួកគេ ពីបទបង្កអំពើភេរវកម្ម និងអំពើហិង្សា នៅខេត្តស៊ីនជាំង។
កាលពីខែតុលាកន្លងទៅ ប៉ូលិសបានចោទក្រុមអ៊ុយហ្គួរជ្រុលនិយមថា ជាអ្នកបង្កអំពើភេរវកម្ម នៅទីក្រុងប៉េកាំង ដែលកាលណោះបានបំផ្ទុះរថយន្ត និងសម្លាប់មនុស្ស២នាក់ និងរបួស ៤០នាក់ នៅទីលានធានអានមេន។
ទីភ្នាក់ងារព័ត៌មានចិនថ្មីវិញ បានដកស្រង់សំដីរបស់អាជ្ញាធរដែលបានចាត់ទុកអំពើហិង្សាកាលពីថ្ងៃម្សិលមិញថា ជាការវាយប្រហារភេរវកម្ម ដែលធ្វើឡើង និងរៀបចំ ទុកមុន ដោយក្រុមជនប្រដាប់អាវុធមិនស្គាល់មុខ។
ព្រឹត្តិការណ៍ចាក់សម្លាប់មនុស្ស នៅខេត្តគុនមីង កើតឡើង តែនៅពីរថ្ងៃមុននៃការបើកសម័យប្រជុំពេញអង្គប្រចាំឆ្នាំរបស់សភាចិន ដែលត្រូវបើកធ្វើនៅថ្ងៃទី ចន្ទស្អែក។ លោកប្រធានាធិបតីចិន ស៊ី ជីនពីង បានអំពាវនាវឲ្យអាជ្ញាធរបង្កើន ការងារទ្វេ ក្នុងការស៊ើបអង្កេតទៅលើការសម្លាប់មនុស្ស នៅគុនមីង ដើម្បីស្វែងរកចាប់ក្រុមជនដៃដល់យកមកថ្កោលទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ