កងទ័ពចាប់បោសសម្អាតក្រុមអ្នកគាំទ្រលោកថាក់ស៊ីន ក្នុងជួរប៉ូលិស
ប្រធានប៉ូលិសថ្មីរបស់ថៃ លោកសមយុទ្ធ ប៉ុនប៉ាន់មួង បានសន្យាកសាងកេរ្តិ៍ឈ្មោះរបស់ប៉ូលិសជាតិឡើងវិញ ដែលធ្លាប់ជាប់ប្រលាក់ប្រឡូសក្នុងរឿងពុករលួយ ប៉ុន្តែ អ្នកជំនាញជាច្រើនមើលឃើញថា មេប៉ូលិសថ្មីរបស់ថៃ កំពុងផ្តើមនយោបាយបោសសម្អាតក្រុមប៉ូលិស ដែលជាបក្សពួករបស់ថាក់ស៊ីន ស៊ីណាវ៉ាត។
ចុះផ្សាយនៅថ្ងៃ៖
ស្តាប់ - ០២:១២
នៅថ្ងៃទី ១៧មេសា លោកប្រាយុទ្ធ ចាន់អូចា មេដឹកនាំរបបសឹកថៃ បានប្រារព្ធខួប៦ខែ នៃការចូលកាន់អំណាចជានាយករដ្ឋមន្រ្តីថៃ នៅក្រោយ រដ្ឋប្រហារផ្តួលរំលំរដ្ឋាភិបាលរបស់ លោកស្រី យីងឡាក់ ប្អូនស្រីរបស់លោកថាក់ស៊ីន។ នៅឱកាសនេះ លោកបានប្រកាសផ្តល់សិទ្ធិ និងជំនឿទុកចិត្តដោយគ្មានការសង្ស័យ ទៅលើមេប៉ូលិសជាតិដើម្បីប្រយុទ្ធប្រឆាំងអំពើពុករលួយក្នុងជួរប៉ូលិសថៃ។ លោកប្រាយុទ្ធ ចាន់អូចាត្រូវបញ្ជាក់ជំហររបស់លោក នៅក្នុងពេលដែលមានពាក្យចចាមអារ៉ាមដែលថា ទាហានកំពុងបោសសម្អាតក្នុងជួរប៉ូលិសថៃ។
លោកសមយុទ្ធ ប៉ុនប៉ាន់មួង ដែលត្រូវបានលោកប្រាយុទ្ធចាន់ អូចាតែងតាំងកាលពីខែសីហាឆ្នាំ២០១៤ បានសន្យាបោសសម្អាតពុករលួយ ក្នុងជួរប៉ូលិស ដើម្បីកសាងកេរ្តិ៍ឈ្មោះល្អឡើងវិញ របស់ប៉ូលិស នៅក្នុងក្រសែភ្នែករបស់ប្រជាជនថៃ។ តាមលោកសមយុទ្ធ មន្រ្តីប៉ូលិសថៃមួយចំនួនធ្វើការឲ្យអ្នកនយោបាយ ដើម្បីបានទទួលលាភសក្តារៈ និងបុណ្យសក្តិ។ ដូច្នេះ ជាមួយនឹងវិធានការថ្មី លោកចង់រំដោះប៉ូលិសឲ្យចេញផុតពីអន្ទាក់តណ្ហាទំាងនោះ។
សម្រាប់អ្នកតាមដាននយោបាយថៃ នៅសំបកក្រៅ មេប៉ូលិសជាតិ អះអាង ពីវិធានការបោសសម្អាតអំពើពុករលួយក្នុងជួរប៉ូលិស ប៉ុន្តែ តាមពិតនេះជាគោលដៅមួយរបស់យោធា ដែលចង់កាត់បន្ថយឥទ្ធិពលរបស់លោកថាក់ស៊ីន មិនថា នៅក្នុងឆាកនយោបាយ និងជួរប៉ូលិស ព្រោះថា ប៉ូលិស ថៃជាច្រើននៅតែគាំទ្រ ស្មោះស័្មគ្រនឹងលោកថាក់ស៊ីននៅឡើយ។ តាមប្រធានវិទ្យាស្ថាន កិច្ចការអាស៊ី អាគ្នេយ៍ ដែលមានទីតាំងនៅឈៀងម៉ៃ បេសកកម្មរបស់មេប៉ូលិសថៃ ថ្មី គឺធ្វើយ៉ាងណាឲ្យស្ថាប័នប៉ូលិសបន្តិចម្តងៗ ស្ថិតនៅក្រោមការកាន់កាប់ទាំងស្រុងរបស់កងទ័ព។
សូមបញ្ជាក់ថា នៅប្រទេសថៃ ទាំងប៉ូលិស និងកងទ័ពមានទំនាក់ទំនងយ៉ាងជិតស្និទ្ធជាមួយនយោបាយ និងព្រះរាជវាំង។ រហូតមក កងទ័ពមានប្រភពចេញមកពីក្រុមដែលស្និទ្ធនឹងព្រះមហាក្សត្រ ក្នុងពេលដែលប៉ូលិសជាតិថៃ ប្រែប្រួល ពណ៌សំបុរ ទៅតាមការផ្លាស់ប្តូររបស់ថ្នាក់ដឹកនាំរដ្ឋាភិបាល។ ក្នុងរយៈពេល២ទសវត្សរ៍ ចុងក្រោយនេះ ប៉ូលិសថៃបានបង្កើន អំណាច កើបប្រមូលទ្រព្យសម្បត្តិ និងកេរ្តិ៍ឈ្មោះ ចាប់តាំងពីលោកថាក់ស៊ីន អតីតមេប៉ូលិសថៃ បានជាប់ឆ្នោត ក្លាយជានាយករដ្ឋមន្រ្តីថៃ នៅឆ្នាំ ២០០១។ គេជឿថា នៅក្នុងអំណាចរបស់ខ្លួន លោកថាក់ស៊ីន បានលើកបន្តុបក្រុមអ្នកគាំទ្រ ក្នុងជួរដឹកនាំរបស់ប៉ូលិស។ ប៉ូលិសថៃ ភាគច្រើនបានរងការចោទប្រកាន់ថា បានប្រព្រឹត្តអំពើពុករលួយ ដើម្បីកសាងភាពមានបាន និងបានប្រើលុយអូសទាញម្ចាស់សំឡេងឆ្នោត ដូចជានៅតំបន់ភាគខាងជើងជាដើម ដែលជាសំបុកអ្នកគាំទ្ររបស់លោកថាក់ស៊ីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ