មនុស្សស្រីដែលមានប្រាក់រាប់ពាន់លានដុល្លារ មានចំនួនកើនឡើងលឿនជាងមនុស្សប្រុស
សេដ្ឋីនីមានចំនួនតិច នៅក្នុងពិភពលោក ប៉ុន្តែ ចំនួននេះកំពុងកើនឡើង លឿនជាងចំនួនមនុស្សប្រុស ដែលមានប្រាក់រាប់ពាន់លានដុល្លារ។ យោងតាម ការសិក្សា ស្រាវជ្រាវរបស់ធនាគារស្វ៊ីស UBS និង PWC ចេញផ្សាយ កាលពីថ្ងៃអង្គារម្សិលមិញ នៅអាស៊ី តំណែងជាប្រធានក្រុមហ៊ុន និងស្ថាប័នជំនួញធំៗបានរុញមនុស្សស្រីឲ្យក្លាយខ្លួន ជាសេដ្ឋីនី មានទ្រព្យសម្បត្តិច្រើនជាង ១ពាន់លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
មនុស្សប្រុសនៅតែនាំមុខ ក្នុងនាមជាមហាសេដ្ឋី ដែលមានប្រាក់ច្រើនជាង១ពាន់លានដុល្លារ។ បច្ចុប្បន្ននេះ មនុស្សប្រុសដែលមានលុយច្រើនជាង១ពាន់លានដុល្លារ មានចំនួន ១២០២នាក់ ក្នុងពេលដែលមនុស្សស្រីវិញ មានចំនួនតែ ១៤៥នាក់តែប៉ុណ្ណោះ។ ចំនួនសេដ្ឋីនីតិចមែន ប៉ុន្តែ ចំនួនវិញ គឺកើនឡើងលឿន គឺប្រមាណ៦,៦ ក្នុងរយៈពេល ២០ឆ្នាំចុងក្រោយនេះ ចំណែកចំនួនមនុស្សប្រុសវិញ នៅគឺថេរប្រមាណ ៥,២តែប៉ុណ្ណោះ។ ជាក់ស្តែង ចំនួនសេដ្ឋីនី ដែលមានប្រាក់ច្រើនជាង១ពាន់លានដុល្លារ បានកើនឡើងពី២២នាក់ នៅឆ្នាំ ១៩៩៥ មកដល់ ១៤៥នាក់ នៅឆ្នាំ ២០១៤។
ការឡើងឋានៈ និងអំណាចរបស់មនុស្សស្រី នៅក្នុងក្លឹបកំពូលអ្នកមានក្នុងលោក គឺបានមកពីការកើនឡើង ចំនួន មហាសេដ្ឋីនី នៅតំបន់អាស៊ី។ តាមការរកឃើញរបស់ធនាគារ UBS ដែលមានទីតាំងក្នុងប្រទេសស៊្វ៊ីស និងដែលជំនាញខាងគ្រប់គ្រងទ្រព្យសម្បត្តិរបស់មហាសេដ្ឋីក្នុងពិភពលោក ចំនួនសេដ្ឋីនីមានប្រាក់រាប់ពាន់លានដុល្លារ កើនឡើងលឿនខ្លាំង នៅតំបន់អាស៊ី គឺពី ៣នាក់ ទៅ ២៥នៅក្នុងរយៈពេល ២០ឆ្នាំចុងក្រោយនេះ។
អ្វីដែលគួរឲ្យកត់សំគាល់គឺជាង ៥២ភាគរយ ស្រ្តីជនជាតិ អាស៊ី ដែលមានទ្រព្យសម្បត្តិច្រើនជាង ១ពាន់លានដុល្លារ គឺជាប្រធានក្រុមហ៊ុនក្នុងជំនាន់ទី១។ មានន័យថា ពួកគេទាំងនោះ បានទៅសិក្សារៀនសូត្រនៅអឺរ៉ុប និងអាមេរិក មុននឹងត្រលប់ទៅធ្វើជំនួញ នៅប្រទេសចិនវិញ។ ជាមួយនឹងអំណោយផលបានមកពីការវិវឌ្ឍផ្នែកវប្បធម៌ មហាសេដ្ឋីនីនៅអាស៊ី មិនខ្លាចនឹងចូលអង្គុយកៅអី ដឹកនាំក្រុមហ៊ុន ដែលធ្លាប់តែរក្សាទុកសម្រាប់មនុស្សប្រុសនោះទេ។ តាមអ្នកសិក្សាស្រាវជ្រាវ មហាសេដ្ឋីនីអាស៊ី ភាគច្រើន ដើរតួនាទីជាអ្នកគ្រប់គ្រងជំនួញ និងសកម្មខ្លាំង ដើម្បី ជំរុញ កំណើនមុខជំនួញរបស់ខ្លួន។ ផ្ទុយទៅវិញ នៅអឺរ៉ុប និងនៅអាមេរិក ជាង៨០ភាគរយ នៃមហាសេដ្ឋីនី មានប្រាក់រាប់ពាន់លានដុល្លារ ក៏ដោយសារបានទទួលកេរមរតកពីគ្រួសារតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ