ក្រសួងរៀបចំដែនដីទុកពេលឲ្យឧកញ៉ាដែលជាប់ឈ្មោះក្នុងបញ្ជីខ្មៅចូលខ្លួនមកដោះស្រាយ
លោកឧកញ៉ា ឡោក ហ៊ួរ ជាមនុស្សដំបូង ដែលត្រូវបានលោក ជា សុផារ៉ា រដ្ឋមន្ត្រីក្រសួងរៀបចំដែនដី នគររូបនីយកម្មនិងសំណង់ ចារក្នុងបញ្ជីខ្មៅ ដូចទៅនឹងអ្វីដែលលោកធ្លាប់ព្រមានកាលពីថ្មីៗនេះ។ លោកឧកញ៉ា ឡោក ហ៊ួរ ត្រូវបានគេរកឃើញថាមានទំនាស់ច្រើនកន្លែងជាមួយប្រជាពលរដ្ឋនៅក្នុងខេត្តកណ្ដាល។ នីតិវិធីបន្ត ក្រសួងរៀបចំដែនដីសម្រេចទុកពេលឲ្យ លោក ឡោក ហ៊ួរ ចូលខ្លួនមកដោះស្រាយតាមច្បាប់ជាធរមាន។
ចុះផ្សាយនៅថ្ងៃ៖
ស្តាប់ - ០១:៣៩
បន្ទាប់ពីដាក់លោក ឡោក ហ៊ួរ ចូលក្នុងបញ្ជីខ្មៅ ក្រសួងរៀបចំដែនដី នគររូបនីយកម្មនិងសំណង់ នៅមិនទាន់មានចំណាត់ការអ្វីទាំងអស់ចំពោះលោក ឡោក ហ៊ួរ ។ ដោយសម្រេចទុកពេលឲ្យលោក ឡោក ហ៊ួរ ចូលខ្លួនមកដោះស្រាយតាមនីតិវិធីច្បាប់ដែលមានចែងជាធរមាន។
ថ្លែងប្រាប់វិទ្យុបារាំងអន្តរជាតិRFIនៅព្រឹកថ្ងៃអង្គារទី១០ឧសភានេះ លោក ជៀម សុផលមករាឲ្យដឹងថា ការដាក់ឈ្មោះលោក ឡោក ហ៊ួរ ចូលទៅក្នុងបញ្ជីខ្មៅបន្ទាប់ពីលោក ជា សុផារ៉ា ពិនិត្យឃើញថារាល់ពាក្យបណ្ដឹងទំនាស់ដីធ្លីគឺសុទ្ធតែជាប់ពាក់ព័ន្ធជាមួយលោក ឡោក ហ៊ួរ ។
ដោយឡែកបើតាមលិខិតមួយច្បាប់របស់អភិបាលខេត្តកណ្ដាលលោក ម៉ៅ ភរុណ ចុះថ្ងៃទី០៥ឧសភា បានជម្រាបទៅអភិបាលស្រុកគៀនស្វាយនិងអភិបាលស្រុកស្អាងត្រូវចុះទៅទប់ស្កាត់និងបញ្ឈប់សកម្មភាពជីកលើក ឈូសឆាយ ដីអនាធិបតេយ្យក្នុងតំបន់ដែលលោក ឡោក ហ៊ួរ ឬអ្នកដទៃផ្សេងទៀត គ្រប់គ្រងមិនស្របច្បាប់។ និងមិនអនុញ្ញាតឲ្យមានការ លក់ ទិញ ឬផ្ទេរសិទ្ធិគ្រប់គ្រង និងមិនត្រូវចេញលិខិតស្នាមលើដីវិវាទ។ បន្ថែមពីលើការជូនដំណឹងនេះរដ្ឋបាលខេត្តនឹងបង្កើតគណៈកម្មការចំពោះកិច្ចមួយដើម្បីចុះអង្កេតស្រាវជ្រាវ ដោះស្រាយលើដីទំនាស់ជាក់ស្ដែង តាមបណ្ដឹងប្រជាពលរដ្ឋ។
សូមបញ្ជាក់ថា លោកឧកញ៉ា ឡោក ហ៊ួរ ជាមនុស្សដំបូងដែលលោក ជា សុផារ៉ា ចារក្នុងបញ្ជីបន្ទាប់ពីការព្រមានរបស់រដ្ឋមន្ត្រីថ្មីរូបនេះធ្វើឡើងមិនដល់មួយសប្ដាហ៍។ លោក ជា សុផារ៉ា ដែលធ្លាប់អះអាងថា លោកនឹងដាក់ឈ្មោះបុគ្គលណាដែលមានទំនាស់ដីធ្លីជាមួយប្រជាពលរដ្ឋនៅក្នុងបញ្ជីខ្មៅទោះមានឋានៈធំប៉ុណ្ណាក៏ដោយ។ បន្ថែមពីលើនេះទៀត លោកនឹងរាយការណ៍ជូនលោកនាយករដ្ឋមន្ត្រី ហ៊ុន សែន អំពីបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ