លោកកឹម សុខា ទៅក្រៅប្រទេស ១០ថ្ងៃ ប៉ុន្តែមិនជួបលោកសម រង្ស៊ីទេ
លោក កឹម សុខា ប្រធានគណបក្សសង្រ្គោះជាតិ នៅព្រឹកថ្ងៃទី ០៥ មេសានេះ បានដឹកនាំមន្ត្រីជិតស្និទទៅបំពេញទស្សនៈកិច្ចនៅប្រទេសញូហ្សេលែន និងប្រទេសអូស្រ្តាលី រយៈពេល ១០ថ្ងៃ។ ដំណើរទស្សនៈកិច្ចនេះជាលក្ខណៈឯកជនរបស់បក្សដើម្បីជួបអ្នកគាំទ្រ និងជួបជាមួយមន្ត្រីជាន់ខ្ពស់នៃក្រសួងការបរទេសនៃប្រទេសទាំងពីរផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
លោកកឹម សុខាបានធ្វើដំណើរទៅកាន់បរទេសជាលើកទី ១ក្នុងនាមជាប្រធានគណបក្សសង្គ្រោះជាតិដែលជាបក្សប្រឆាំងធំជាងគេនៅកម្ពុជា។ ក្នុងដំណើរទស្សនៈរយៈពេល ១០ថ្ងៃនៅអូស្រ្តាលី និងញូហ្សេលែននេះ អមដំណើរដោយលោកអេង ឆៃអ៊ាង អនុប្រធានគណបក្ស និងកូនស្រីច្បង កញ្ញាកឹម មនោវិទ្យា លោកកឹម សុខានឹងជួបជាមួយអ្នកគាំទ្រគណបក្សទាំងពីរប្រទេស។ ក្រៅពីនេះ លោកកឹម សុខាក៏គ្រោងជួបជាមួយមន្ត្រីជាន់ខ្ពស់នៃក្រសួងការបរទេសនៃប្រទេសទាំងពីរផងដែរ។ នេះបើតាមការបញ្ជាក់ពីលោកអេង ឆៃអ៊ាងនៅថ្ងៃទី ០៥ មេសានេះ។ អនុប្រធានបក្សរូបនេះ បានបន្តទៀតថា លោកកឹម សុខា គឺនឹងវិលមកកម្ពុជាវិញនៅថ្ងៃទី ១៨ខាងមុខ។
ដំណើរទស្សនៈកិច្ចរបស់ប្រមុខបក្សប្រឆាំងនេះ គឺធ្វើឡើងបន្ទាប់ពីភាពចម្រូងចម្រាស់ស្តីពីបេក្ខភាពប្រធានគណបក្សរបស់លោកកឹម សុខា និងអនុប្រធានបីរូបផ្សេងទៀតដែលរួមមានលោកអេង ឆៃអ៊ាង លោកស្រីមួរ សុខហួរ និងលោកប៉ុល ហំម។ ភាពចម្រូងចម្រាស់គឺដោយសារតែក្រសួងមហាផ្ទៃមិនព្រមផ្តល់សុពលភាពដល់ក្បាលម៉ាស៊ីនគណបក្សថ្មីដោយសំអាងមូលហេតុថាខុសលក្ខន្តិកៈត្រង់ប្រការ ៤៧របស់ខ្លួនឯង។ ប៉ុន្តែក្រោយសង្គ្រាមប៉ាការបានផ្ទុះឡើងមួយរយៈពេលខ្លី គណបក្សសង្គ្រោះជាតិបានបញ្ជូនលក្ខន្តិកៈថ្មីជូនក្រសួងមហាផ្ទៃដើម្បីទទួលស្គាល់។ ប៉ុន្តែរហូតមកដល់ពេលនេះ ក្រសួងមហាផ្ទៃនៅមិនទាន់សម្រេចផ្តល់សុពលភាពទទួលស្គាល់លក្ខន្តិកៈថ្មីរបស់បក្សប្រឆាំងនៅឡើយ។ នេះបើតាមការបញ្ជាក់ពីលោក ខៀវ សុភ័គ អ្នកនាំពាក្យក្រសួងមហាផ្ទៃ។
សម្រាប់ដំណើរទស្សនៈកិច្ចនេះឯកជននេះ គណបក្សសង្គ្រោះជាតិបានអះអាងថាគ្មានគម្រោងជួបពិភាក្សាជាមួយលោក សម រង្ស៊ី ដែលជាអតីតប្រធានគណបក្សដែលកំពុងនិរទេសខ្លួននៅប្រទេសបារាំងនោះទេ។ ការជ្រើសរើសប្រទេសក្នុងទ្វីបអូសេអានីនេះ គឺដើម្បីពង្រឹងទំនាក់ទំនងជាមួយអ្នកគាំទ្រ ហើយក៏ដើម្បីផ្លាស់ប្តូរយោបល់ជាមួយប្រទេសប្រជាធិបតេយ្យទាំងពីរខណៈដែលការបោះឆ្នោតនៅក្រុមប្រឹក្សាឃុំសង្កាត់នៅមិនដល់ ២ខែទៀតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ