ចិនបង្ហាញមហិច្ឆតាវិនិយោគក្នុងឱកាសជំនួបកំពូលG៧៧+ចិន នៅបូលីវី
ជំនួបកំពូលG៧៧ បូក ចិន បើកធ្វើនៅថ្ងៃសៅរ៍នេះ នៅក្រុងសាន់តា គ្រូ ប្រទេស បូលីវី។ ជំនួបនេះ ធ្វើឡើងក្នុងឱកាសខួបទី៥០ នៃក្រុមអន្តររដ្ឋាភិបាល ដោយមានវត្តមានចូលរួមរបស់ប្រទេសជាសមាជិកចំនួន១៣៣ប្រទេស មានទិសដៅលើកតម្កើងការអភិវឌ្ឍន៍សេដ្ឋកិច្ច ពិសេសតាមរយៈកិច្ចសហប្រតិបត្តិការរវាងក្រុមប្រទេសកំពុងអភិវឌ្ឈន៍។ សម្រាប់ទិសដៅអភិវឌ្ឍន៍ទៅមុខ ចិនមានមហិច្ឆតាវិនិយោគក្នុងវិស័យឧស្សាហកម្មនៅតាមអាមេរិកឡាទីន ដោយបានចេញថវិការាប់ពាន់លានដុល្លារ សម្រាប់វិស័យចំបងៗ នៅទីនោះ ដូចជាហេដ្ឋារចនាសម្ព័ន្ធជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅប្រទេសបូលីវី ជំនួបកំពូលហ្សេ៧៧ បើកធ្វើនៅថ្ងៃសៅរ៍នេះ មានទិសដៅលើកតម្កើងការអភិវឌ្ឈន៍សេដ្ឋកិច្ច តាមរយៈកិច្ចសហប្រតិបត្តិការរវាងប្រទេសក្រីក្រកំពុងអភិវឌ្ឈន៍នានា។ ប្រធានាធិបតីចិនគ្មានវត្តមានក្នុងជំនួបកំពូលនេះទេ តែលោកនឹងចូលរួម ជំនួបកំពូលប្រទេសមានសេដ្ឋកិច្ចកំពុងលូតលាស់ខ្លាំង ដែលប្រព្រឹត្តទៅនៅប្រេស៊ីល ពាក់កណ្តាលខែក្រោយនេះ។
យោងតាមលោក ហ្កាប្រ៊ីយែល ដាប់ឌុប ប្រធានសហព័ន្ធនិយោជកសាន់តា គ្រូស នៅបូលីវី ក្រៅពីការទិញវត្ថុធាតុដើម នៅអាមេរិកឡាទីន រដ្ឋាភិបាលចិនក៏ចង់ធ្វើការវិនិយោគផ្នែកឧស្សាហកម្មនៅតាមបណ្តាប្រទេសអាមេរិកខាងត្បូងផងដែរ។
ចិនចាប់អារម្មណ៍លើគម្រោងឧស្សាហកម្មនៅបូលីវី សម្រាប់១០ឆ្នាំ ទៅមុខ ជាគម្រោងតម្លៃ៤២ពាន់លានដុល្លារ។ ក្រុមហ៊ុនចិនចង់សាងសង់ផ្លូវអយស្ម័យយាន ចេញពីបូលីវី ទៅប្រទេសប្រេស៊ីល ដោយភ្ជាប់មហាសមុទ្រអាត្លង់ទិក ទៅនឹងមហាសមុទ្រប៉ាស៊ីហ្វិក។ ក្រុមហ៊ុនចិនក៏ចង់សាងសង់ផ្លូវថ្នល់ និងអនុវត្តន៍គម្រោងផ្សេងៗ តាមទន្លេផងដែរ។ គួររំលឹកថា បូលីវីជាប្រទេសក្រីក្រជាងគេនៅអាមេរិកខាងត្បូង។ ប៉ុន្មានឆ្នាំ ចុងក្រោយនេះ កំណើនបូលីវីមានតែជាង៦ភាគរយប៉ុណ្ណោះ។
ថ្មីៗនេះ រដ្ឋាភិបាលបូលីវីបានផ្តល់ទំនុកចិត្តដល់ចិន ដោយបានទិញផ្កាយរណបពីចិន។ ថ្មីៗនេះដែរ រដ្ឋមន្ត្រីការបរទេសចិន លោកវ៉ាង យី បានប្រាប់ប្រទេសប្រេស៊ីលថា ចិនចង់បង្កើនការវិនិយោគនិងទំនាក់ទំនងជាមួយអាមេរិកឡាទីន និងការ៉ាអ៊ីប អោយបានខ្លាំងក្លាថែមទៀត។ គួរបញ្ជាក់ថា ចិនជាដៃគូពាណិជ្ជកម្មទី១របស់ប្រេស៊ីល។ ប្រេស៊ីលជាប្រទេសមានសេដ្ឋកិច្ចលំដាប់ថ្នាក់ទី១ ក្នុងតំបន់។ ចិនក្លាយជាដៃគូពាណិជ្ជកម្មលំដាប់ទី២ ជាមួយប្រទេសជាច្រើននៅអាមេរិកឡាទីន។ សកលវិទ្យាល័យអាមេរិកនានាបានចេញរបាយការណ៍បង្ហាញថា ចិនបានផ្តល់កំចីសន្ធឹកសន្ធាប់ ជាទឹកប្រាក់ ១០២ពាន់ ២សែនដុល្លារ ដល់បណ្តាប្រទេសនៅអាមេរិកឡាទីន ចន្លោះពីឆ្នាំ ២០០៥ ដល់ឆ្នាំ២០១៣។
ចិនជាប់ចំណាត់ថ្នាក់ទី២ បន្ទាប់ពីអាមេរិក នៅទីផ្សារវេណេស៊ុយអេឡា។ វេណេស៊ុយអេឡា ជាប្រទេសសំបូរធនធានប្រេង។ ចិនពិភាក្សាជាមួយវេណេស៊ុយអេឡា ពីការបង្កើនការផលិត នៅទន្លេ អូរេណុក ស្ថិតនៅភាគកណ្តាលប្រទេស។ ការវិនិយោគនេះ គិតជាទឹកប្រាក់ មានដល់២៨ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ