ពលករខ្មែរខុសច្បាប់នៅថៃអាចធ្វើបែបបទធ្វើការស្របច្បាប់នៅទីនោះតែម្តង
ស្ថានឯកអគ្គរាជទូតកម្ពុជាប្រចាំនៅក្នុងប្រទេសថៃកាលពីថ្ងៃព្រហស្បតិ៍ បានចេញសេចក្តីជូនដំណឹងមួយដល់ពលករខ្មែរខុសច្បាប់នៅថៃ ថាពួកគេអាចធ្វើបែបបទធ្វើការនិងស្នាក់នៅ ទីនោះ ស្របច្បាប់បានតែម្តង ដោយមិនចាំបាច់មកកម្ពុជាវិញនោះទេ។ ពលករត្រូវទៅចុះបញ្ជីនៅ “ មជ្ឈមណ្ឌលច្រកចេញចូលតែមួយ” នៅតាមបណ្តាខេត្តរបស់ថៃ ដែលខ្លួនកំពុងស្នាក់នៅ និង ធ្វើការ។ នេះ ជាជំហានថ្មីមួយទៀតរបស់ក្រសួងការបរទេសកម្ពុជាក្នុងការជួយសម្រួលដល់ពលករខ្មែរដែលកំពុងស្នាក់នៅ និង ធ្វើការខុសច្បាប់លើទឹកដីថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ចាប់ពីពេលនេះតទៅ ពលករខ្មែរដែលកំពុងស្នាក់នៅ និង ធ្វើការខុសច្បាប់នៅក្នុងប្រទេសថៃ អាចធ្វើបែបបទស្នាក់នៅ និង ធ្វើការស្របច្បាប់នៅទីនោះបានតែម្តង ដោយមិនចាំបាច់ធ្វើដំណើរមកប្រទេសកម្ពុជានោះទេ។
ស្ថានឯកអគ្គរាជទូតកម្ពុជា ប្រចាំនៅក្នុងប្រទេសថៃ កាលពីថ្ងៃព្រហស្បតិ៍ បានចេញសេចក្តីជូនដំណឹងដ៏រីករាយមួយ ដល់ពលករខ្មែរ ក្នុងការបំពេញភាពស្របច្បាប់នៅក្នុងប្រទេសថៃ។ ដើម្បីវិវត្តខ្លួនពីពលករខុសច្បាប់ ទៅស្របច្បាប់នោះ ពលករទាំងអស់ ត្រូវទៅចុះបញ្ជីនៅ មជ្ឈមណ្ឌលច្រកចេញចូលតែមួយ នៅតាមបណ្តាខេត្តរបស់ថៃ ដែលខ្លួនកំពុងស្នាក់នៅ និងធ្វើការ។
ចំពោះពលករដែលមានលិខិតឆ្លងដែនរួចហើយ បន្ទាប់ពីចុះបញ្ជី ត្រូវបន្តដាក់ពាក្យសុំទិដ្ឋាការស្នាក់នៅ និង បណ្ណការងារអចិន្ត្រៃយ៍នៅថៃ។ ដោយឡែក ចំពោះពលករពុំទាន់មានលិខិតឆ្លងដែន ក្រោយពីចុះបញ្ជីរួច ត្រូវសុំលិខិតឆ្លងដែនពីអាជ្ញាធរកម្ពុជា។ បន្ទាប់ពីទទួលបានលិខិតឆ្លងដែនហើយ ត្រូវបន្តដាក់ពាក្យសុំទិដ្ឋាការស្នាក់នៅ និង បណ្ណការងារអចិន្ត្រៃយ៍នៅថៃថែមទៀត ។
លោក កុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី ១១ កក្កដា ឆ្នាំ ២០១៤ ថា ការណែនាំនេះ គឺ ដើម្បីឲ្យពលករខ្មែរដែលកំពុងស្នាក់នៅ និង ធ្វើការមិនស្របច្បាប់នៅក្នុងប្រទេសថៃ អាចបំពេញបែបបទតាមការណែនាំ ដើម្បីឈានទៅរកការស្នាក់នៅ និង ធ្វើការស្របច្បាប់នៅក្នុងប្រទេសថៃ។
អ្នកនាំពាក្យក្រសួងការបរទេសកម្ពុជា បានគូសបញ្ជាក់បន្ថែមថា ចំពោះពលករខុសច្បាប់ដែលមិនទាន់មានលិខិតឆ្លងដែននោះ អាចមកសុំធ្វើលិខិតឆ្លងដែននៅទីតាំងចំនួនបួនដែលក្រសួងមហាផ្ទៃបានរៀបចំរួចជាស្រេច នោះ គឺ នៅ ប៉ោយប៉ែត ប៉ៃលិន ចាំយាម និង អូរស្មាច់។ លោក កុយ គួង សង្កត់ធ្ងន់ ថា ពលករអាចមកធ្វើលិខិតឆ្លងដែននៅទីនេះ ហើយត្រឡប់ទៅធ្វើការនៅថៃវិញ ដោយមិនចាំបាច់មកកាន់រាជធានីភ្នំពេញនោះឡើយ។ បន្ទាប់ពីធ្វើរួច មន្ត្រីក្រសួងមហាផ្ទៃ នឹងបញ្ជូនលិខិតឆ្លងដែនទាំងនោះ ទៅកាន់ពលករវិញ តាមរយៈស្ថានទូតកម្ពុជាប្រចាំនៅប្រទេសថៃ។
សូមបញ្ជាក់ថា នេះ គឺ ជាជំហានថ្មីមួយទៀតរបស់ក្រសួងការបរទេសកម្ពុជា ក្នុងការជួយសម្រួល ដល់ពលករខ្មែរដែលកំពុងស្នាក់នៅ និង ធ្វើការខុសច្បាប់នៅលើទឹកដីថៃ ដែលមិនត្រូវបានអាជ្ញាធរបញ្ជូនមកកម្ពុជាវិញ។ យ៉ាងណាក៏ដោយ កន្លងមកអាជ្ញាធរថៃ បានចាប់បញ្ជូនពលករខ្មែរខុសច្បាប់មកកាន់កម្ពុជាវិញ ជាង ២៥ ម៉ឺន នាក់ ហើយគេមិនបានដឹងច្បាស់ទេថា នៅមានពលករខ្មែរប៉ុន្មាននាក់ទៀតនោះទេ ដែលកំពុងស្នាក់នៅ និង ធ្វើការខុសច្បាប់នៅក្នុងប្រទេសថៃនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ