អាស៊ីកំពុងក្លាយជាចំណុចយុទ្ធសាស្ត្ររបស់ពិភពលោកកាន់តែខ្លាំង
ចុះផ្សាយនៅថ្ងៃ៖
ស្តាប់ - ០៤:៥៦
មិនថាសហរដ្ឋាអាមេរិក សហភាពអឺរ៉ុប ឬអូស្ត្រាលីទេ ពួកមហាអំណាចដែលធ្លាប់ស្គាល់ភាពរុងរឿងខាងសេដ្ឋកិច្ច ពេលនេះ កំពុងតែដាក់ខ្លួនអោនលំទោនមករកទ្វីបអាស៊ីដើម្បីសុំឲ្យជួយអូសទាញសេដ្ឋកិច្ចរបស់ខ្លួនឲ្យងើបឡើងវិញ។ ខណៈដែលអឺរ៉ុបដង្ហោយហៅអាស៊ីឲ្យជួយស្រោចស្រង់សេដ្ឋកិច្ច រីឯអូស្ត្រាលីចង់យកអាស៊ីដើម្បីរុញសន្ទុះសេដ្ឋកិច្ចឲ្យលឿនទៅមុខនោះ សហរដ្ឋអាមេរិកឯណោះ សម្លឹងមើលអាស៊ីជាទីតាំងយុទ្ធសាស្ត្រនយោបាយជាធំ។ យ៉ាងណាក៏ដោយ ជម្លោះដែនកោះក្នុងសមុទ្រចិន និងវិបត្តិនុយក្លេអ៊ែរនៅឧបទ្វីបកូរ៉េ គឺជាចំណុចប្រឈមដ៏ធំរបស់អាស៊ី។
ភ្លាមៗក្រោយការជាប់ឆ្នោតប្រធានាធិបតីអាមេរិកជាលើកទី២ លោកបារ៉ាក់អូបាម៉ាក៏ប្រញាប់ ប្រញាល់រៀបចំដំណើរទស្សនកិច្ចមកកាន់តំបន់អាស៊ីភ្លាមដែរ។ ក្នុងខែវិច្ឆិកានេះ លោកអូបាម៉ានឹងផ្តើមទស្សនកិច្ចក្នុងប្រទេសចំនួន៣នៅអាស៊ីប៉ែកអាគ្នេយ៍ គឺកម្ពុជា ថៃ និង ទស្សនកិច្ចជាប្រវត្តិសាស្ត្រក្នុងប្រទេសមីយ៉ាន់ម៉ាដែលគេស្គាល់ថាភូមា។
តាមពិត សហរដ្ឋអាមេរិក បានបង្ហាញមហិច្ឆតាដោយឥតលាក់លៀមក្នុងរយៈពេលចុងក្រោយ នេះក្នុងការបោះដៃមកកាន់ទ្វីបអាស៊ី ជាពិសេសគឺអាស៊ីប៉ាស៊ីហ្វិកតែម្តង។ សហរដ្ឋអាមេរិកបានបង្ហាញវត្តមាននៅក្នុងជំនួបកំពូលអាស៊ាន និងអាស៊ីបូព៌ាតាំងពីឆ្នាំ ១៩៩៩ មកម្ល៉េះក្នុងរដ្ឋការរបស់លោកអូបាម៉ា។ សម្រាប់មហាអំណាចពិភពលោកមួយនេះអាស៊ីប៉ាស៊ីហ្វិក គឺជាចំណុចយុទ្ធសាស្ត្រដ៏សំខាន់ដើម្បីពង្រឹងឥទ្ធិពលសេដ្ឋកិច្ច និងជាពិសេសឥទ្ធិពលនយោបាយ ទល់នឹងមហាយក្សអាស៊ី នោះគឺចិន។
ក្រៅពីអាមេរិក អឺរ៉ុបក៏មិនបានមើលរំលងទ្វីបអាស៊ីដែរ។ នៅក្នុងកិច្ចប្រជុំកំពូលអាស៊ី-អឺរ៉ុប (ASEM ) លើកទី៩ ដែលទើបតែបិទបញ្ចប់កាលពីថ្ងៃទី៦ ខែវិច្ឆិកា នៅទីក្រុងវៀងច័ន្ទ ប្រទេសឡាវ ថ្នាក់ដឹកនាំមកពីអឺរ៉ុប ដែលកំពុងរួបរឹតដោយបញ្ហាវិបត្តិប្រាក់បំណុលសុទ្ធតែសម្តែងការទាក់ទាញប្រទេសអាស៊ីឲ្យជួយអឺរ៉ុបឲ្យមានកំណើនសេដ្ឋកិច្ចឡើងវិញ។
ជាក់ស្តែង ប្រធានាធិបតីបារាំង លោក ហ្វ្រង់ស័រ ហូឡង់ បាននិយាយដោយឥតលាក់លៀមថា វត្តមានរបស់លោកនៅក្នុងកិច្ចប្រជុំកំពូលអាស៊ី អឺរ៉ុបលើកនេះ គឺដើម្បីធានាប្រទេសអាស៊ីឲ្យមានទំនុកចិត្តលើអឺរ៉ុបឡើងវិញ។ លោកអះអាងថា វិបត្តិប្រាក់បំណុលអឺរ៉ុបជិតដោះស្រាយរួចហើយ បន្ទាប់ពីថ្នាក់ដឹកនាំអឺរ៉ុបអនុវត្តនយោបាយរក្សាស្ថិរភាពកំណើនសេដ្ឋកិច្ចរបស់ខ្លួន។
ប៉ុន្តែ ប្រមុខរដ្ឋបារាំងបានព្រមានថា ពិភពលោកទាំងមូល រួមទាំងអាស៊ីផងអាចត្រូវរងគ្រោះដោយវិបត្តិសេដ្ឋកិច្ចសកលម្តងទៀត ប្រសិនបើអាស៊ីមិនចូលរួមជួយធ្វើឲ្យមានកំណើនសេដ្ឋកិច្ចអឺរ៉ុបទេនោះ។
ម្យ៉ាងទៀត បើតាមប្រធានាធិបតីបារាំង ទ្វីបអាស៊ីធ្លាប់បានទទួលប្រយោជន៍ច្រើនណាស់មកហើយពីអឺរ៉ុប ដូច្នេះ ក្នុងកាលៈទេសៈនេះ អាស៊ីត្រូវជួយអឺរ៉ុបវិញម្តងគឺជួយលើកទឹកចិត្តផែនការសេដ្ឋកិច្ចអឺរ៉ុប តាមរយៈការបោះទុនវិនិយោគ និងការទិញផលិតផលអឺរ៉ុប។
សូមបញ្ជាក់ថា កិច្ចប្រជុំកំពូលអាស៊ី-អឺរ៉ុប (ASEM ) ត្រូវបានបង្កើតឡើងកាលពីឆ្នាំ១៩៩៦ ដែលកាលណោះមានសមាជិកតែ ២៦ ប្រទេសប៉ុណ្ណោះ។ ប៉ុន្តែ មកដល់ពេលនេះ កិច្ចប្រជុំកំពូលអាស៊ី អឺរ៉ុប មានសមាជិកដល់ទៅ ៤៨ ប្រទេស រួមទាំងដៃគូ២ផង។ នេះបញ្ជាក់ថា កិច្ចសហប្រតិបត្តិការរវាង ទ្វីបអាស៊ី និងទ្វីបអឺរ៉ុប កាន់តែស៊ីជំរៅពីមួយឆ្នាំទៅមួយឆ្នាំ។
នៅពេលដែលមហាអំណាចនៅអឺរ៉ុប និងសហរដ្ឋអាមេរិកកំពុងតែប្រជែងគ្នាដាក់ខ្លួនលំអោនកាយមកកាន់អាស៊ី អូស្ត្រាលីដែលស្ថិតនៅជ្រុងម្ខាងទៀតនៃពិភពលោក ក៏មិនអាចនៅស្ងៀមបានដែរ។ រដ្ឋាភិបាលអូស្ត្រាលីបានប្រញាប់ប្រញាល់ចេញផ្សាយជាសាធារណៈកាលពីថ្ងៃអាទិត្យកន្លងទៅ នូវផែនការយុទ្ធសាស្ត្ររបស់ខ្លួនដែលមានឈ្មោះថា“អូស្ត្រាលីក្នុងសតវត្សរ៍អាស៊ី” ។ យុទ្ធសាស្ត្រនេះមានគោលដៅទាញយកផលចំណេញពីការលូតលាស់សេដ្ឋកិច្ចក្នុងតំបន់អាស៊ីដូចគ្នាដែរ។
ខុសគ្នាបន្តិចពីអឺរ៉ុបដែលចង់ឲ្យអាស៊ីស្រោចស្រង់សេដ្ឋកិច្ចរបស់ខ្លួនឲ្យរួចផុតពីលារលិចលង់ មហិច្ឆតារបស់អូស្ត្រាលី គឺចង់ប្រើប្រាស់សក្តានុពលអាស៊ីដើម្បីបង្កើនសន្ទុះសេដ្ឋកិច្ចរបស់ខ្លួនឲ្យលឿនទៅមុខដើម្បីជាប់ឈ្មោះក្នុងចំណោមប្រទេសទាំង១០ដែលប្រជាជនមានប្រាក់ចំណូលខ្ពស់បំផុតនៅលើពិភពលោកត្រឹមឆ្នាំ២០២៥ ។
សូមបញ្ជាក់ថា ប្រទេសដែលប្រជាជនមានចំណូលខ្ពស់ក្នុងពិភពលោកសព្វថ្ងៃមានដូចជា ប្រទេសកាតា សិង្ហបុរី ហុងកុង ព្រុយណេ អារ៉ាប់រួម និងសហរដ្ឋអាមេរិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ