បារាំងសុំការគាំទ្រពីកម្ពុជាធ្វើជាម្ចាស់ផ្ទះរៀបចំពិព័រណ៍ពិភពលោកឆ្នាំ២០២៥
តំណាងផ្នែកពិព័រណ៍ប្រទេសបារាំងនៅដើមសប្តាហ៍នេះ បានជួបជាមួយអាជ្ញាធរកម្ពុជាក្នុងគោលបំណងចង់ឲ្យប្រទេសកម្ពុជាគាំទ្រខ្លួន ធ្វើជាម្ចាស់ផ្ទះរៀបចំពិព័រណ៍ពិភពលោកឆ្នាំ២០២៥។ ការស្វះស្វែងរបស់បារាំងដូច្នេះគឺដើម្បីត្រៀមប្រជែងជាមួយប្រទេស៣ផ្សេងទៀតរួមមានៈ ជប៉ុន រុស្សី និងអាហ្សែបៃហ្សង់ ដែលប្រទេសទាំងនេះ ក៏ចង់ស្វែងរកការគាំទ្រពីកម្ពុជាដើម្បីបានសិទ្ធិធ្វើជាម្ចាស់ផ្ទះរៀបចំពិព័រណ៍នេះដែរ។
ចុះផ្សាយនៅថ្ងៃ៖
មូលហេតុដែលបារាំងចង់ឲ្យកម្ពុជាគាំទ្រខ្លួនធ្វើជាម្ចាស់ផ្ទះរៀបចំពិព័រណ៍ពិភពលោកឆ្នាំ២០២៥ ក៏ដោយសារតែប្រធានបទដែលបារាំងស្នើឡើងនៅក្នុងការរៀបចំពិព័រណ៍ពិភពលោកនេះ គឺមានទំនាក់ទំនងជាមួយយុទ្ធសាស្ត្រនៃការអភិវឌ្ឍន៍ប្រទេសកម្ពុជា។
ខណៈដែលជប៉ុន ជាប្រទេសផ្ដល់ជំនួយដ៏ធំមកកម្ពុជា និងស្របពេលដែលមាន សំណួរចោទឡើងថា បារាំងមិនខ្លាចកម្ពុជាងាកទៅគាំទ្រជប៉ុនដើម្បីបានសិទ្ធិក្លាយជាម្ចាស់ផ្ទះរៀបចំពិព័រណ៍ពិភពលោកឆ្នាំ២០២៥ ទេឬយ៉ាងណា? លោក ប៉ាស្កាល់ ឡាវី (Pascal Lamy) ប្រតិភូអន្តរក្រសួងទទួលបន្ទុកការរៀបចំពិព័ណ៌ពិភពលោកឆ្នាំ២០២៥ ថ្លែងនៅក្នុងសន្និសីទកាសែតនៅល្ងាចថ្ងៃទី២០ធ្នូម្សិលមិញថា បារាំងតែងមានជំនឿចិត្តថា នឹងឈ្នះជប៉ុន ក៏ដោយសារតែបារាំងធ្លាប់ជោគជ័យរួចមកហើយនៅក្នុងការរៀបចំសន្និសីទអន្តរជាតិស្ដីពីអាកាសធាតុ។ ម្យ៉ាងទៀតក៏ដោយសារតែបារាំងជាទិសដៅទេសចរណ៍លេខ១នៅក្នុងពិភពលោក។
ប្រសិនបើប្រទេសដែលចូលរួមពិព័រណ៍ពិភពលោកឆ្នាំ២០២៥ បោះឆ្នោតឲ្យបារាំងធ្វើជាម្ចាស់ផ្ទះ ប្រទេសពួកគេនឹងទទួលបានប្រយោជន៍ត្រឡប់មកវិញជាច្រើន។ ជាក់ស្ដែងកម្ពុជា អំឡុងពេលនៃការរៀបចំពិព័រណ៍ពិភពនាពេលកន្លងមក ទទួលបានការចាប់អារម្មណ៍ខ្លាំងពីអន្តរជាតិ តាមរយៈការដាក់តាំងបង្ហាញប្រាសាទអង្គរវត្ត និងរមណីដ្ឋានវត្តភ្នំ។ បន្ថែមពីលើនេះទៀត ក្រោយបញ្ចប់ការចូលរួមពិព័រណ៍នេះគឺទីកន្លែងនីមួយៗដែលប្រទេសទាំងអស់ចូលរួមតាំងពិព័រណ៍នឹងក្លាយជាទីកន្លែងមួយសម្រាប់និស្សិត និងក្រុមហ៊ុនរបស់ពួកគេស្នាក់នៅ។
ក្រៅពីកម្ពុជា បារាំងស្វែងរកការគាំទ្រពីប្រទេស១៧០ផ្សេងទៀត។ ប្រទេសម្ចាស់ផ្ទះរៀបចំពិព័រណ៍នេះនឹងត្រូវជ្រើសរើសជាផ្លូវការ នៅខែវិច្ឆិកាឆ្នាំ២០១៨ តាមរយៈការបោះឆ្នោតគាំទ្រពីប្រទេសចំនួន១៧០នេះ បូករួមទាំងកម្ពុជាដែរ។
សូមបញ្ជាក់ថា ពិព័រណ៍ពិភពលោកឆ្នាំ២០២៥ត្រូវបានរៀបចំឡើងនៅរៀងរាល់៥ឆ្នាំម្ដង។ កន្លងមកពិព័រណ៍ពិភពលោកនេះត្រូវបានរៀបចំនៅទីក្រុងសៀងហៃ និងឌូបៃ។ ហើយពិព័រណ៍ពិភពលោក នៅឆ្នាំ២០២៥ ខាងមុខនេះ គឺជាព្រឹត្តការណ៍នៃការប្រកួតប្រជែងគ្នាដ៏ខ្លាំងមែនទែន។ ក្នុងពេលបច្ចុប្បន្ននេះមានប្រទេសចំនួន១២០ហើយបានចូលរួម។ ចំណែកកម្ពុជាបានចូលរួមពិព័រណ៍ពិភពលោកចាប់តាំងពីឆ្នាំ១៩៩៧មកម្លេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ