ទិវាសិទ្ធិមនុស្ស៖ ការពង្រឹងសិទ្ធិជាមូលដ្ឋានរបស់សហគមន៍ក្រីក្រជាប្រធានបទរបស់សាលារាជធានីភ្នំពេញ
«ភាពជាដៃគូរវាងរដ្ឋបាលរាជធានីភ្នំពេញនិងសង្គមស៊ីវិល ដើម្បីពង្រឹងសិទ្ធិជាមូលដ្ឋានរបស់សហគមន៏ក្រីក្រ» ជាប្រធានបទរបស់សាលារាជធានីភ្នំពេញ ក្នុងឱកាសប្រារព្ធទិវាសិទ្ធិមនុស្ស អន្តរជាតិលើកទី៦៥ នៅឯពហុកីឡដ្ឋានជាតិអូឡាំពិក កាលពីព្រឹកថ្ងៃទី១០ធ្នូនេះ។ បន្ទាប់ពីអភិបាលសាលារាជធានីថ្លែងថា ការសហការគ្នាកាន់តែជិតស្និទឡើងជាមួយសង្គមស៊ីវិល ជួយពន្លឿនការកាត់បន្ថយគម្លាតរវាងសហគមន៍ក្រីក្រ និង សហគមន៍សម្បូរសប្បាយនៅភ្នំពេញ តំណាងការិយាល័យឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិអោយអាជ្ញាធរយកប្រជាជនជាស្នូលក្នុងគម្រោងអភិវឌ្ឍន៍និងក្នុងការដោះស្រាយបញ្ហាគម្រោងអភិវឌ្ឍន៍ ដោយផ្អែកលើអភិក្រមសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
«ភាពជាដៃគូរវាងរដ្ឋបាលរាជធានីភ្នំពេញនិងសង្គមស៊ីវិល ដើម្បីពង្រឹងសិទ្ធិជាមូលដ្ឋានរបស់សហគមន៏ក្រីក្រ» ជាប្រធានបទរបស់សាលារាជធានីភ្នំពេញ ដែលអបអរសិទ្ធិមនុស្ស នៅឯពហុកីឡដ្ឋានជាតិអូឡាំពិក កាលពីព្រឹកថ្ងៃទី១០ធ្នូនេះ។ នៅឆ្នាំ២០១៣ វាជាការអបអរទិវាសិទ្ធិមនុស្សអន្តរជាតិលើកទី៦៥ ប៉ុន្តែជាលើកទី១ ដែលរដ្ឋបាលសាលារាជធានី ក្រោមអណត្តិរបស់លោប៉ា សុជាតិវង្ស រៀបចំទិវាសិទ្ធិមនុស្សនេះ។
លោកអភិបាលសាលារាជធានីបានអះអាងថា បើសិនជាអង្គការសង្គមស៊ីវិលទាំងអស់រួមគ្នាជាមួយរដ្ឋអំណាចសាលារាជធានីភ្នំពេញបានល្អប្រសើរ យើងអាចពន្លឿនការអភិវឌ្ឍន៏និងកាត់បន្ថយភាពក្រីក្រនៅតាមសហគមន៍នានាបានកាន់តែលឿន។ លោកប៉ា សុជាតិវង្សបន្តថា រដ្ឋាភិបាលកម្ពុជាបានបញ្ជាអោយសាងសង់លំនៅដា្ឋនជូនប្រជាពលរដ្ឋនៅក្នុងសហគមន៍ក្រីក្រនានា ដើម្បីធ្វើឱ្យប្រជាជនមានភាពកក់ក្តៅនិងសុខដុម ក្រោមការដឹកនាំរបស់រដ្ឋាភិបាលអាណត្តទី៥។
ប្រកបដោយ«សុទិដ្ឋិនិយម»ចំពោះអនាគតដ៏ខ្លីខាងមុខ ក្នុងការកែប្រែសហគមន៍ក្រីក្រនៅក្រុងភ្នំពេញ ឱ្យទៅជាសហគមន៍ដែលជឿនលឿន លោកអភិបាលថ្មី ដែលបានឡើងកាន់តំណែងចាប់ពីខែឧសភាជំនួសលោក កែប ជុតិមា បានអំពាវនាឱ្យអាជ្ញាធរមូលដ្ឋាន ប្រធានសហគមន៍ទាំងអស់ចាប់ផ្តើមគិតគូរអំពីសហគមន៍របស់ខ្លួន។ លោកអភិបាលសង្កត់ធ្ងន់ថា ការសហការគ្នានេះគឺដើម្បីលើកស្ទួយ«វប្បធម៌ចែករំលែក» និងដើម្បី«កាត់បន្ថយគម្លាត»រវាងសហគមន៍ក្រីក្រនិងសហគមន៍សម្បូរសប្បាយនៅក្នុងរាជធានីភ្នំពេញ។
អ្នកតំណាងការិយាល័យឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិបានស្នើរដល់អាជ្ញាធរអោយយកប្រជាជនជា«ស្នូល»ក្នុងគម្រោងអភិវឌ្ឍ និងក្នុងការដោះស្រាយបញ្ហាគម្រោងអភិវឌ្ឍ ដោយផ្អែកលើអភិក្រមសិទ្ធិមនុស្ស។ លោកស្រី Anne-Marie Dominique Parente ដែលសង្ឃឹមថា រដ្ឋបាលខេត្តក្រុងផ្សេងៗទៀតយកគំរូតាម«វប្បធម៌ថ្មី»របស់សាលារាជធានីភ្នំពេញ ក្នុងការប្រារព្ធទិវាសិទ្ធិមនុស្សនេះ បានថ្លែងថា ប្រជាជនក្រីក្រនៅភ្នំពេញ ដែលក្នុងនោះមាន កុមារកំព្រា ស្ត្រី ជនពិការ និងអ្នកដែលត្រូវគេបណ្តេញចេញពីដីធ្លី គឺងាយរងគ្រោះបំផុត ហើយថា ជាញឹកញាប់ពួកគេមិនអាចទទួលបានការបម្រើពីរដ្ឋអំណាចឡើយ។ នេះជាហេតុដែលនាំឱ្យពួកគេ«បន្តស្ថិតក្នុងភាពក្រីក្រ និងឈឺចាប់» នេះបើតាមការអត្ថាធិប្បាយរបស់តំណាងការិយាល័យសិទ្ធិមនុស្សនៃអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ