សង្គមខ្មែរត្រូវការព្យាបាល«ជំងឺបាក់ស្បាត»
ចុះផ្សាយនៅថ្ងៃ៖
ស្តាប់ - ០៤:៥៨
ឆ្លងកាត់របត់នយោបាយឈាមនិងទឹកភ្នែកជាច្រើនទសវត្សរ៍ជាពិសេសរយៈពេលជិត៤ឆ្នាំក្នុ ងរបបប្រល័យពូជសាសន៍ខ្មែរក្រហម ពលរដ្ឋខ្មែរស្ទើរតែទាំងអស់សុទ្ធតែមានជំងឺផ្លូវចិត្តជាប់ខ្លួនក្នុងនោះ«ជំងឺបាក់ស្បាត»បញ្ហាធំធេងតែគ្មានអ្នកណាសូវមើលឃើញ។ បច្ចុប្បន្ន នៅពេ លដែលប្រទេសជាតិមានសន្តិភាព និងកំពុងស្គាល់ការអភិវឌ្ឍ វាជាពេលវេលាសមស្របណាស់សម្រាប់ព្យាបាល«ជំងឺបាក់ស្បាត»ចេញពីមនុស្សខ្មែរ។ អ្នកនយោបាយដើរតួនាទីសំខាន់ជាងគេក្នុងការរំងាប់ជំងឺនេះ ឬផ្ទុយទៅវិញ ពួកគេជាអ្នកធ្វើឲ្យជំងឺផ្លូវចិត្តរើឡើងវិញគ្មានទីបញ្ចប់។
នៅកម្ពុជា ស្ថានភាពនយោបាយមិនត្រឹមតែមានឥទ្ធិពលទៅលើជីវភាពប្រជាជនឬទៅលើសេដ្ឋកិច្ចជាតិប៉ុណ្ណោះទេ ប៉ុន្តែ ក៏មានឥទ្ធិពលខ្លាំងទៅលើផ្លូវចិត្តរបស់ប្រជាពលរដ្ឋផងដែរ។ ស្លាកស្នាមប្រវត្តិសាស្ត្រនិងមរតកនយោបាយគឺភស្តុតាងដែលអាចបញ្ជាក់បញ្ហានេះបាន។
ជាការពិតណាស់ ក្រោយចាកចេញពីរបបខ្មែរក្រហម ប្រជាពលរដ្ឋខ្មែរដែលបានឆ្លងកាត់របបនេះហាក់នៅសល់តែសម្បកខ្លួន រីឯស្មារតីរបស់ពួកគេត្រូវបានបំផ្លាញខ្ទេចខ្ទីដោយសារភាពឃោរឃៅអមនុស្សធម៌ក្នុងរបបនោះអស់ទៅហើយ។ ភាពភ័យរន្ធត់ តក់ស្លុត បាក់ស្បាត តែង តាមលងអារម្មណ៍របស់ខ្មែរគ្រប់ពេលវេលាប្រៀបបាននឹងស្រមោលអន្ទោលតាមប្រា ណ។ អ្នកដែលរងគ្រោះដោយអំពើឃោរឃៅហួសប្រមាណបានទទួលរងផលប៉ះពាល់ខាងផ្លូវចិត្តធ្ងន់ធ្ងររហូតក្លាយជាជំងឺពិបាកព្យាបាល។ នេះជាបញ្ហាធំធេងណាស់សម្រាប់សង្គមខ្មែរ ប៉ុន្តែ មិនសូវមានអ្នកណាចាប់អារម្មណ៍នោះឡើយ។
រយៈពេល ៣៥ ឆ្នាំបានកន្លងផុតទៅ ពលរដ្ឋខ្មែរបានស្គាល់ភាពស្រស់ស្រាយនិងស្នាមញញឹ មឡើងវិញ។ ប្រទេសជាតិបានស្គាល់សន្តិភាពនិងការអភិវឌ្ឍ ជាពិសេសវប្បធម៌ប្រជាធិបតេ យ្យដែលបានចាប់កំណើតជាង២០ឆ្នាំមកហើយនោះក៏បានចូលរួមចំណែកជួយព្យាបាលជំងឺផ្លូវចិត្តរបស់ពលរដ្ឋខ្មែរបានមួយចំណែកដែរតាមរយៈការសម្តែងមតិនានាដើម្បីបានធូរទ្រូងខ្លះ។ ទោះជាយ៉ាងនេះក្តី ស្ថានភាពនយោបាយនិងសង្គមនៅតែបន្តដាក់សម្ពាធទៅលើវិបត្តិផ្លូវចិត្តរបស់ពលរដ្ឋខ្មែរជាច្រើន។
ជាក់ស្តែង រយៈពេលប៉ុន្មានឆ្នាំចុងក្រោយនេះ មានព្រឹត្តិការណ៍គួរឲ្យរន្ធត់ជាច្រើនដែលគេចាត់ទុកជាការបន្ថែមសម្ពាធផ្លូវចិត្តទៅលើប្រជាពលរដ្ឋខ្មែរដែលមិនទាន់ជាសះស្បើយពី«ជំងឺបាក់ស្បាត»នៅឡើយ។ គ្រាន់តែក្នុងវិបត្តិនយោបាយរយៈពេលមួយឆ្នាំចុងក្រោយនេះ មានឈុតឆាកអំពើហិង្សាជាច្រើនបានកើតឡើងដែលបណ្តាលឲ្យមានមនុស្សស្លាប់ របួស និងអ្នកជាប់ពន្ធនាគារជាច្រើន។
នេះនៅមិនទាន់រាប់បញ្ហានៅក្នុងសម័យថ្មីនេះជាច្រើនទៀតមានដូចជា អំពើហិង្សាក្នុងគ្រួសារ បញ្ហាដីធ្លី គ្រោះថ្នាក់ចរាចរណ៍ អំពើអយត្តិធម៌សង្គម និងគម្លាតរវាងអ្នកមាននិងអ្នកក្រ។ល។និង។ល។ ដែលបានបន្តដាក់សម្ពាធផ្លូវចិត្តទៅលើពលរដ្ឋខ្មែរជាច្រើនដែលរបួសផ្លូវចិត្តរបស់ពួកគេនៅមិនទាន់សះស្បើយនៅឡើយផង។ មិនត្រឹមតែអ្នកទទួលរងគ្រោះផ្ទាល់ប៉ុណ្ណោះទេ សូម្បីតែអ្នកដែលបានលឺព័ត៌មាននេះក៏ទទួលអារម្មណ៍ប៉ះពាល់ដែរខណៈដែលជនរួមជាតិរបស់ខ្លួនមួយចំនួននៅបន្តយំយែកស្រែករកយុត្តិធម៌ដោយក្តីឈឺចាប់នោះ។
នៅមិនទាន់មានការសិក្សាណាមួយឲ្យបានជាក់លាក់អំពីវិបត្តិផ្លូវចិត្តនិង«ជំងឺបាក់ស្បាត»នៅនេះនៅឡើយទេ ប៉ុន្តែ យោងតាមក្រុមគ្រូពេទ្យឯកទេស ជំងឺផ្លូវចិត្តមានសភាពធ្ងន់ធ្ងរណាស់សម្រាប់សង្គមកម្ពុជា។ ថ្វីដ្បិតតែវិបត្តិនេះហាក់ដូចជាមិនសូវមើលឃើញ ប៉ុន្តែ វាបាននិងកំពុងរាតត្បាតនិងស៊ីរូងសង្គមខ្មែរដោយស្ងៀមស្ងាត់បំផុត។ ជាផលវិបាកជាក់ស្តែង មនុស្សខ្មែរជាច្រើនរស់នៅក្នុងសភាពខ្ទេចខ្ទាំខាងស្មារតីនិងបាក់ស្បាតដែលធ្វើឲ្យពួកគេងាយនឹងកត់ស្លុតនៅចំពោះមុខស្ថានភាពយន្តរាយណាមួយ។
អំពើហិង្សា ឧក្រិដ្ឋកម្ម ឃាតកម្ម អាកប្បកិរិយាមិនគោរពច្បាប់ រាប់ទាំងការឆាប់ជឿលើជំនឿមិនសមហេតុផលផ្សេងៗជាដើមផងនោះ ក៏មានចំណែកចេញពីស្ថានភាពខ្ទេចខ្ទាំខាងស្មារតីរបស់ពលរដ្ឋនេះដែរ។ នេះក៏ជាមូលហេតុដ៏ធំមួយនៃភាពក្រីក្រ។ សង្គមមួយដែលមានកោសិកាទទួលរងភាពខ្ទេចខ្ទាំដ៏ធ្ងន់ធ្ងរបែបនេះពិតជាមិនងាយនឹងស្តារឡើយ។ ទាំងនេះគឺជាកំហុសរបស់អ្នកនយោបាយដែលគិតតែពីដណ្តើមអំណាចហើយភ្លេចគិតពីផលវិបាកទៅលើប្រទេសជាតិនិងប្រជាជន។
ដូច្នេះ ប្រសិនបើអ្នកនយោបាយជំនាន់ក្រោយយល់ច្បាស់អំពីបញ្ហានេះ បេសកកម្មដំបូងបង្អស់របស់ពួកគេគឺការចូលរួមចំណែកព្យាបាលជំងឺផ្លូវចិត្តនិង«ជំងឺបាក់ស្បាត»ចេញពីសង្គមតាមរយៈការកសាងវប្បធម៌សន្តិភាពនិងអហិង្សាមុននឹងផ្តល់សេវាពិគ្រោះយោបល់និងព្យាបាលដល់ជនរងគ្រោះខ្មែរទាំងឡាយណាដែលកំពុងត្រាំត្រែងជាមួយបញ្ហាផ្លូវចិត្ត។
ផ្ទុយទៅវិញ ប្រសិនបើអំពើហិង្សាគ្រប់រូបភាព រាប់ទាំងហិង្សាពាក្យសម្តីផង នៅតែកើតឡើងឥតឈប់ឈរ និងប្រសិនបើគ្មានការគិតគូរព្យាបាលបញ្ហាផ្លូវចិត្តទេនោះ សង្គមខ្មែរនឹងត្រូវបន្តញាំញី ត្រាំត្រែងដោយ«ជំងឺបាក់ស្បាត»រយៈពេលយូរតទៅទៀតហើយវាក៏ទំនងជារកទីបញ្ចប់មិនឃើញជារៀងរហូតផងក៏មិនដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ