ពុទ្ធបរិស័ទ មកពីទីជិត ទីឆ្ងាយ ធ្វើបុណ្យកាន់បិណ្ឌ វេនទី៣ នៅថ្ងៃព្រហស្បតិ៍ ក្នុងវត្តចង្ក្រានតាព្រហ្ម ហៅវត្តស្ទឹងមានជ័យ ជាធម្មតាតាមប្រពៃណីខ្មែរ។ ដោយឡែក ប្រជាពលរដ្ឋខ្មែរ ដែលមកពីភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ហើយដែលបានស្នាក់នៅក្នុងវត្តអស់រយៈពេល៣យប់៣ថ្ងៃហើយនោះ មិនទាន់បានធ្វើបុណ្យដាក់បិណ្ឌឡើយ។ វត្តមានរបស់អ្នកមានជម្លោះដីធ្លីទាំងនោះ ទំនងជាបង្កវិវាទរវាងព្រះសង្ឃក្នុងវត្ត និងធ្វើឱ្យព្រះសង្ឃអង្គខ្លះ រួមទាំងព្រះចៅអធិការវត្តដែរ ហាក់រវល់នឹងអធិករណ៍នេះខ្លាំងជាងរឿងធ្វើបុណ្យឧទ្ទិសកុសលដល់បុព្វការីជនផង។
