ប្រមុខក្រសួងស៊ើបការណ៍សម្ងាត់ប៉ាគីស្ថានទៅទស្សនកិច្ចនៅអាមេរិក
ប្រមុខក្រសួងស៊ើបការណ៍សម្ងាត់នៅប្រទេសប៉ាគីស្ថានឧត្តមសេនីយ Rizwan Akhtar កំពុងបំពេញទស្សនកិច្ចផ្លូវការនៅសហរដ្ឋអាមេរិក។ ទស្សនកិច្ចរបស់ប្រមុខក្រសួងស៊ើបការណ៍សម្ងាត់ប៉ាគីស្ថាននៅអាមេរិកពេលនេះបានធ្វើឡើង ចំពេលដែលមានពាក្យចចាមអារ៉ាមស្តីពីជំនួបជាយថាហេតុរវាងពួកឧទ្ទាមតាលីបង់នៅអាហ្វហ្កានីស្ថាន និងមន្រ្តីរដ្ឋបាលអាមេរិក។ គួរជម្រាបជូនថា ប្រមុខក្រសួងស៊ើបការណ៍សម្ងាត់ប៉ាគីស្ថានត្រូវបានគេចាត់ទុកស្គាល់ថា ជាតួអង្គម្នាក់យ៉ាងសំខាន់មិនអាចខ្វះបានសម្រាប់ស្ថិរភាពនៅក្នុងប្រទេសអាហ្វហ្កានីស្ថានក្បែរខាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
តំាងពីបានឡើងកាន់តំណែងជាប្រមុខក្រសួងស៊ើបការណ៍សម្ងាត់ប៉ាគីស្ថានក្នុងខែវិច្ឆិកា ឆ្នំា ២០១៤ មក នេះជាលើកទី១ ដែលរូបឧត្តមសេនីយ Rizwan Akhtar បានទៅបំពេញទស្សនកិច្ចផ្លូវការនៅសហរដ្ឋអាមេរិក។ នៅក្នុងដំណើរទស្សនកិច្ចនោះ លោក Akhtar ជួបជាមួយសមភាគីអាមេរិក និងជជែកពីព័ត៌មានសម្ងាត់ផ្សេងៗ។ ទស្សនកិច្ចរបស់ឧត្តមសេនីយ Rizwan Akhtar នៅអាមេរិកពេលនេះបានធ្វើឡើង ប៉ុន្មានថ្ងៃ ក្រោយពីទស្សនកិច្ចរបស់រដ្ឋមន្រ្តីការពារជាតិអាមេរិកថ្មីលោក Ashton Cater នៅក្នុងប្រទេសអាហ្វហ្កានីស្ថាន។ នាឱកាសទស្សនកិច្ចក្នុងទីក្រុងកាប៊ូល លោក Carter បានលើកឡើងពីលទ្ធភាពនៃការប្តូរកាលបរិច្ឆេទនៃការដកទ័ពអាមេរិកំាងចេញពីទឹកដីអាហ្វហ្កានីស្ថាន។
តាមគម្រោង ទ័ពអាមេរិកំាងទំាង ១០ ០០០នាក់ដែលកំពុងមានវត្តមាននៅអាហ្វហ្កានីស្ថានសព្វថ្ងៃនឹងត្រូវកាត់បន្ថយមកនៅត្រឹម ៥ ០០០នាក់ចាប់ពីពេលនេះដល់ចុងឆ្នំា ២០១៥ និងត្រូវដកចេញឲ្យអស់នៅមុនឆ្នំា ២០១៦ ពោលឆ្នំាដែលលោកអូបាម៉ាបញ្ចប់អាណត្តិប្រធានាធិបតីអាមេរិក។ តែទីក្រុងវ៉ាស៊ីនតោនធ្លាប់បានបង្ហើបឲ្យដឹងពីការពន្យារពេល និងការរក្សាទុកទ័ពអាមេរិកំាងបន្ថែមចំនួន ១ ០០០នាក់នៅមុនដំណាច់ឆ្នំា ២០១៥ នេះ។ ការដកទ័ពអាមេរិកំាងចេញពីទឹកដីអាហ្វហ្កានីស្ថាន និងសន្តិសុខទូទៅនៅក្នុងតំបន់ក៏អាចជាប្រធានបទចម្បងនៃទស្សនកិច្ចរបស់ប្រមុខក្រសួងស៊ើបការណ៍សម្ងាត់ប៉ាគីស្ថានឧត្តមសេនីយ Rizwan Akhtar នៅអាមេរិកពេលនេះដែរ។
ទន្ទឹមគ្នានេះ ព័ត៌មានស្តីពីជំនួបជាយថាហេតុរវាងពួកតាលីបង់ជាមួយរដ្ឋាភិបាលអាហ្វហ្កានីស្ថាន និងអាមេរិក ដោយមានជំនួយពីប៉ាគីស្ថានក៏អាចជាប្រធានបទសំខាន់មួយដែរ។ កាលពីសប្តាហ៍កន្លងទៅ មន្រ្តីតាលីបង់បានលើកឡើងពីជំនួបជាមួយអាមេរិកនៅថ្ងៃខាងមុខក្នុងប្រទេសកាតារដើម្បីនិយាយពីសន្តិភាពក្នុងប្រទេសអាហ្វហ្កានីស្ថាន និងដែលប្រមុខរដ្ឋាភិបាលអាហ្វហ្កានីស្ថានក៏មានចំណាប់អារម្មណ៍ដូចគ្នាដែរ។ គួរជម្រាបជូនថា ប៉ាគីស្ថានដែលធ្លាប់មានទំនាក់ទំនងជាប្រវត្តិសាស្រ្តជាមួយពួកតាលីបង់អាចនឹងដើរតួនាទីសម្របសម្រួលនៅក្នុងដំណើរស្វែងរកសន្តិភាពឲ្យប្រទេសអាហ្វហ្កានីស្ថានក្បែរខាងខ្លួនដែលបានញំាញីដោយសង្រ្គាមស៊ីវិលជាង ១៣ឆ្នំាមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ