ពុទ្ធសាសនិកថៃជួយគាំទ្រព្រះសង្ឃជាតិនិយមជ្រុលភូមា
សមាគមពុទ្ធសាសនាមួយ ក្នុងប្រទេសថៃប្រកាស ផ្តល់ជំនួយ គាំទ្រ បណ្តាញព្រះសង្ឃនៅភូមា ដើម្បីការពារព្រះពុទ្ធសាសនា។ សមាគមជាតិថៃ ដែលមានឈ្មោះ ថា ពុទ្ធសាសនាថៃ និងប្រព័ន្ធផ្សព្វផ្សាយវប្បធម៌ បាននិយាយ ប្រាប់ទីភ្នាក់ងារព័ត៌មានបារាំង AFP កាលពីថ្ងៃពុធ ទី ២៤មិថុនា ថា សមាគមនឹងជួយដំឡើង ស្ថានីយ៍វិទ្យុមួយ ឲ្យចលនាម៉ា បា ថា ដែលជាចលនាព្រះសង្ឃជាតិនិយមជ្រុល ប្រឆាំងជនជាតិអ៊ីស្លាម ក្នុងទឹកដីភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
សមាគមពុទ្ធសាសនាជាតិ និងប្រព័ន្ធផ្សព្វផ្សាយវប្បធម៌ថៃ ដែលមានជំនាញខាងផលិតកម្មវិធីពុទ្ធសាសនា តាម វិទ្យុ និងទូរទស្សន៍ ថៃ បានប្រកាសថា ខ្លួននឹងផ្តល់ឧបករណ៍ ដែលមានតម្លៃ ៤៤ ០០០ដុល្លារ សម្រាប់ដំឡើងស្ថានីយ៍វិទ្យុ មួយ ឲ្យក្រុមព្រះសង្ឃភូមា។ សម្រាប់ លោក វុទ្ធីសាន ប៉ាណារ៉េ អនុប្រធានសមាគមដែលបានធ្វើដំណើរទៅចូលរួម នៅក្នុងសន្និសីទ ដែលរៀបចំដោយចលនាព្រះសង្ឃ ជាតិនិយមជ្រុលភូមា កាលពីចុងសប្តាហ៍មុន ក្នុងទីក្រុងរ៉ង់ហ្គូន វិទ្យុដើរតួនាទីសំខាន់ ក្នុងការជួយផ្សព្វផ្សាយពុទ្ធសាសនាក្នុងប្រទេសថៃ។ ដូច្នេះ វិទ្យុនឹងអាចជួយព្រះសង្ឃភូមា ឲ្យផ្សព្វផ្សាយបានយ៉ាងប្រសិទ្ធិភាពសាររបស់ខ្លួន ទៅកាន់អ្នកកាន់ពុទ្ធសាសនានៅក្នុងប្រទេសភូមា។
ចលនាម៉ា បា ថា ដែលសមាគមថៃសន្យា ជួយដំឡើងវិទ្យុ គឺជាក្រុមពុទ្ធសាសនិកជាតិនិយមជ្រុល ដែលបានផ្តើមចលនាប្រឆាំងនឹងអ្នកកាន់សាសនាអ៊ីស្លាម ជាពិសេសប្រជាជនភាគតិចរ៉ូហ៊ីងយ៉ា នៅរដ្ឋរ៉ាគីន។ ក្រុមព្រះសង្ឃភូមា ធ្លាប់បានស្រែកអំពាវនាវឲ្យប្រជាជនភូមាធ្វើពហិកា លែងទិញគ្រឿងទំនិញ នៅហាងរបស់ប្រជាជនអ៊ីស្លាម នៅ ភូមា។ ថ្មីៗនេះទៀត ក្រុមនេះ ធ្លាប់បានដើរក្បួនធ្វើបាតុកម្ម ប្រឆាំងមិនឲ្យរដ្ឋាភិបាលជួយសង្រ្គោះ ក្រុមរ៉ូហ៊ីងយ៉ា ដែលត្រូវបានរត់តាមទូក ដើម្បីគេចចេញពីការធ្វើទុក្ខបុកម្នេញរបស់អាជ្ញាធរ និងក្រុមពុទ្ធសាសនិកភូមា។
សម្រាប់ប្រធានសមាគមយុវពុទ្ធសាសនិកពិភពលោក ប្រចាំក្រុងបាងកក លោកផនឆៃ ពិនយ៉ាពុង ដែលបានទៅចូលរួមនៅក្នុងសន្និសីទ ក្នុងក្រុងរ៉ង់ហ្គូន ចលនាម៉ា បា ថា មិនមែនជាក្រុមព្រះសង្ឃស្អប់អ្នកកាន់សាសនាអ៊ីស្លាមទេ។ បើតាមលោក ព្រះសង្ឃភូមា នឹងមិនប្រើវិទ្យុដើម្បីផ្សព្វផ្សាយ លើកទឹកចិត្តឲ្យគេទៅដុត ឬសម្លាប់ជនជាតិអ៊ីស្លាមទេ។ ព្រះសង្ឃភូមាមានបំណងចង់ការពារពុទ្ធសាសនាដើម្បីមនុស្សជំនាន់ក្រោយតែប៉ុណ្ណោះ។
ប្រទេសថៃ មានអ្នកកាន់ពុទ្ធសាសនាច្រើន មិនចាញ់ភូមា ដែលមានប្រជាជនជឿ គោរពពុទ្ធសាសនា ៩០ភាគរយ ក្នុងពេលដែល ៤ភាគរយនៃប្រជាជនកាន់សាសនាអ៊ីស្លាម។ ខុសពីពុទ្ធសាសនិក ភូមា ដែលដើរតួនាទីសំខាន់ក្នុងនយោបាយ និងចេញមុខបង្កជម្លោះហិង្សា សម្លាប់មនុស្ស ជាមួយជនជាតិរ៉ូហ៊ីងយ៉ា កាលពីឆ្នាំ ២០១២ ពុទ្ធសាសនិកថៃ មិនសូវមានជំហរតឹងរ៉ឹងខ្លាំងជាមួយអ្នកកាន់សាសនាអ៊ីស្លាម។ ព្រះសង្ឃ ត្រូវជួយព្រះសង្ឃគ្នាឯង ដើម្បីការពារពុទ្ធសាសនា។ សម្រាប់អ្នកតំណាងពុទ្ធសាសនាថៃ ស្ថានភាពរបស់ពុទ្ធសាសនិកនៅរដ្ឋរ៉ាគីន មិនខុសពីស្ថានភាពរបស់ក្រុមពុទ្ធសាសនិកថៃ នៅភាគខាងត្បូងប្រទេសនោះទេ។ ប៉ុន្តែ អ្នកតំណាងពុទ្ធសាសនាថៃ ភ្លេចគិតថា នៅភាគខាងត្បូង គឺក្រុមអ៊ីស្លាមជ្រុលនិយម ដែលបង្កហិង្សា គំរាមកំហែង ទៅលើអ្នកកាន់ពុទ្ធសាសនា ចំណែកនៅភូមា គឺក្រុមពុទ្ធសាសនិកដែលធ្វើបាបក្រុមអ៊ីស្លាម រ៉ូហ៊ីងយ៉ា រហូតត្រូវរត់ខ្ចាត់ខ្ចាយ ទៅនៅជំរំជនភៀសខ្លួន ក៏រខេករខាក ក្នុងប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ