មេធាវី៖ តុលាការគ្រោងបិទការស៊ើបសួរករណី លោក កឹម សុខាក្នុងពេលឆាប់ៗខាងមុខនេះ
មេធាវីការពារឲ្យលោក កឹម សុខា បានប្រាប់វិទ្យុបារាំងអន្ដរជាតិនៅថ្ងៃសៅរ៍នេះថា តុលាការគ្រោងបិទការស៊ើបសួរលើសំណុំរឿងប្រធានអតីតគណបក្សប្រឆាំងនៅពេលឆាប់ៗខាងមុខនេះ។ ចំណែកក្រុមមេធាវីការពារក្តីវិញអះអាងថា ខ្លួនកំពុងតែមមាញឹកក្នុងការរៀបចំឯកសារដាក់ជូនតុលាការផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ភស្តុតាងដែលតំណាងអយ្យការបានដាក់ជូនតុលាការ គឺមិនមានអ្វីថ្មីទៀតទេ ក្រៅតែពីវីដេអូចាស់ និងសាក្សីដែលសមត្ថកិច្ចយកមកធ្វើជាសម្អាងដើម្បីចោទប្រកាន់ លោក កឹម សុខា នាពេលកន្លងមក។ នេះជាការកត់សម្គាល់របស់ លោក ផេង ហេង សហមេធាវីការពារក្តី លោក កឹម សុខា។
លោក ផេង ហេង យល់ថា តំណាងអយ្យការមិនមានបទល្មើស ឬភស្តុតាងដាក់បន្ទុកណាមួយសម្រាប់ចោទប្រកាន់កូនក្តីរបស់លោកទេ ហើយក្រុមមេធាវីនៅតែប្រកាន់ជំហរស្នើសុំចៅក្រម ឲ្យទម្លាក់ចោលបទចោទលើ លោក កឹម សុខា ដដែល។
សូមរំឭកថា លោក កឹម សុខា ត្រូវបានតុលាការផ្ទេរពីការឃុំខ្លួននៅពន្ធនាគារត្រពាំងផ្លុងជាប់ព្រំដែនវៀតណាម មកដាក់ឲ្យនៅក្នុងផ្ទះរបស់លោកក្នុងខណ្ឌទួលគោក ក្រោមការត្រួតពិនិត្យរបស់តុលាការកាលពីពាក់កណ្តាលខែកញ្ញា។ ការផ្ទេរកន្លែងឃុំខ្លួន លោក កឹម សុខា គឺតុលាការផ្អែកលើបញ្ហាសុខភាពជនជាប់ចោទ បន្ទាប់ពី លោក កឹម សុខា ជាប់ឃុំនៅពន្ធនាគារជាង១ឆ្នាំ។
មេធាវីការពារក្ដី ឲ្យដឹងថា នាពេលនេះ លោក កឹម សុខា ត្រូវបានអនុញ្ញាតឲ្យទទួលការព្យាបាលពីគ្រូពេទ្យជាប្រចាំ តែលោកនៅតែមានបញ្ហាជាប់សរសៃខ្នងដដែល។ សម្រាប់មេធាវី ការឃុំខ្លួននៅក្នុងផ្ទះនេះ គឺគ្រាន់បើជាងការឃុំខ្លួននៅពន្ធនាគារ ដោយ លោក កឹម សុខា ទទួលបានការថែទាំដិតដល់ពីក្រុមគ្រួសារ ហើយលោកក៏អាចមានសិទ្ធិទទួលបានព័ត៌មានពីបញ្ហាប្រទេសជាតិផងដែរ។ យ៉ាងណាក៏ដោយ លោក កឹម សុខា មិនអាច បញ្ចេញមតិទាក់នឹងបញ្ហានយោបាយទេ ពិសេស ការវិវត្តថ្មីៗ ទាក់ទងនឹងការព្យួរការអនុគ្រោះពន្ធពីសហភាពអឺរ៉ុបពីប្រទេសកម្ពុជា ព្រោះតុលាការដាក់បម្រាមមិនឲ្យលោកធ្វើនយោបាយ។ នេះបើតាម លោក ផេង ហេង។
ចំណែក ការប្រតិបត្តិតាមបែបសាសនាវិញ លោក កឹម សុខា គ្រោងនិមន្តព្រះសង្ឃមករាប់បាតនៅផ្ទះរបស់លោកផ្ទាល់ក្នុងនៅឱកាសបុណ្យភ្ជុំបិណ្ឌ ប៉ុន្តែក្រោយមកបានលុបគម្រោងនេះចោលវិញ ដោយសារតែមានស្ថានភាពលំបាកក្នុងការចេញ-ចូលរបស់អ្នកមកចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ