លោក ហ៊ុន សែន៖ ប្រព័ន្ធពាណិជ្ជកម្មពហុភាគីនៅលើពិភពលោក កំពុងរងការគំរាមកំហែង
អន្តរកិច្ចប្រជុំថ្នាក់រដ្ឋមន្ត្រីលើកទី៧ ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ត្រូវបានរៀបចំឡើងនៅឯខេត្តសៀមរាប នាថ្ងៃសៅរ៍នេះ ដោយមានការចូលរួមពីតំណាងប្រទេសជាដៃគូសេដ្ឋកិច្ចទាំង១៦ នៅក្នុងតំបន់អាស៊ី។ ក្រៅពីសម្ដែងការស្វាគមន៍ក្នុងនាមជាម្ចាស់ផ្ទះរៀបចំកិច្ចប្រជុំ លោកនាយករដ្ឋមន្រ្តី ហ៊ុន សែន បានថ្លែងថា ប្រព័ន្ធពាណិជ្ជកម្មពហុភាគីនៅលើពិភពលោក កំពុងស្ថិតក្នុងស្ថានភាពតានតឹង និងកំពុងប្រឈមនឹងការគំរាមកំហែង។
ចុះផ្សាយនៅថ្ងៃ៖
នៅចំពោះមុខរដ្ឋមន្រ្តី មកពីបណ្តាប្រទេសទាំង១៦ ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ប្រមុខរដ្ឋាភិបាលកម្ពុជា លោក ហ៊ុន សែន បានថ្លែងថា ក្នុងពិភពលោកទាំងមូល ប្រព័ន្ធពាណិជ្ជកម្មពហុភាគី ដែលមានលក្ខណៈសេរី និង បើកចំហ កំពុងស្ថិតក្នុងស្ថានភាពតានតឹង និង កំពុងប្រឈមនឹងការគំរាមកំហែង។ ស្ថិតក្នុងភាពគំរាមកំហែង បើតាម លោក ហ៊ុន សែន គឺ ដោយសារប្រទេសមួយចំនួន រួមទាំងបញ្ហាប្រទេសមហាអំណាចធំៗ ប្រកាន់យកគោលនយោបាយឯកតោភាគីនិងទ្វេភាគីដែលគិតតែផលប្រយោជន៍ផ្ទាល់ខ្លួនធ្វើឱ្យគំនិតគាំពារនិយមមានការកើនឡើង ហើយអាចធ្វើឱ្យមានផលប៉ះពាល់ដល់ការធ្វើពាណិជ្ជកម្មសេរីនៅក្នុងតំបន់របស់ប្រទេសសមាជិក ACEP។
ប្រទេសជាសមាជិកACEP ទាំង១៦ប្រទេសគឺមានសមាជិកអាស៊ានទាំង១០ បូកនឹង បណ្តាប្រទេសជាដៃគូពាណិជ្ជកម្មចំនួន៦ទៀត រួមមាន អូស្រ្តាលី ចិន ឥណ្ឌា ជប៉ុន កូរ៉េខាងត្បូង និងនូវែលហ្សេឡង់។ ប្រជាជនសរុបទាំង ១៦ប្រទេសនេះ មានរហូតដល់ ៤៥%នៃចំនួនប្រជាជនសរុបនៅលើពិភពលោក ខណៈផលិតផលក្នុងស្រុកសរុបជិត៣០%នៃផលិតផលក្នុងស្រុកសរុបរបស់ពិភពលោកទាំងមូល។ ចំណែកពាណិជ្ជកម្មរបស់ប្រទេសជាសមាជិក ACEPគឺមាន២៨,៥% នៃពាណិជកម្មពិភពលោក ។
បើតាម លោក ហ៊ុន សែន ប្រទេសសមាជិក ACEP ត្រូវរួមគ្នាខិតខំប្រឹងប្រែង ដើម្បីបញ្ចប់ការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ឱ្យបានទាន់ពេលវេលា ស្របពេលកម្ពុជាត្រូវធ្វើការកែទម្រង់លិខិតបទដ្ឋានច្បាប់មួយចំនួន និង ត្រូវធ្វើតាមការសម្របសម្រួលជាមួយប្រទេសជាដៃគូដទៃទៀត។
គួរឲ្យដឹងថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ត្រូវគេរំពឹងថា នឹងបញ្ចប់ជាស្ថាពរក្នុងឆ្នាំ២០១៩ ស្របតាមការប្តេជ្ញាចិត្តរបស់ថ្នាក់ដឹកនាំនៅក្នុងកិច្ចប្រជុំកំពូល RCEP លើកទី ២ កាលពីខែ វិច្ឆិកា ឆ្នាំ ២០១៨ នៅប្រទេសសិង្ហបុរី ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ