គណបក្សសង្គ្រោះជាតិនៅមិនទាន់ច្បាស់ពីការដើរដង្ហែក្បួនតាមដងផ្លូវ
គិតត្រឹមព្រឹកថ្ងៃអាទិត្យទី១៥ ធ្នូនេះ គណបក្សសង្គ្រោះជាតិនៅមិនទាន់ច្បាស់លាស់ពីគម្រោងការដើរដង្ហែក្បួននៅតាមទីសាធារណៈក្នុងបាតុកម្មមួយថ្ងៃម្តងៗរបស់ខ្លួននោះទេ។ មន្ត្រីជាន់ខ្ពស់គណបក្សសង្គ្រោះជាតិបានបញ្ជាក់ថា ពួកគេត្រូវរងចាំការណែនាំពីមេដឹកនាំគណបក្សគឺ លោក សម រង្ស៊ី និងលោក កឹម សុខា នៅពេលជួបជុំរសៀលថ្ងៃអាទិត្យនេះ។ ប៉ុន្តែសាលារាជធានីភ្នំពេញ នៅមិនទាន់បានទទួលលិខិតជូនដំណឹងណាមួយស្តីពីមហាបាតុកម្មរៀងរាល់ថ្ងៃរបស់បក្សប្រឆាំងនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
គណបក្សសង្គ្រោះជាតិ ហាក់នៅមិនទាន់ច្បាស់ថាតើគណបក្សនេះ នឹងត្រូវដង្ហែក្បួនចុះផ្លូវតវ៉ាដែរឬយ៉ាងណានោះទេសម្រាប់ការធ្វើបាតុកម្មបន្តបន្ទាប់របស់ខ្លួន។ នេះបើតាមការបញ្ជាក់ថារបស់លោក ហូ វ៉ាន់តំណាងរាស្ត្រមណ្ឌលភ្នំពេញ និងជាអ្នកទទួលបន្ទុកបាតុកម្មរបស់គណបក្សសង្គ្រោះជាតិ។
លោក ហូ វ៉ាន់ បានបញ្ជាក់ថា នៅថ្ងៃអាទិត្យនេះ បាតុករទាំងអស់គ្រាន់តែជួបជុំគ្នានៅទីលានប្រជាធិបតេយ្យប៉ុណ្ណោះ ដោយមិនការដើរដង្ហែក្បួនអ្វីនោះទេ។ ព្រោះថា បាតុករទាំងអស់ត្រូវរងចាំស្តាប់ការពន្យល់ពីសំណាក់មេដឹកនាំគណបក្ស គឺលោក សម រង្ស៊ី និងលោក កឹម សុខាដែលនឹងត្រូវថ្លែងទៅកាន់បាតុកគាំត្ររបស់ខ្លួននារសៀលនេះថាតើអ្វីជាយុទ្ធសាស្ត្រធ្វើបាតុកម្មជារៀងរាល់ថ្ងៃរបស់គណបក្ស។
គួរបញ្ជាក់ថាតាមគម្រោងដើមរបស់គណបក្សសង្គ្រោះជាតិ គណបក្សនេះនឹងត្រូវដើរដង្ហែក្បួននៅតាមផ្លូវមួយចំនួននារសៀលថ្ងៃអាទិត្យនេះ។ យ៉ាងណាក៏ដោយ គណបក្សសង្គ្រោះជាតិ មិនទាន់បានបញ្ជូនលិខិតជូនដំណឹងពីការធ្វើបាតុកម្មឥតឈប់ឈររបស់ខ្លួនដល់សាលារាជធានភ្នំពេញនៅឡើយនោះទេ។ ដោយរងចាំរហូតដល់ថ្ងៃចន្ទ ជាថ្ងៃធ្វើការ។
ប៉ុន្តែសាលារាជធានីភ្នំពេញ តាមរយៈលោក ឡុង ឌីម៉ង់ អ្នកនាំពាក្យ បានបញ្ជាក់ថា ប្រសិនបើគណកប្សសង្គ្រោះជាតិប្តូរមកធ្វើបាតុកម្មជារៀងរាល់ថ្ងៃយ៉ាងដូចនេះ គណបក្សមួយនេះ យ៉ាងហោចណាស់ត្រូវជូនដំណឹងឱ្យបានមួយថ្ងៃមុនការធ្វើបាតុកម្មនោះដែរ។ លោក បានបន្តថា សាលារាជធានីភ្នំពេញមានទីតាំងមួយជាអចិន្ត្រៃយ៍រងចាំទទួលលិខិតជូន ដំណឹងនៅក្បែរទីលានប្រជាធិបតេយ្យផ្ទាល់តែម្តង។
គួរបញ្ជាក់ថា គណបក្សសង្គ្រោះជាតិ បានប្តូរការធ្វើបាតុកម្មពីមួយសប្តាហ៍ម្តងៗ មកជាបាតុកម្មជារៀងរាល់ថ្ងៃវិញ បន្ទាប់ពីមានកិច្ចប្រជុំគណៈអចិន្ត្រៃគណបក្សកាលពីថ្ងៃសុក្រ ១៣ធ្នូនេះ។ គណបក្សសង្គ្រោះជាតិអះអាងថា ការធ្វើបាតុកម្មជារៀងរាល់ថ្ងៃដើម្បីទាមទារឱ្យបក្សកាន់អំណាចយល់ព្រមបោះឆ្នោតជាតិសារឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ