កម្ពុជាសាទរថ្ងៃចុះបញ្ជីប្រាសាទព្រះវិហារជាសម្បត្តិបេតិកភណ្ឌពិភពលោក
ថ្ងៃ៧កក្កដា ឆ្នាំ២០១១នេះ ជាខួបគម្រប់ ៣ឆ្នាំ ថ្ងៃចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក។ ពិធីសាទរទ្រង់ទ្រាយធំត្រូវបានធ្វើឡើងនៅប្រាសាទព្រះវិហារ។ តាមវត្តអារាម និងសាលារៀន នៅទូទាំងប្រទេស បានទូងស្គរ និងវាយជួង ដើម្បីជាសញ្ញាឧទ្ទិសដល់ថ្ងៃជាប្រវត្តិសាស្ត្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ប្រាសាទព្រះវិហារត្រូវបានដាក់ជាសម្បត្តិបេតិកភណ្ឌពិភពលោក កាលពីថ្ងៃទី៧ កក្កដា ឆ្នាំ២០០៨។ នៅថ្ងៃ៧កក្កដា ២០១១នេះ ជាថៃខួប ៣ឆ្នាំ។ មន្ត្រីរដ្ឋាភិបាល កងទ័ពនៅសមរភូមិមុខ និងប្រជាជនកម្ពុជាទូទាំងប្រទេស បានប្រារព្ធពិធីជួបជុំយ៉ាងអធិកអធម ដើម្បីសាទរថ្ងៃដ៏វិសេសវិសាល ជាប្រវត្តិសាស្ត្រនេះ។
ពិធីជួបជុំទ្រង់ទ្រាយធំត្រូវបានធ្វើឡើងនៅភូមិធម្មជាតិសម្តេចតេជោ ជិតប្រាសាទព្រះវិហារ ដោយមានការចូលរួមពីលោក ជុច ភឿន រដ្ឋលេខាធិការក្រសួងវប្បធម៌ និងជាប្រធានអាជ្ញាធរជាតិព្រះវិហារ លោកនាយឧត្តមសេនីយ៍ ជា តារា មេទ័ពប្រចាំសមរភូមិមុខ ព្រមទាំងកងទ័ពឈរជើងនៅសមរភូមិជាច្រើនរូបទៀត។
ដើម្បីសាទរថ្ងៃចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក កាលពីម៉ោង ៧ ព្រឹកថ្ងៃទី៧កក្កដានេះ តាមវត្តអារាមនានា ក៏បានទូងស្គរព្រមៗគ្នា។ ដោយឡែក នៅភ្នំពេញ ពិធីសាទរត្រូវបានអាជ្ញាធរក្រុងរៀបចំធ្វើនៅម៉ោង ១០ព្រឹក។ នៅតាមវត្តអារាម គ្រឹះស្ថានរដ្ឋ និងសាលារៀន មានពិធីជួបជុំព្រះសង្ឃ មន្ត្រីរាជការ និងសិស្សសាលា ដើម្បីទូងស្គរ និងវាយជួង នៅម៉ោង ១០ ព្រឹក។ មន្ត្រីរាជការ និងសិស្សសាលា ក៏បានប្រមូលផ្តុំតាមស្ថាប័ននីមួយៗ ដោយមានកាន់ទង់ជាតិ និងទង់អង្គការយូណេស្កូលើកគ្រវី ព្រមទាំងច្រៀងបទពង្សាវតារខ្មែរ។
ជាការកត់សម្គាល់ ក្នុងពិធីសាទរថ្ងៃដាក់ប្រាសាទព្រះវិហារ ជាសម្បត្តិបេតិកភណ្ឌពិភពលោក នៅប្រាសាទព្រះវិហារ ចាប់តាំងពីថ្ងៃម្សិលមិញ មកដល់ថ្ងៃ៧កក្កដានេះ មន្ត្រីជាន់ខ្ពស់កម្ពុជាបានលើកបង្ហាញដល់អ្នកកាសែត ពីការវាយប្រហាររបស់ថៃ មកលើកម្ពុជាជាបន្តបន្ទាប់ ចាប់តាំងពីថ្ងៃ១៥កក្កដា ឆ្នាំ២០០៨។ គ្រាប់កាំភ្លើងរបស់ទាហានថៃ ចំនួន ៤១៤គ្រាប់ រួមទាំងគ្រាប់បែកចង្កោមរាប់រយគ្រាប់ ដែលបានបំផ្លាញប្រាសាទព្រះវិហារ ក៏ត្រូវបានលើកឡើង ក្នុងពិធីជួបជុំផងដែរ។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានអះអាងថា ព្រឹត្តិការណ៍សាទររបស់កម្ពុជានៅថ្ងៃនេះ មិនមែនជាការបង្កជម្លោះ ឬការលាបពណ៌ វាយប្រហារ ប្រឆាំងប្រទេសណាទេ។ កម្ពុជាគ្រាន់តែបង្ហាញការពិតនូវអ្វីដែលបានកើតឡើងលើប្រាសាទព្រះវិហារ ដែលជាសម្បត្តិរបស់មនុស្សជាតិតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ