លោក កឹម សុខា បង្កើនវោហាសាស៍វាយប្រហាររដ្ឋាភិបាលពេលដាក់ជើងជាន់ដីអាមេរិក
លោក កឹម សុខា ប្រធានគណបក្សសង្គ្រោះជាតិ បន្ទាប់ពីដាក់ជើងជាន់ទឹកដីអាមេរិកសម្រាប់ថ្ងៃដំបូងនៃដំណើទស្សនកិច្ចរយៈពេលយូរ បានបង្កើនវោហាសាស៍ ដ៏កម្រវាយប្រហារមកលើរាជរដ្ឋាភិបាលកម្ពុជា ប្រាប់អ្នកគាំទ្ររបស់ខ្លួន ដែលជាអណិកជនខ្មែររស់នៅសហរដ្ឋអាមេរិក។ សម្រាប់អ្នកឃ្លាំមើលបានកត់សម្គាល់ថា នៅអាមេរិក លោក កឹម សុខា បានដំឡើងសំឡេងរិះគន់គូរ ប្រជែងខ្លាំងជាងមានវត្តមាននៅក្នុងស្រុក។
ចុះផ្សាយនៅថ្ងៃ៖
ស្តាប់ - ០២:៣០
នៅចំពោះមុខ អ្នកគាំទ្ររបស់ខ្លួន ដែលជាអណិកជនខ្មែររស់នៅសហរដ្ឋអាមេរិក លោក កឹម សុខា បានអះអាងថា គណបក្សសង្គ្រោះជាតិមានអ្នកគាំទ្រស្ទើរតែពាសពេញប្រទេស។ តាមរយៈការគាំទ្រគណបក្សសង្គ្រោះជាតិនេះ លោក កឹម សុខា បានធ្វើការសន្និដ្ឋានថា ប្រជាពលរដ្ឋសឹងតែគ្រប់ទីកន្លែងទាមទារឲ្យមានការផ្លាស់ប្ដូរជាវិជ្ជមាន តាមរយៈការបោះឆ្នោតនៅឆ្នាំ២០១៧ និង២០១៨។
បន្ទាប់ពីលើកសសើរប្រជាប្រិយភាពរបស់គណបក្សសង្គ្រោះជាតិលោក កឹម សុខា បានគូសបញ្ជាក់ថា គណបក្សសង្គ្រោះជាតិរងការធ្វើទុកបុកម្នេញយ៉ាងខ្លាំង ជាពិសេសគឺរូបលោកផ្ទាល់តែម្ដងតាមរយៈសំណុំរឿងតុលាការនានាដែលបង្ខាំងរូបលោកនៅទីស្នាក់ការបក្ស៦ខែ៦ថ្ងៃ។ ក្នុងន័យនេះលោក អះអាងថា ជាចេតនារបស់គូរប្រកួតធ្វើឲ្យរូបលោកភ័យខ្លាចដើម្បីរត់ចោលស្រុក។
លោក កឹម សុខា ក៏បានបង្វែរអារម្មណ៍អ្នកគាំទ្ររបស់ខ្លួន ឲ្យក្រឡេកមកមើលសេដ្ឋកិច្ចរបស់កម្ពុជាវិញម្ដង ដោយបានអះអាងថា ផលចំណេញពីកំណើនសេដ្ឋកិច្ចមិនបានចែកទៅប្រជាពលរដ្ឋទេ។ លោកបានចាត់ទុកសេដ្ឋកិច្ចរបស់កម្ពុជាសព្វថ្ងៃគ្មានចិរភាពសម្រាប់អ្នកជំនាន់ក្រោយទេ ព្រោះធនធានធម្មជាតិកំពុងត្រូវបានកាប់បំផ្លាញ។
លោក កឹម សុខា ក៏បានហៅសន្តិភាព សព្វថ្ងៃដែលរដ្ឋាភិបាលតែងតែធ្វើការអះអាងនោះជាសន្តិភាព មួយជ្រុងដោយមានអ្នកខ្លះជាប់គុក អ្នកខ្លះសប្បាយ។ សម្រាប់លោក កឹម សុខា ប្រសិនបើគណបក្សសង្គ្រោះជាតិដឹកនាំប្រទេសនឹងនាំមកនូវសន្តិភាពពេញលេញ។ ក៏គ្មានដែរសង្គ្រាមពេលសង្គ្រោះជាតិដឹកនាំប្រទេស។ លោកថា ការឃោសនាដែលថា នឹងមានសង្គ្រាមពេលសង្គ្រោះជាតិឈ្នះឆ្នោតគ្រាន់ជាការបន្លាចប្រជាពលរដ្ឋតែប៉ុណ្ណោះ។ បើតាមលោក កឹម សុខា នៅក្នុងដំណើរទស្សនកិច្ចរបស់លោកនៅក្រៅប្រទេសនាពេលកន្លងមក សូម្បីតែពិភពលោកក៏បានទទួលស្គាល់ថា ពលរដ្ឋខ្មែរចង់បានការផ្លាស់ប្ដូរដែរ។
លោក មាស នី អ្នកឃ្លាំមើលបញ្ហាសង្គម និងនយោបាយបានកត់សម្គាក់ថា ត្បិតតែលោកកឹម សុខា ដំឡើងសំឡេងខ្លាំងៗនៅក្រៅប្រទេសមែនពិត តែបញ្ហាដែលលោក កឹម សុខា លើកឡើងទាំងប៉ុន្មានបានកើតមានពិតប្រាកដមែន។ លោក មាស នី ក៏ ចាត់ទុកដំណើរទស្សនកិច្ចលោក កឹម សុខា នៅក្រៅប្រទេសគឺជាការផ្សារភ្ជាប់ទំនាក់ទំនងជាមួយអ្នកគាំទ្រ និងស្វែងរកប្រភពថវិកាបន្ថែម។
បើតាមគម្រោង លោក កឹម សុខា នឹងមានជំនួបជាមួយមន្ដ្រីសំខាន់ៗនៃរដ្ឋបាលលោកដូណាល់ត្រាំ ព្រមទាំងសមាជិករដ្ឋសភា ព្រឹទ្ធសភាអាមេរិក នៅរដ្ឋធានីវ៉ាស៊ីនតោន។ ប្រធានបក្សប្រឆាំងរូបនេះ ក៏គ្រោងជួបជាមួយពលរដ្ឋខ្មែរនៅតាមរដ្ឋនានានៅអាមេរិកចំនួន១០រដ្ឋផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ