ប្រមុខការទូតអាមេរិកទៅប៉ាគីស្ថានដើម្បីពង្រឹងកិច្ចសហប្រតិបត្តិការប្រឆំាងនឹងភេរវនិយម
លោកប្រមុខការទូតអាមេរិកចន ឃែរីបានទៅបំពេញទស្សនកិច្ចក្នុងប្រទេសប៉ាគីស្ថានកាលពីថ្ងៃរសៀលថ្ងៃចន្ទ ទី១២ មករា។ ទស្សនកិច្ចមិនបានព្រៀងទុកនេះមានគោលដៅពង្រឹងកិច្ចសហប្រតិបត្តិការប្រឆំាងនឹងភេរវនិយមរវាងទីក្រុងវ៉ាស៊ីនតោន និងអ៊ីស្លាម៉ាបាត។ មួយវិញទៀត ទស្សនកិច្ចរបស់លោកចន ឃែរីនៅប៉ាគីស្ថានពេលនេះបានធ្វើឡើង ជិត ១ខែ ក្រោយពីពួកឧទ្ទាមតាលីបង់បានបើកការវាយប្រហារលើសាលារៀនមួយក្នុងទីក្រុងប៉េស្ហាវ៉ាដោយបានផ្តាច់ជីវិតមនុស្ស ១៥០នាក់ ភាគច្រើនជាសិស្សសាលា។
ចុះផ្សាយនៅថ្ងៃ៖
ស្តាប់ - ០២:០២
គឺចេញពីប្រទេសឥណ្ឌាដែលលោកប្រមុខការទូតអាមេរិកចន ឃែរីបានឈានចូលប្រទេសប៉ាគីស្ថានដោយគ្មានការគ្រោងទុកជាមុន។ មន្រ្តីជាន់ខ្ពស់នៃក្រសួងការបរទេសអាមេរិកបានប្រាប់ឲ្យដឹងថា ប្រធានបទសំខាន់ដែលលោកឃែរីលើកយកទៅជជែកជាមួយថ្នាក់ដឹកនំាប៉ាគីស្ថាន គឺយុទ្ធនាការរួមគ្នាដើម្បីប្រឆំាងនឹងពួកជ្រុលនិយម ហើយវត្តមានរបស់លោកឃែរីពេលនេះក៏ដើម្បីធ្វើជាអធិបតីនៅក្នុងកិច្ចចរចាយុទ្ធសាស្រ្តរវាងប្រទេសទំាងពីរដែរ។ គួរជម្រាបជូនថា ទីក្រុងវ៉ាស៊ីនតោន និងអ៊ីស្លាម៉ាបាតកំពុងមានទំនាក់ទំនងមិនសូវជាល្អប៉ុន្មានទេ នេះក៏ដោយសារថា អាមេរិកតែងតែចោទប៉ាគីស្ថានថា ជាប្រទេសមុខពីរនៅក្នុងសង្រ្គាមប្រយុទ្ធប្រឆំាងនឹងភេរវនិយម។ នៅម្ខាង រដ្ឋអំណាចប៉ាគីស្ថានបានគំាទ្រពួកតាលីបង់នៅក្នុងប្រទេសអាហ្វហ្កានីស្ថានដែលខ្លួនគិតថា ជាពួកកណ្តាលនិយម រីឯនៅម្ខាងទៀត រដ្ឋអំណាចបាន និងកំពុងប្រើកណ្តាប់ដៃដែកវាយប្រហារលើពួកតាលីបង់ដែលកំពុងប្រឆំាងខ្លួន។
តែរូបមន្រ្តីជាន់ខ្ពស់នៃក្រសួងការបរទេសអាមេរិកដដែលបានបញ្ជាក់ថា គេត្រូវតែនិយាយពីការកំចាត់ពួកជ្រុលនិយមទំាងអស់ ដោយគ្មានការបែងចែកឡើយ និងបន្ថែមថា អាមេរិកបានជម្រុញឲ្យប៉ាគីស្ថានប្រឹងប្រែងបន្ថែមទៀតនៅក្នុងយុទ្ធនាការប្រឆំាងនឹងភេរវនិយម។ យ៉ាងណាក៏ដោយ មន្រ្តីការទូតអាមេរិកំាងបានយល់ឃើញថា ក្រោយពីមានមហាភេរវកម្មនៅក្នុងទីក្រុងប៉េស្ហាវ៉ាកាលពីពាក់កណ្តាលខែធ្នូ ឆ្នំា ២០១៤ មក រដ្ឋាភិបាលប៉ាគីស្ថានបានដឹងខ្លួនឯងថា តើត្រូវបញ្ចេញប្រតិកម្មតបវិញយ៉ាងម៉េចហើយ។
គួរជម្រាបជូនថា គឺដោយសារតែមានការដាក់គំនាបខ្លំាងពីអាមេរិកអស់ជាច្រើនឆ្នំាមកទេដែលកងទ័ពប៉ាគីស្ថានបានវាយប្រហារបំបែកសំបុកពួកឧទ្ទាមតាលីបង់នៅវ៉ាហ្ស៊ីរីស្ថានខាងជើងដែលជាតំបន់កុលសម្ព័ន្ធជាប់ព្រំដែនជាមួយប្រទេសអាហ្វហ្កានីស្ថាន។ តែពួកឧទ្ទាមបានសងសឹកវិញដោយបាញ់ប្រហារលើសាលារៀនមួយក្នុងទីក្រុងប៉េស្ហាវ៉ាកាលពីថ្ងៃទី១៦ ធ្នូ ២០១៤ ដោយបណ្តាលឲ្យស្លាប់មនុស្ស ១៥០នាក់ ភាគច្រើនជាសិស្សសាលា។ សាលារៀនសម្រាប់កូនៗរបស់ទាហានមួយនេះបានបើកទ្វារជាថ្មីនៅថ្ងៃទី១២ មករា ចំថ្ងៃទស្សនកិច្ចរបស់លោកប្រមុខការទូតអាមេរិកចន ឃែរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ