វៀតណាមបញ្ចុះថ្លៃលុយដុងដើម្បីជំរុញកំណើនសេដ្ឋកិច្ច
ធនាគារកណ្តាលវៀតណាមបានប្រកាសឲ្យដឹង នៅថ្ងៃព្រហស្បតិ៍នេះថា ខ្លួននឹងបញ្ចុះតម្លៃលុយដុងបន្ថែមទៀត ដើម្បីជំរុញកំណើនសេដ្ឋកិច្ច។ ចាប់តាំងពីដើមឆ្នាំ២០១៥នេះមក នេះគឺជាលើកទី២ហើយ ដែលធនាគារកណ្តាលវៀតណាមសម្រេចបញ្ចុះតម្លៃរូបិយប័ណ្ណរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៥១
តាមរយៈសេចក្តីថ្លែងការណ៍ចេញផ្សាយ នៅថ្ងៃព្រហស្បតិ៍នេះ ធនាគារកណ្តាលវៀតណាមបានឲ្យដឹងថា លុយដុងនឹងត្រូវបញ្ចុះតម្លៃ ១% ធៀបនឹងដុល្លារអាមេរិក គឺបញ្ចុះអត្រាប្តូរប្រាក់គោលឲ្យមកនៅត្រឹម ២១ ៦៧៣ដុង ក្នុងមួយដុល្លារ។ ធនាគារកណ្តាលវៀតណាមក៏បានបញ្ជាក់ឲ្យដឹងផងដែរថា ការបញ្ចុះតម្លៃលុយដុងនេះ គឺ “ដើម្បីសម្របខ្លួនទៅតាមការវិវឌ្ឍនៃទីផ្សារអន្តរជាតិ”។
គួររំឭកឡើងវិញថា វៀតណាមបានបញ្ចុះតម្លៃលុយដុងម្តងរួចមកហើយ កាលពីខែមករាកន្លងទៅថ្មីៗនេះ ហើយការបញ្ចុះតម្លៃលុយដុងពីរលើកជាប់ៗគ្នានេះ គឺធ្វើឡើងក្នុងគោលដៅជំរុញវិស័យនាំចេញរបស់វៀតណាម ពីព្រោះថា នៅពេលដែលលុយដុងមានតម្លៃថោក ថ្លៃផលិតក្នុងស្រុកក៏មានកម្រិតទាប ដែលធ្វើឲ្យទំនិញដែលផលិតនៅវៀតណាម ជាពិសេស ផលិតផលក្នុងវិស័យកាត់ដេរ និងគ្រឿងអេឡិចត្រូនិច ងាយស្រួលក្នុងការប្រកួតប្រជែងនៅលើទីផ្សារអន្តរជាតិ។
គេនៅចាំបានថា កាលពីឆ្នាំ២០១៤កន្លងទៅនេះ គឺការកើនឡើងនៃវិស័យនាំចេញនេះហើយ ដែលបានជួយឲ្យសេដ្ឋកិច្ចវៀតណាមមានអត្រាកំណើនរហូតដល់ទៅ ៥,៩៨% ដែលជាអត្រាមួយខ្ពស់ធៀបនឹងរយៈពេល៣ឆ្នាំមុន។ នៅឆ្នាំ២០១៥នេះ រដ្ឋាភិបាលក្រុងហាណូយបានកំណត់គោលដៅ ចង់ឲ្យសេដ្ឋកិច្ចមានកំណើនរហូតដល់ ៦,២% ក៏ប៉ុន្តែ នៅក្នុងរយៈពេល៤ខែ ដើមឆ្នាំ២០១៥នេះ ជញ្ជីងពាណិជ្ជកម្មក្រៅប្រទេសរបស់វៀតណាមមានឧនភាព (ការនាំចេញតិចជាងការនាំចូល) រហូតដល់ទៅ ៣ពាន់លានដុល្លារអាមេរិក បើប្រៀបធៀបនឹងរយៈពេល៤ខែ កាលពីឆ្នាំ២០១៤កន្លងទៅ វៀតណាមនាំទំនិញចេញច្រើនជាងនាំចូលរហូតដល់ទៅ ២ពាន់លានដុល្លារ។
អ្នកជំនាញខាងសេដ្ឋកិច្ចជាច្រើនមើលឃើញថា នៅក្នុងពេលបច្ចុប្បន្ននេះ សេដ្ឋកិច្ចវៀតណាមកំពុងប្រឈមមុខនឹងបញ្ហាធំៗពីរ គឺភាពកម្សោយនៃវិស័យធនាគារ និងចំនួនច្រើនលើសលុបនៃសហគ្រាសរដ្ឋ ដែលភាគច្រើនគ្រប់គ្រងមិនបានល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ