ពលករខ្មែរ១៤នាក់ត្រូវបានដោះលែង និងបានមកដល់កម្ពុជាវិញហើយ
ទីបំផុតទៅ ប្រទេសថៃបានយល់ព្រមដោះលែងពលករខ្មែរខុសច្បាប់ចំនួន១៤នាក់ឲ្យមានសេរីភាពឡើងវិញហើយនៅពេលនេះ និងបានបញ្ជូនមកដល់កម្ពុជាវិញតាមច្រកព្រំដែនអន្តរជាតិប៉ោយប៉ែត។ នេះបើតាមការបញ្ជាក់ពីក្រសួងការបរទេសកម្ពុជានៅថ្ងៃសុក្រទី៤ កក្កដានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ពលរដ្ឋខ្មែរ ១៤ នាក់ដែលតម្រួតថៃចាប់ដាក់ពន្ធនាគារ បានធ្វើដំណើរមកដល់ទឹកដីកម្ពុជាវិញហើយនៅព្រឹកថ្ងៃសុក្រនេះបន្ទាប់ពីការប្រកាសដោះលែង។ ក្នុងដំណើរវិលត្រឡប់របស់ពលករចំណាកស្រុកទាំងនេះ អគ្គកុងស៊ុលកម្ពុជា និងមន្ត្រីខេត្តបន្ទាយមានជ័យ គឺជាអ្នកទទួលនៅច្រកទ្វារអន្តរជាតិព្រំដែនប៉ោយប៉ែកខាងទឹកដីកម្ពុជា។
លោកគោស៊ុំ សារឿត អភិបាលខេត្តបន្ទាយមានជ័យ បានប្រាប់វិទ្យុបារាំងអន្តរជាតិថា “អាជ្ញាធរក្រុងប៉ោយប៉ែតបានរៀបចំពិធីទទួលនិងសំណេះសំណាលនៅច្រកព្រំដែន និងផ្តល់ថវិកាម្នាក់១លានរៀលផងដែរ សម្រាប់ការធ្វើដំណើរត្រឡប់ទៅកាន់គេហដ្ឋានផងដែរ"។
អ្នកនាំពាក្យក្រសួងការបរទេសកម្ពុជា លោក កុយ គួងបានបញ្ជាក់ថា ដំណឹងនៃការដោះលែងនេះ ភាគីថៃទើបតែបញ្ជាក់ជាផ្លូវការមកកាន់ក្រសួងការបរទេសកម្ពុជានៅព្រឹកថ្ងៃសុក្រនេះតែប៉ុណ្ណោះ។ ការរកឃើញថាពលករខ្មែរជាអ្នករងគ្រោះដោយការបោកបញ្ឆោតរបស់មេខ្យល់ និងសំណើពីភាគីកម្ពុជាយ៉ាងទទូចទៅកាន់រដ្ឋាភិបាលថៃ។ នេះគឺជាមូលហេតុដែលតុលាការខេត្រស្រះកែវរបស់ថៃ ដោះលែងពលករខ្មែរទាំង១៤នាក់។ នេះបើតាមការបញ្ជាក់ពីអ្នកនាំពាក្យក្រសួងការបរទេសកម្ពុជា លោក កុយ គួងដដែល។
ពលករខ្មែរទាំង១៤នាក់នោះ មាន១០នាក់ជាស្ត្រី និង ៤នាក់ទៀតជាបុរស មកពីខេត្តពោធិសាត់ សៀមរាប និងបាត់ដំបង ដែលមានអាយុចាប់ពី១៨ឆ្នាំដល់ ៣២ឆ្នាំ។ សូមរម្លឹកជូនថា ពលករទាំង១៤នាក់នោះ ត្រូវបានអាជ្ញាធរថៃចាប់ខ្លួនកាលពីពាក់កណ្តាលខែមិថុនាកន្លងទៅ ក្រោមបទល្មើសប្រើប្រាស់ឯកសារការងារក្លែងក្លាយ។
យ៉ាងណាក៏ដោយ ការដោះលែងមេដឹកនាំបាតុករថៃអាវលឿង វីរៈ ស៊ុមខ្វាមឃីត ដោយភាគីកម្ពុជា និងការដោះលែងពលករខ្មែរ១៤នាក់ដោយភាគីថៃស្របគ្នានេះ ត្រូវបានគេមើលឃើញថាជារូបភាពនៃការដោះដូរអ្នកទោសគ្នារវាងប្រទេសជិតខាងទាំងពីរ។ ប៉ុន្តែលោកនាយករដ្ឋមន្ត្រីហ៊ុន សែន បានចេញមុខច្រានចោលការរិះគន់ទាំងនេះ។
សូមរម្លឹកជូនថា ក្រោយការដោះលែងមេបាតុករ អាវលឿង ប្រមុខរដ្ឋាភិបាលយោធាថៃ លោក ប្រាយុទ្ធ ចាន់អូចា បានផ្ញើលិខិតមួយច្បាប់ថ្លែងអំណរគុណចំពោះលោកនាយករដ្ឋមន្ត្រីហ៊ុន សែន និងព្រះមហាក្សត្រខ្មែរ បើទោះបីជាថៃបានអនុវត្តគោលនយោបាយបណ្តេញចេញពលករខុសច្បាប់ខ្មែរយ៉ាងគំហុកក៏ដោយ។ នេះបើតាមលិខិតដែលក្រសួងការបរទេសកម្ពុជាបញ្ចេញនៅថ្ងៃសុក្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ