កំណើនសេដ្ឋកិច្ចនៅតែត្រូវរំខាន បើទោះជាមានចលនាសប្បុរសធម៌ក៏ដោយ
ចុះផ្សាយនៅថ្ងៃ៖
ស្តាប់ - ០៣:៤៨
កំណើនសេដ្ឋកិច្ចរបស់កម្ពុជាអាចប្រឈមនឹងឧបសគ្គ ក្រោយទឹកជំនន់ ខណៈបរិយាកាសតានតឹងនយោបាយ ក៏បានបង្កអោយវិនិយោគិនរារែកក្នុងការដាក់ទុននៅកម្ពុជាហើយនោះ។ ផ្ទុយទៅវិញ ចលនាសប្បុរសធម៌របស់ពលរដ្ឋខ្មែរ ដែលប្រមូលមូលនិធិ សម្រាប់ជួយជនរងគ្រោះ វាក៏បានធ្វើចលនាសេដ្ឋកិច្ចរស់រវើកបន្តិចខ្លះដែរ តាមរយៈការបង្កើតអោយមានការទិញដូរច្រើន និងបានជួយរួមចំណែករដ្ឋាភិបាលក្នុងការបញ្ចេញធនធានជួយអ្នករងគ្រោះទាំងស្រុងនោះ។ ទោះយ៉ាងនេះក្តី រដ្ឋក៏នៅតែខាតបង់ក្នុងការងារស្តារការខូចខាត។
ខណៈដែលស្ថានភាពតានតឹងផ្នែកនយោបាយ បានរារាំងវិនិយោគិនមួយចំនួនមិនអោយបោះទុន និងពង្រីកទុនវិនិយោគរបស់ខ្លួននៅកម្ពុជានោះ នៅពេលនេះកម្ពុជាកំពុងជួបវិបត្តិមួយថ្មីទៀត ដែលបង្កផលប៉ះពាល់ដល់វិស័យសេដ្ឋកិច្ចរបស់ខ្លួន។ នោះគឺទឹកជំនន់។
ស្ថាប័នធានាគារអន្តរជាតិដូចជា ធនាគារអភិវឌ្ឍន៍អាស៊ី ADB និងធនាគារពិភពលោក World Bank បានបង្ហាញការព្យាករណ៍កំណើនសេដ្ឋកិច្ចរបស់កម្ពុជា ថាមានក្នុងរង្វង់ ៧ភាគរយក៏ពិតមែន ប៉ុន្តែ ការវាយតម្លៃទាំងនោះត្រូវបានធ្វើឡើងមុនមានគ្រោះមហន្តរាយទឹកជំនន់។
មន្ត្រីជាន់ខ្ពស់របស់គណៈកម្មាធិការជាតិគ្រប់គ្រងគ្រោះមហន្តរាយ បានថ្លែងប្រាប់សារព័ត៌មាន ក្នុងពេលកន្លងមកហើយថា ការខូចខាតដោយទឹកជំនន់នៅពេលនេះ អាចមានតម្លៃស្មើពាក់កណ្តាលនៃគ្រោះមហន្តរាយឆ្នាំ២០១១។ ឆ្នាំ២០១១ ដែលការខូចខាតមានទំហំជាង៥០០លានដុល្លារ។ ដូច្នេះ គេអាចយល់បានហើយថា យ៉ាងហោចណាស់ រដ្ឋនឹងខាតបង់ទឹកប្រាក់ចំនួន២៥០លានដុល្លារដែរ ទៅក្នុងគ្រោះទឹកជំនន់ដែលបានលិចលង់ខេត្តរាជធានីចំនួន២០ នៅពេលនេះ។
តើអ្វីខ្លះជាការខូចខាតដែលធ្វើអោយប៉ះពាល់ដល់ដំណើរការសេដ្ឋកិច្ចកម្ពុជា ដែលកើតចេញពីគ្រោះទឹកជំនន់?
ទីមួយ គឺការខូចខាតដោយផ្ទាល់។ ទឹកជំនន់ទឹកភ្លៀងបានកើតឡើងយ៉ាងលឿនដែលបានលិចលង់ដំណាំ បន្លែបង្ការ និងផ្ទះសម្បែងរបស់ពលរដ្ឋ។ ដំណាំទាំងនោះដែលមិនត្រូវការការជន់លិចទឹកជ្រៅនោះ ត្រូវខូចខាត។ ផ្ទះសម្បែងក៏ត្រូវបំផ្លាញ និងគ្រួសារខ្លះក៏ត្រូវបាត់បង់សមាជិកដោយសារតែទឹកជំនន់។ ហេដ្ឋារចនាសម្ព័ន្ធផ្លូវថ្នល់ ក៏ត្រូវដាច់ខូចខាតដោយអន្លើៗជាច្រើនកន្លែង។ ដោយសារតែទឹកជន់ ពលរដ្ឋអ្នកដែលធ្លាប់ប្រកបរបររកស៊ីប្រចាំថ្ងៃនៅតាមផ្ទះក៏ត្រូវអាក់ខាន។ ពលរដ្ឋមួយចំនួនទៀត ក៏ត្រូវផ្អាកឈប់សំរាកពីការងារដែលនៅឆ្ងាយ ដោយពួកគេត្រូវនៅជួយថែរក្សាក្រុមគ្រួសារ។ ជំងឺ និងបញ្ហាសុខភាព ក៏ត្រូវកើតមានឡើងដែរលើពលរដ្ឋរងគ្រោះទាំងនោះ។ ទាំងនេះសុទ្ធតែជាការខាតបង់។
ទី២ ផលប៉ះពាល់ដោយប្រយោលវិញ មានពាក់ព័ន្ធដោយនឹងការផ្គត់ផ្គង់បន្លែ ផ្លែឈើរបស់ប្រជាកសិករទៅលើទីផ្សារ។ ការខ្វះខាតនេះហើយ ដែលនឹងធ្វើអោយមានអតិផរណានៃតម្លៃបន្លែ ផ្លែឈើ។ និយាយអំពីអតិផរណានេះវិញ វាត្រូវកើតមានផងដែរ នៅពេលមានចលនាសង្គមដែលកំពុងប្រមូលមូលនិធិទិញសម្ភារៈ និងគ្រឿងបរិភោគអោយជនរងគ្រោះដោយទឹកជំនន់។ ទឹកជំនន់ក៏បានធ្វើអ្នកទេសចរក្នុងស្រុក ផ្អាកគម្រោងដើរកំសាន្តរបស់ខ្លួនផងដែរ។
រីឯការលិចលង់ដីស្រែចំការ ដែលធ្វើអោយអាក់ខានដល់ការធ្វើស្រែ ឬធ្វើចំការនោះ ក៏បានធ្វើអោយរដ្ឋបាត់បង់ចំណូលពន្ធ ដោយសារតែគ្មានសកម្មភាពកសិកម្មទាំងនេះដែរ។
តាមពិតទៅ និយាយមកដល់ត្រង់នេះ ក៏មិនមែនមានន័យថា វាមានតែការខាតបង់ ឬក៏ថាសកម្មភាពសេដ្ឋកិច្ចត្រូវធ្លាក់ខ្សោយនោះទេ។ សកម្មភាពសេដ្ឋកិច្ចបានបង្ហាញសញ្ញារស់រវើកខ្លាំងជាងពេលធម្មតាផង ដោយសារតែចលនាសប្បុរសធម៌របស់ពលរដ្ឋខ្មែរ។
មូលនិធិជាច្រើនត្រូវបានបង្កើតឡើងជាលក្ខណៈឯកជនក៏មាន នៅតាមបណ្តាគណបក្សនយោបាយក៏មាន ស្ថានប័នរដ្ឋនានា និងមន្ត្រី រដ្ឋាភិបាលផងក៏បានបញ្ចេញថវិកាយ៉ាងច្រើនទៅលើទីផ្សារ ដើម្បីទិញសម្ភារៈ និងអាហារចែកជូនជនរងគ្រោះដោយទឹកជំនន់។ នៅពេលនេះហើយដែលគេអាចមើលឃើញ ការបែងចែកភោគផលពីអ្នកមាននៅទីប្រជុំជន ទៅអ្នកក្រីក្រនៅតាមជនបទនោះ ហើយសកម្មភាពពាណិជ្ជកម្មក៏រស់រវើកទៅតាមណឹងដែរ។
ក៏ប៉ុន្តែ ទោះយ៉ាងនេះក៏ដោយ ជំនួយវិភាគទានពីមហាជន គ្រាន់តែជួយសម្រាលបន្ទុករដ្ឋាភិបាលបានបន្តិចប៉ុណ្ណោះ។ ជាជំនួយបន្ទាន់ សម្រាប់រយៈពេលខ្លីមុនទឹកស្រក ហើយពលរដ្ឋអាចត្រឡប់ទៅលំនៅដ្ឋានវិញ។
បានន័យថា រដ្ឋត្រូវត្រៀមបម្រុងហិរញ្ញវត្ថុទំហំធំមួយ ដើម្បីស្តារស្ថានភាពអោយធម្មតាវិញ។ ការជួសជុលហេដ្ឋារចនាសម្ព័ន្ធផ្លូវថ្នល់ ការផ្តល់ជំនួយនានាក្នុងការងារកសិកម្មដល់ពលរដ្ឋ។ទាំងនេះសុទ្ធតែជាបន្ទុករបស់រដ្ឋ។ នេះគេនៅមិនទាន់គិតអំពីការកើនឡើងបំណុលរបស់កសិករ ដែលបានខ្ចីគ្រឹះស្ថានមីក្រូហិរញ្ញវត្ថុផង។
ដូច្នេះ សរុបសេចក្តីមកវិញ ទឹកជំនន់នៅក្នុងឆ្នាំនេះ បើទោះជាវាមានរយៈពេលខ្លីមែន តែវានឹងរំខានដល់កំណើនសេដ្ឋកិច្ចរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ