ប៊ុលហ្ការីឈប់ប្រើយន្តហោះចម្បាំងរុស្ស៊ី ដោយនឹងប្តូរវាទៅដោយយន្តហោះអូតង់
ចុះផ្សាយនៅថ្ងៃ៖
ស្តាប់ - ០៤:២៣
ការដែលរដ្ឋាភិបាលប៊ុលហ្ការី ៣ថ្ងៃមុន សម្រេចចិត្តយ៉ាងនេះ គឺញ៉ាំងម៉ូស្គូឲ្យប្រតិកម្មថា ប៊ុលហ្ការី “ក្បត់” នឹងរុស្ស៊ី ដែលជាអតីតសម្ព័ន្ធមិត្តដ៏ជំនិតបំផុតរបស់ខ្លួន។ ភ្លាមនោះ ក៏មានចម្លើយតបវិញថា ប៊ុលហ្ការី បច្ចុប្បន្ន ជាសមាជិកអូតង់ផង សហភាពអឺរ៉ុបផង ហើយគ្មាន កាតព្វកិច្ច ដោះសាអំពី គោលជំហរអធិបតេយ្យខ្លួន នៅពីមុខភាគីទី៣ឡើយ។
ស្របនឹងសេចក្តីសម្រេច អនុម័តថ្ងៃ៧តុលា ដោយរដ្ឋាភិបាលប៊ុលហ្ការី យន្តហោះ ចម្បាំងរុស្ស៊ីសរុបដល់ទៅ ៣៥គ្រឿង ដែលមាននៅក្នុងកងអាកាសប៊ុលហ្ការី ពោលគឺ យន្តហោះ ប្រដេញ ធុន Mig-29 ចំនួន ១៥គ្រឿង , យន្តហោះប្រដេញធុន Mig-21 ចំនួន ៦ គ្រឿង និង យន្តហោះទម្លាក់គ្រាប់បែកធុន Su-25 ចំនួន ១៤គ្រឿង ទៅទល់ឆ្នាំ២០២០ នឹងស្ថិតនៅលើដីឥតដាក់ឲ្យសកម្មក្នុងកងអាកាសរបស់ប្រទេសឡើយ។
តាមការពន្យល់បំភ្លឺនៃលោករដ្ឋមន្ត្រីការពារជាតិប៊ុលហ្ការី វេលីហ្សា ស្ហាឡាម៉ាណូវ ៖ ការឈប់ប្រើយន្តហោះចម្បាំងរុស្ស៊ី គឺក្នុងគោលដៅ ធ្វើយ៉ាងណាឲ្យក្រុងសូហ្វីយ៉ា ឯករាជ្យ លែងអាស្រ័យទៀតឡើយ នឹងក្រុងម៉ូស្គូ ក្នុងវិស័យយោធា។ ហើយការសម្រេចចិត្តនេះ គឺត្រូវបានអនុម័ត ក្នុងក្របខ័ណ្ឌ នៃផែនការដែលមានឈ្មោះថា” ប៊ុលហ្ការី-អូតង់ ឆ្នាំ២០២០”។
តាមដែលប្រព័ន្ធផ្សព្វផ្សាយ នៅរុស្ស៊ីកត់សម្គាល់ ដោយយោងទៅលើកាសែត” Troud “ របស់ សហជីពប៊ុលហ្ការី ការដែលយន្តហោះចម្បាំងរុស្ស៊ី ស្រាប់តែនៅលើដី លែងហោះហើរ គឺ បណ្តាលឲ្យ ពីឡុត និង វិស្វករ ដល់ទៅជាង៣០០នាក់ធ្លាក់ខ្លួនអត់កាងារធ្វើ ទាល់តែបង្កើត ឡើងជាបរិយាកាសទោមនស្សក្រៃ ងំទៅដោយទឹកចិត្តបះបោរ ក្នុងកងអាកាសប៊ុលហ្ការី។
ជំនួសយន្តហោះយោធារុស្ស៊ី រដ្ឋាភិបាលប៊ុលហ្ការី គ្រោងទិញជាបន្ទាន់យន្តហោះប្រដេញថ្មីៗ របស់បស្ចិមលោកចំនួន ៨គ្រឿង ដែលតាមសម្តីលោករដ្ឋមន្ត្រីការពារជាតិ សម្រាប់គោលដៅនេះ មានរំលែកទៅហើយ នូវទឹកប្រាក់ ៣០០លានអឺរ៉ូ។ ប៉ុន្តែ យន្តហោះថ្មីមួយគ្រឿងៗ ធុន Eurofighter Typhoon ដែលផលិត នៅអឺរ៉ុប គឺថ្លៃ ដល់ ១០០លានអឺរ៉ូ ឯណោះ ដូច្នេះ ទឹកប្រាក់នេះ អាចទិញបានតែ ៣គ្រឿង ប៉ុណ្ណោះ។ ម៉្លោះ ហើយ បានជា តាមមតិពួកអ្នកឯកទេស លុយ ៣០០ លានអឺរ៉ូនោះ សមតែចំណាយសម្រាប់ទិញយន្តហោះយោធា ធុនជំនំ បែបយ៉ាង ម៉ាក F-16 ទិញ ពី ប្រទេសព័រទុយហ្កាល់ជាដើម។ ម្យ៉ាងទៀត នៅពីមុខប៊ុលហ្ការី ក៏មានជម្រើសពីរផ្សេង ៖ ឬមួយទិញ F-16 នេះ ពីស.រ.អា.ផ្ទាល់ , ឬមួយទិញវាពីប្រទេសក្រិក សមាជិកអូតង់ដែរ។
មិនមែនចៃដន្យទេ ដែលឧបនាយករដ្ឋមន្ត្រីរុស្ស៊ី ទទួលបន្ទុកខាងឧស្សាហកម្មយោធា លោក ឌ្មីទ្រី រ៉ូហ្គោស៊ីន ក្នុងបទអត្ថាធិប្បាយខ្លួន អំពីការសម្រចចិត្តប៊ុលហ្ការី ជំនួសយន្តហោះរុស្ស៊ី ទៅដោយយន្តហោះបស្ចិមលោក ថា ជាទង្វើមានន័យ ”ក្បត់” នឹងរុស្ស៊ី- ប្រទេសដែលធ្លាប់ ជាសម្ព័ន្ធមិត្តដ៏ជំនិតបំផុត ចាក់ទឹកមិនលិច របស់ប៊ុលហ្ការី អស់ជិត៤០ឆ្នាំ។ ពីព្រោះ ក្នុង ចំណោម ៨ប្រទេស អតីតសមាជិកអង្គការ” កតិកាសញ្ញា វ៉ារសូវី” ដែលបានមានអត្ថិភាព ពីឆ្នាំ ១៩៥៥ ដល់ ១៩៩១ ក្នុងនោះមាន សហភាពសូវៀត ឆេកូស្លូវ៉ាគី រូម៉ានី អាល្លឺម៉ង់ខាងកើត ប៊ុលហ្ការី ប៉ូឡូញ ហុងគ្រី អាល់បានី គឺប៊ុលហ្ការីតែម្តង ដែលមានអក្ខរក្រមស៊ីរីលិក ដូចរុស្ស៊ី ហើយ ភាសាប៊ុលហ្ការីសោត គឺស្រដៀង នឹងភាសារុស្ស៊ី លុះទាល់តែសម័យនោះ នៅសហភាពសូវៀតមានសុភាសិត ដែលតំណាលថា “ មាន់មិនមែនជាបក្សី ប៊ុលហ្ការី មិនមែន ជាបរទេស តែជា សាធារណរដ្ឋសូវៀត ទី១៦”។
ប៉ុន្តែពាក្យថា”ក្បត់”នោះ បានញ៉ាំងលោករដ្ឋមន្ត្រីការបរទេសប៊ុលហ្ការី ដាញែល មីតូវ ឲ្យចេញ សេចក្តីថ្លែងការណ៍ថា ៖ ប្រតិកម្មលោក រ៉ូហ្គោស៊ីន មិនសក្តិសមជាអ្នកដឹកនាំ ដោយខ្វះសុជីវធម៌ និងគ្មាន អភិសមាចារ និងមិនចេះគោរពចំពោះស្ថាប័ន និងរដ្ឋប៊ុលហ្ការី រដ្ឋដែលក្នុង ឆ្នាំ២០០៤ បានក្លាយជាសមាជិកអូតង់ និងក្នុងឆ្នាំ២០០៧ ក្លាយទាំងជាសមាជិកសហភាពអឺរ៉ុបផង ហើយ ដែលមានសិទ្ធិអធិបតេយ្យធ្វើការសម្រេចចិត្តរបស់ខ្លួន មិនចាំបាច់រាយកាណ៍ទៅភាគី ទី៣ឡើយ។
លោកប្រមុខការទូតប៊ុលហ្ការី លំអិតថា តាមពិត គឺតាំងពី ១៥ឆ្នាំមុនម៉្លេះ ដែលប៊ុលហ្ការី ចង់ទិញយន្តហោះទនើបៗសម្រាប់កងអាកាសខ្លួន ប៉ុន្តែកាលណោះ ថវិកាជាតិមិនអនុញ្ញាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ