សហភាពអឺរ៉ុបប្រកាសចាប់ផ្តើមអនុវត្តដំណើរការដកប្រព័ន្ធអនុគ្រោះពន្ធដល់កម្ពុជា តែទុកទ្វារចរចា
សហភាពអឺរ៉ុបបានបញ្ជាក់ជំហរជាថ្មីទៀតថា ខ្លួនចាប់ផ្តើមអនុវត្តដំណើរការដកប្រព័ន្ធអនុគ្រោះពន្ធដល់កម្ពុជា តែថានៅបើកទ្វារចំហសម្រាប់ការសន្ទនាទាក់ទងនឹងការបន្តគោលនយោបាយអនុគ្រោះពន្ធដល់កម្ពុជាក្នុងការនាំទំនិញទៅកាន់ទីផ្សារប្រទេសលោកសេរី ដោយរួចពន្ធ។ ជាមួយគ្នានេះ សហភាពអឺរ៉ុប បានព្រមានថា ការអនុគ្រោះពន្ធនឹងត្រូវបញ្ចប់ បើកម្ពុជាមិនកែលម្អ ផ្នែកសិទ្ធិមនុស្ស។ នេះជាការលើកឡើងរបស់លោកស្រី Cecilia Malstrom ស្នងការអឺរ៉ុបសម្រាប់ពាណិជ្ជកម្ម ខណៈលោកស្រីចូលរួមកិច្ចប្រជុំថ្នាក់រដ្ឋមន្រ្តីក្រៅផ្លូវការមួយនៅប្រទេសអូទ្រីសកាលពីម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
«ដោយមិនចាំបាច់រៀបរាប់បន្តទៀត យើងនឹងរក្សាកាណាល់នៃការសន្ទនាជាមួយប្រទេសទាំងពីរនេះឲ្យនៅបើកចំហ ហើយយើងក៏នឹងជូនដំណឹងទៅរដ្ឋជាសមាជិកនៃសហភាពអឺរ៉ុប អំពីជំហានបន្ទាប់ទៀត»។ នេះជាការលើកឡើងរបស់លោកស្រី Cecilia Malstrom ស្នងការអឺរ៉ុបសម្រាប់ពាណិជ្ជកម្ម ដោយបញ្ជាក់ចំៗមកកាន់ប្រទេសកម្ពុជា និងប្រទេសភូមា។
លោកស្រី Cecilia Malstrom បានគូសបញ្ជាក់ថា ប្រទេសទាំងពីរនេះមិនទាន់ស្ថិតនៅមុខមាត់ជ្រោះនៅឡើយទេ ពោលគឺនៅតែមានពេលវេលាសម្រាប់ប្រទេសកម្ពុជា និងភូមា ដើម្បីដកខ្លួនចេញពីមាត់ចំណោតនេះ។ ទោះជាយ៉ាងនេះក្តី លោកស្រីបានព្រមានថា «ផលវិបាកនៃដំណើរការសម្រាប់ប្រទេសទាំងពីរនេះ នឹងបានឃើញច្បាស់នឹងភ្នែកជាមិនខាន»។
ពីក្នុងទីក្រុង Innsbruck នៃប្រទេសអូទ្រីស ជាកន្លែងដែលមានកិច្ចប្រជុំថ្នាក់រដ្ឋមន្រ្តីក្រៅផ្លូវការ ស្នងការអឺរ៉ុបសម្រាប់ពាណិជ្ជកម្មរូបនេះ បានបញ្ជាក់ថា នេះជាមធ្យោបាយឆ្ពោះទៅមុខដើម្បីកំណែទម្រង់ចាំបាច់បំផុត នៃអង្គការពាណិជ្ជកម្មពិភពលោក (WTO)។ ជារបៀបវារៈសំខាន់របស់សហភាពអឺរ៉ុប ក៏ដូចជាទំនាក់ទំនងពាណិជ្ជកម្មជាមួយនឹងសហរដ្ឋអាមេរិកផងដែរ។
ប៉ុន្តែលោកស្រី Cecilia Malstrom បញ្ជាក់ថា របៀបវារៈអំពីស្ថានភាពសិទ្ធិមនុស្សនៅភូមា និងកម្ពុជា ត្រូវបានលើកឡើងនៅក្នុងសន្និសីទសារព័ត៌មានកាលពីម្សិលមិញ។
ករណីភូមា សហភាពអឺរ៉ុបបានឃើញស្ថានការណ៍ព្រួយបារម្ភនិងធ្ងន់ធ្ងរចំពោះជនជាតិភាគតិចរ៉ូហ៊ីនយ៉ា(Rohingya)។ ចំណែកនៅកម្ពុជា សហភាពអ៊ឺរ៉ុប បានកត់សំគាល់ថា «កំពុងឃើញការវិវត្តន៍ប្រកបដោយបញ្ហាខ្លាំង ដោយគ្មានការកែលម្អគួរឲ្យទុកចិត្តបានឡើយ»។
ការរំលោភធ្ងន់ធ្ងរនិងជាប្រព័ន្ធ សេរីភាពខាងការបញ្ចេញមតិ សិទ្ធិការងារ និងសេរីភាពខាងសមាគម ដែលកើតឡើងជាយូរមកហើយរាប់ទាំងសិទ្ធិកម្មករ និងការដណ្តើមយកដីធ្លីដែលទាំងនេះគឺជាការគូសបញ្ជាក់ជាថ្មីទៀតរបស់លោកស្រីស្នងការអឺរ៉ុបសម្រាប់ពាណិជ្ជកម្ម។
យ៉ាងណាក៏ដោយ លោកស្រី Cecilia Malstrom បានឲ្យដឹងថា ប្រទេសកម្ពុជា កំពុងស្ថិតក្នុងជំហានមួយបន្តក្នុងដំណើរការវាយតម្លៃពីសហភាពអឺរ៉ុប ដោយសារតែការធ្វើដំណើរថយក្រោយនៃលទ្ធិប្រជាធិបតេយ្យ។ ការដើរថយក្រោយ ដែលមន្រ្តីសហភាពអឺរ៉ុបបានមកកាន់ប្រទេសកម្ពុជា ហើយកត់សំគាល់ថា មានការរុកគួន និងការបំភិតបំភ័យ ការរឹតបន្តឹងពាក់ព័ន្ធនឹងសិទ្ធិនយោបាយដ៏សំខាន់។
នៅក្រោមបញ្ហាទាំងនេះ ទើបសហភាពអឺរ៉ុបបានជូនដំណឹងទៅប្រទេសកម្ពុជាថាខ្លួន«កំពុងអនុវត្តដំណើរការសម្រាប់ការដកហូតនូវការអនុគ្រោះអ្វីៗទាំងអស់លើកលែងតែសព្វាវុធ បើសិនជាគ្មានការកែលម្អច្បាស់លាស់និងជាភស្តុតាងជាក់ស្តែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ