អាមេរិករុញច្រានចោលការចោទប្រកាន់របស់ប្រធានាធិបតីវ៉េណេស៊ុយអេឡា
កាលពីល្ងាចថ្ងៃសុក្រទី២០ កញ្ញា ទីក្រុងវ៉ាស៊ីនបានចេញមុខបកស្រាយថា ខ្លួនមិនបានបដិសេធមិនឲ្យយន្តហោះដឹកលោកប្រធានាធិបតីវ៉េណេស៊ុយអេឡាហោះឆ្លងកាត់ដែនអាកាសរបស់ខ្លួននោះទេ។ កាលពីថ្ងៃព្រហស្បតិ៍ លោកប្រធានាធិបតីវ៉េណេស៊ុយអេឡា នីកូឡា ម៉ាឌូរ៉ូបានចោទប្រកាន់អាមេរិកថា បានចេញសម្រេចហាម មិនឲ្យយន្តហោះរបស់លោកប្រើដែនអាកាសអាមេរិក។
ចុះផ្សាយនៅថ្ងៃ៖
ស្តាប់ - ០១:៥០
ជាសង្រ្គាមពាក្យសំដី និងទម្លាក់ការទទួលខុសត្រូវលើគ្នាទៅវិញ ទៅមក។ កាលពីថ្ងៃព្រហស្បតិ៍ ប្រធានាធិបតីវ៉េណេស៊ុយអេឡា ដែលមានគំនិតអរិភាពជាមួយអាមេរិក តាំងពីយូរហើយ បានចោទប្រកាន់ទីក្រុងវ៉ាស៊ីនតោនថា បានសម្រេចបិទដែនអាកាសមិនឲ្យយន្តហោះរបស់លោកហោះឆ្លងកាត់ សំដៅទីក្រុងប៉េកាំងបាន។ នៅប៉េកាំង ជាទីដែលលោកនឹងជួបលោកប្រធានាធិបតីចិន ស៊ី ជីនពីង ដើម្បីនិយាយពីការពង្រឹងសហប្រតិបត្តិការ ជាយុទ្ធសាស្រ្តរវាងប្រទេសទាំងពីរ។
ប៉ុន្តែ មួយថ្ងៃក្រោយការចោទប្រកាន់របស់វ៉េណេស៊ុយអេឡា ទីក្រុងវ៉ាស៊ីនតោនបានរុញច្រានចោលការចោទប្រកាន់។ តាមអ្នកនាំពាក្យរបស់ក្រសួងការបរទេសអាមេរិក សហរដ្ឋអាមេរិកបានផ្តល់ការអនុញ្ញាតិដល់អាជ្ញាធរវ៉េណេស៊ុយអេឡាឲ្យប្រើប្រាស់ដែនអាកាសអាមេរិក។ ជាមួយគ្នានេះ អ្នកនាំពាក្យអាមេរិកខាងលើ បានលេបខាយបន្ថែមថា អាមេរិកយល់ព្រមបើកភ្លើងខៀវ បើទោះបីជាអាជ្ញាធរវ៉េណេស៊ុយអេឡាមិនបានគោរពតាមបទដ្ឋានក៏ដោយ ពោល អាជ្ញាធរវ៉េណេស៊ុយអេឡាបានដាក់ពាក្យសុំ នៅតែមួយថ្ងៃមុនការហោះហើរ នៅពេលដែលច្បាប់ទាមទារឲ្យដាក់សុំឲ្យបានមុន៣ថ្ងៃ។ លើសពីនោះទៀត ការសុំអនុញ្ញាតរបស់វ៉េណេស៊ុយអេឡាមិនមែនសម្រាប់យន្តហោះប្រធានាធិបតីទេ ឬការទូតទេ ប៉ុន្តែ ជាយន្តហោះសាមញ្ញមួយប៉ុណ្ណោះ។
ជារួម ទីក្រុងវ៉ាស៊ីនតោនបានជូនដំណឹងទៅទីក្រុងការ៉ាកាស រួចហើយ កាលពីថ្ងៃសុក្រ ដែលថា យន្តហោះដឹកលោកប្រធានាធិបតីនីកូឡា ម៉ាឌូរ៉ូនឹងអាចហោះឆ្លងកាត់ដែនអាកាសអាមេរិក។
កាលពីថ្ងៃព្រហស្បតិ៍ រដ្ឋមន្រ្តីការបរទេសវ៉េណេស៊ុយអេឡាបានប្រកាសប្រាប់អ្នកយកព័ត៌មានថា អាមេរិកបានបដិសេធមិនឲ្យយន្តហោះដឹកលោកប្រធានាធិបតីវ៉េណេស៊ុយអេឡាប្រើប្រាស់ដែនអាកាសអាមេរិក។ ទាំងលោកប្រធានាធិបតីនីកូឡា ម៉ាឌូរ៉ូផ្ទាល់បានចាត់ទុកការសម្រេចរបស់អាមេរិក ថា ជាការជេរប្រមាថ។ ជាការសងសឹកវិញ ទីក្រុងការ៉ាកាសបានព្រមានថា នឹងធ្វើសង្រ្គាមការទូតជាមួយអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ