មន្ត្រីគយចាប់សាច់ខូចគុណភាពជាង១តោន ខណៈការកុម៉្មង់ទិញម៉ាស៊ីនត្រួតពិនិត្យគុណភាពសាច់មិនទាន់មកដល់
កាលពីថ្ងៃទី៩មីនា មន្ត្រីកាំកុងត្រូលសហការជាមួយមន្ត្រីគយប្រចាំច្រកទ្វារអន្តរជាតិប៉ោយប៉ែត ចាប់សាច់មាន់និងប្រហិតខូចគុណភាពជាង១តោននាំចូលពីថៃ។ សម្មភាពដែលឈ្មួញនាំចូលសាច់ខូចគុណភាពមកកម្ពុជា ធ្វើឡើងតាមរយៈការបង្កប់ក្នុងរទេះដោយដាក់ទំនិញពីលើដើម្បីបំភ័ន្តភ្នែកសមត្ថកិច្ច។ ពាក់ព័ន្ធបញ្ហានេះកន្លងមករដ្ឋមន្ត្រីក្រសួងកសិកម្មអះអាងថា បានកុម្ម៉ង់ទិញម៉ាស៊ីនត្រួតពិនិត្យគុណភាពសាច់សត្វមកដែរ។ ប៉ុន្តែគិតមកដល់ពេលនេះ មន្ត្រីជំនាញអះអាងថា ម៉ាស៊ីននោះមិនទាន់មកដល់នៅឡើយទេ។
ចុះផ្សាយនៅថ្ងៃ៖
ស្តាប់ - ០២:០០
ដ្បិតតែម៉ាស៊ីនត្រួតពិនិត្យគុណភាពសាច់សត្វដ៏ទំនើប ដែលកុម្ម៉ង់ទិញកាលពីពាក់ឆ្នាំ២០១៦មិនទាន់មកដល់ក៏ពិតមែន តែមន្រ្តីជំនាញមានរបៀបធ្វើការរបស់ខ្លួនផ្សេងទៀតសម្រាប់ត្រួតពិនិត្យសាច់សត្វខូចគុណភាព។ ម៉ាស៊ីនទំនើបនោះមានតួនាទីវិភាគទន្និន័យលម្អិតចំពោះកម្រិតសាច់ដែលត្រូវនាំចូលនិងហាមឃាត់។ បើតាមលោក សេង សុវណ្ណ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ ក្រសួងកសិកម្មគឺ ម៉ាស៊ីនត្រួតពិនិត្យគុណភាពសត្វដ៏ទំនើបនេះនឹងមកដល់នាពេលឆាប់ៗ។
លោក សេង សុវណ្ណ បានគូសបញ្ជាក់ថា សាច់សត្វដែលចាត់ទុកថា ខូចគុណភាពមានពីរប្រភេទៈទី១ សាច់មានគុណភាពតែដឹកជញ្ជូនមិនបានត្រឹមត្រូវ។ ទី២ សាច់ដែលមិនបានឆ្លងកាត់ការត្រួតពិនិត្យអនាម័យឲ្យត្រឹមត្រូវ។ លោកបន្ថែមថា ភាគច្រើនសាច់ខូចគុណភាព ដែលនាំចូលពីថៃជាប្រភេទសាច់ខូចគុណភាពរួចទៅហើយ។ ម្យ៉ាងទៀតសាច់ទាំងនោះគេអាចទិញមកប្រើប្រាស់ដែរសម្រាប់កសិដ្ឋានចិញ្ចឹមក្រពើប៉ុណ្ណោះ។
សូមបញ្ជាក់ថា នៅក្នុងឆ្នាំ២០១៦កន្លងទៅកម្ពុជាបានចំណាយប្រាក់១លានដុល្លារសម្រាប់នាំចូលសាច់សត្វពីក្រៅប្រទេសដូចជា អូស្រ្តាលី អាមេរិក និង អឺរ៉ុបជាដើម។ហើយចំពោះសាច់ខូចគុណភាពដែលនាំចូលពីថៃនិងវៀតណាមវិញក៏មានចំនួនច្រើនដែរក្នុងឆ្នាំ២០១៦កន្លងទៅ។ នេះជាការបន្ថែមរបស់លោក សេង សុវណ្ណ ។
លោក វេង សាខុន រដ្ឋមន្ត្រីក្រសួងកសិកម្មធ្លាប់លើកឡើងថា ដើម្បីពង្រឹងលើការត្រួតពិនិត្យគុណភាពសាច់សត្វនាំចូលពីបរទេស រាជរដ្ឋាភិបាលតាមរយៈក្រសួងកសិកម្ម បានកុម៉្មង់ទិញម៉ាស៊ីនត្រួតពិនិត្យមើលគុណភាពសាច់សត្វ ដែលពិនិត្យទៅលើសាច់ត្រី ត្រីងៀត ប្រហុក ផ្អក ដែលកំពុងតែដាក់លក់នៅទីផ្សារកម្ពុជាលាយឡំជាមួយសារជាតិគីមី។
និយាយដោយឡែក ទាក់ទងការគ្រប់គ្រងសុវត្ថិភាពចំណីអាហារនេះដែរ កន្លងមកក្រសួងពាណិជ្ជកម្មបានដាក់ឲ្យដំណើរការ ឡានពិសោធន៍ចល័តដំបូងគេ ដើម្បីពិនិត្យរកគីមីក្នុងចំណីអាហារជូនប្រជាពលរដ្ឋឥតគិតថ្លៃ។ តួនាទីរបស់ឡានពិសោធនេះ វិភាគរក សំណល់ថ្នាំពុលកសិកម្ម នៅក្នុងបន្លែ និងផ្លែឈើ -សំណល់ថ្នាំបសុពេទ្យ នៅក្នុងសាច់ និងផលិតផលផ្សំពីសាច់ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ