រដ្ឋាភិបាលសម្រេចដកហូតដីពីលោក ឡោក ហ៊ួរ ឲ្យពលរដ្ឋវិញ
រដ្ឋាភិបាលសម្រេចប្រគល់ដីនៅស្រុកកៀនស្វាយនិងស្រុកស្អាងខេត្តកណ្ដាលដែលមានបញ្ហាជាមួយលោក ឡោក ហ៊ួរ នាពេលកន្លងមកទៅឲ្យពលរដ្ឋវិញបន្ទាប់ពីដោះស្រាយចប់សព្វគ្រប់។ ដំណើរការប្រគល់ដីត្រឡប់ទៅឲ្យពលរដ្ឋវិញនេះ ធ្វើឡើងតាមរយៈការចុះវាស់វែងប្រមូលទិន្នន័យ ដើម្បីចុះបញ្ជីដីមានលក្ខណៈជាប្រព័ន្ធ នៅថ្ងៃចន្ទខាងមុខ។ បន្ថែមពីលើនេះទៀតក្រសួងដែនដីនៅថ្ងៃទី៦មករាបានជូនដំណឹងទៅអភិបាលខេត្តកណ្ដាលលោក ម៉ៅ ភិរុណ ឲ្យប្រាប់ដំណឹងនេះទៅប្រជាពលរដ្ឋជាម្ចាស់ដី ដោយត្រូវភ្ជាប់ជាមួយនូវឯកសារពាក់ព័ន្ធនឹងក្បាលដី ដើម្បីបានដីត្រឡប់ទៅវិញ។ អេង គីមហុង សូមឆ្លៀតឱកាសពន្យល់សំណុំរឿងទំនាស់ដីធ្លីរវាងលោក ឡោក ហួរ និង ពលរដ្ឋក្នុងខេត្តកណ្ដាល ជូនលោកអ្នកស្ដាប់៖
ចុះផ្សាយនៅថ្ងៃ៖
ស្តាប់ - ០១:៣៨
តាមការអះអាងពីទីស្ដីការគណៈរដ្ឋមន្រ្តី លោក ឡោក ហ៊ួរ បានរំលោភដីប្រជាពលរដ្ឋជាច្រើនពាន់ហិកតានៅក្នុងខេត្តកណ្ដាល។ មូលហេតុនេះហើយទើបរាជរដ្ឋាភិបាលសម្រេចដកហូតដី ដែលលោក ឡោក ហ៊ួរ បានរំលោភដីពីប្រជាពលរដ្ឋចំនួនជិត៣ពាន់ហិកតា ប្រគល់ទៅឲ្យពលរដ្ឋវិញ។ បន្ថែមពីលើនេះលោក ឡោក ហ៊ួរ ក៏ត្រូវបានរដ្ឋាភិបាលនិរាករណ៍ប័ណ្ណសំគាល់សិទ្ធិកាន់កាប់អចលនវត្ថុចំនួន២៩ប័ណ្ណ។
សូមរំលឹកថា មុននឹងរដ្ឋាភិបាលសម្រេចដូច្នេះ ក្រសួងរៀបចំដែនដី នគរូបនីយកម្ម និងសំណង់បានចុះឈ្មោះលោកឧកញ៉ា ឡោក ហ៊ួរ ចូលក្នុងបញ្ជីខ្មៅកាលពីខែឧសភាឆ្នាំ២០១៦ដោយរារាំងមិនឲ្យមានការលក់ ទិញ ឬផ្ទេរកម្មសិទ្ធិទៅអ្នកដទៃឡើយ។ កន្លងមក រដ្ឋមន្ដ្រីក្រសួងដែនដី លោក ជា សុផារ៉ា បានព្រមានរៀបចំឈ្មោះបុគ្គលរំលោភដីធ្លីពលរដ្ឋ ក្នុងបញ្ជីខ្មៅ ជូនលោកនាយករដ្ឋមន្ត្រី ហ៊ុន សែន។ រហូតមកទល់ពេលនេះ មានតែឯកឧត្តម ឡោក ហ៊ួរ ម្នាក់ទេ ដែលស្ថិតក្នុងបញ្ជីខ្មៅ ហើយត្រូវបានចាត់វិធានការនៅពេលនេះ។
សូមបញ្ជាក់ថា លោក ឡោក ហ៊ួរ គឺជាឧត្តមសេនីយ៍ឯក (ផ្កាយ៣) នៃនគរបាលជាតិក្រសួងមហាផ្ទៃ ប៉ុន្តែលោកបានព្យួរមុខងារនេះដើម្បីទៅបំពេញតួនាទីជាអ្នកតំណាងរាស្ត្រមណ្ឌលខេត្តបាត់ដំបង របស់គណបក្សប្រជាជនកម្ពុជា។ ក្រោយពីរដ្ឋាភិបាលទទួលស្គាល់ថាលោក ឡោក ហ៊ួរ ពិតជាមានទំនាស់ដីធ្លីច្រើនកន្លែងជាមួយពលរដ្ឋរស់នៅខេត្តកណ្ដាល រដ្ឋាភិបាលបានចេញលិខិតតម្រូវឲ្យលោក ឡោក ហ៊ួរ ចូលដោះស្រាយទំនាស់ដីធ្លីទាំងនេះ។
លោក ឡោក ហ៊ួរ តាមរយៈបណ្ដាញសារព័ត៌មានក្នុងស្រុកធ្លាប់បានអះអាងថា លោកមិនដែលរំលោភយកដីពលរដ្ឋទេហើយលោកមិនមានទំនាស់ដីធ្លីច្រើនកន្លែង ដូចការអះអាងនោះដែរ។ ប៉ុន្តែលោកបានទទួលស្គាល់ថា មានទំនាស់ជាមួយតែឈ្មួញដី នៅខេត្តកណ្តាល លើទំហំដី ៦០០ ហិកតា ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ