បាតុកម្មលើកទី៣របស់អតីតបក្សប្រឆាំងឲ្យជប៉ុនផ្អាកជំនួយដល់ការបោះឆ្នោតនៅកម្ពុជា
បន្ទាប់ពីបាតុកម្មនៅបុរី New York ម្សិលមិញ ថ្ងៃនេះក្រុមអ្នកគាំទ្រអតីតគណបក្សសង្រ្គោះជាតិរាប់រយនាក់បានរៀបចំធ្វើបាតុកម្មមួយទៀត នៅទីក្រុងតូក្យូ ប្រទេសជប៉ុនផ្ទាល់ ដោយអំពាវនាវឲ្យប្រទេសនេះផ្អាកការគាំទ្រដល់ការបោះឆ្នោតនៅកម្ពុជា។ បើទោះបីជាមានបាតុកម្មជាបន្តបន្ទាប់យ៉ាងនេះក្តី តែអ្នកនាំពាក្យទីស្តីការគណៈរដ្ឋមន្រ្តីកម្ពុជាអះអាងថា វាគ្មានប្រសិទ្ធភាពដែលធ្វើឲ្យរដ្ឋាភិបាលជប៉ុនទទួលយកនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
វាជាលើកទី៣ហើយ ដែលក្រុមអ្នកគាំទ្រអតីតបក្សប្រឆាំងមួយនេះ ធ្វើបាតុកម្មទទួចឲ្យជប៉ុនផ្អាកការគាំទ្រដល់ដំណើរការបោះឆ្នោតនៅកម្ពុជា២៩កក្កដាខាងមុខ។
បាតុកម្មដែលមានមនុស្សចូលរួមរាប់រយនាក់នេះ បានកើតឡើងដំបូងនៅថ្ងៃទី១មិថុនា នៅមុខស្ថានបេសកម្មរបស់ជប៉ុនប្រចាំអង្គការសហប្រជាជាតិក្នុងបុរីញូវយ៉ក សហរដ្ឋអាមេរិក។ លើកទី២នៅថ្ងៃម្សិលមិញនៅទីកន្លែងដដែលនិងគោលបំណងដូចគ្នា។ ចំណែកលើកទី៣គឺនៅថ្ងៃនេះតែម្តង បាតុកម្មដែលភាគច្រើនជាពលករខ្មែរធ្វើការនៅប្រទេសជប៉ុនចូលរួម បានប្រព្រឹត្តិទៅនៅទីក្រុងតូក្យូ។
ទាំងនៅសហរដ្ឋអាមេរិក និងទាំងនៅតូក្យូ ក្រុមបាតុករសុទ្ធតែបានលើកបដានិងស្រែកទាមទារឲ្យដោះលែង លោក កឹម សុខា និងស្នើឲ្យរដ្ឋាភិបាលជប៉ុនផ្អាកជំនួយដល់ការបោះឆ្នោតនៅកម្ពុជា ដោយពួកគេចាត់ទុកថា «ជាការបោះឆ្នោតក្លែងក្លាយ»។
លោក អេង ឆៃអ៊ាង អនុប្រធានអតីតគណបក្សសង្រ្គោះជាតិ ដែលបានចូលរួមការតវ៉ានៅមុខស្ថានបេសកម្មរបស់ជប៉ុនប្រចាំអង្គការសហប្រជាជាតិក្នុងបុរីញូវយ៉កម្សិលមិញ លោកបានអំពាវនាវប្រទេសជប៉ុនដកជំនួយរបស់ខ្លួន ដែលផ្តល់ឲ្យ គណៈកម្មាធិការជាតិរៀបចំការបោះឆ្នោតនៅកម្ពុជា។ មិនត្រឹមតែប៉ុណ្ណោះលោកបន្ត អំពាវនាវឲ្យសហគមន៍អន្តរជាតិកុំទទួលស្គាល់ការបោះឆ្នោត ដែលអតីតគណបក្សសង្រ្គោះជាតិចាត់ទុកថាជាការបោះឆ្នោតក្លែងក្លាយ ហើយអតីតអ្នកគាំទ្រគណបក្សសង្រ្គោះជាតិមិនអាចទទួលយកបានទេ ចំពោះការបោះឆ្នោត ដែលគ្រោងធ្វើនាខែកក្កដាខាងមុខនេះ។
ក៏ប៉ុន្តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងថា បាតុកម្មរបស់ក្រុមនេះ បង្ហាញថា ជាការបរាជ័យរបស់អតីតគណបក្សសង្រ្កោះជាតិដែលទាមទារឲ្យមានការដាក់សម្ពាធមកលើរដ្ឋាភិបាលកម្ពុជា។
បើតាម លោក ផៃ ស៊ីផាន គឺជប៉ុននឹងមិនធ្វើតាមការអំពាវនាវរបស់ក្រុមបាតុករនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ