កិច្ចចរចារវាងបក្សទាំងពីរនៅទ្រឹងបន្ទាប់ពីតុលាការឃុំខ្លួនសកម្មជនបក្សប្រឆាំង
គិតមកដល់ថ្ងៃអាទិត្យ ទី ០៣ សីហានេះ ដំណើរការចរចាដើម្បីបញ្ចប់វិបត្តិនយោបាយទាំងស្រុង រវាងគណបក្សទាំងពីរនៅមិនទាន់មានភាពជឿនលឿនទៅមុខទេ។ ហើយកាលពីថ្ងៃសៅរ៍ ម្សិលមិញ តុលាការបានសម្រេចឃុំខ្លួនសកម្មជនគណបក្សសង្គ្រោះជាតិចំនួន ៣ នាក់នៅពន្ធនាគារព្រៃស បន្ទាប់ពីចេញដីកាកោះហៅបេក្ខជនតំណាងរាស្ត្រ និង សកម្មជនម្នាក់ជាលើកទីពីរនោះ ។ មន្ត្រីជាន់ខ្ពស់គណបក្សប្រជាជនកម្ពុជា អះអាងថា ការចាប់ខ្លួននេះ ជារឿងតុលាការ មិនប៉ះពាល់ដល់ការចរចាបញ្ចប់បញ្ហារវាងគណបក្សទាំងពីរនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
ថ្នាក់ដឹកនាំគណបក្សប្រជាជនកម្ពុជា និង គណបក្សសង្គ្រោះជាតិ នៅថ្ងៃអាទិត្យនេះ មិនទាន់បានសម្រេចឯកភាពគ្នាលើចំណុចស្វ័យភាពក្នុងការរៀបចំ និងចាត់ចែងការងាររបស់គណៈកម្មាធិការជាតិរៀបចំការបោះឆ្នោត និង ពាក្យពេចន៍មួយចំនួនទៀត ដែលត្រូវចែងក្នុងជំពូកថ្មីនៅឡើយនោះទេ។
លោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា បានបញ្ជាក់ប្រាប់វិទ្យុបារាំងអន្តរជាតិ នៅព្រឹកថ្ងៃអាទិត្យនេះ ថា ក្រុមការងារបានផ្ញើកំណត់ហេតុស្តីពីចំណុចមិនទាន់ឯកភាពគ្នានេះ ទៅឲ្យថ្នាក់ដឹកនាំគណបក្សរួចហើយ ប៉ុន្តែមិនទាន់មានការសម្រេចបែបណានៅឡើយទេ។
ដោយឡែក មន្ត្រីជាន់ខ្ពស់ព្រមទាំងអ្នកនាំពាក្យគណបក្សសង្គ្រោះជាតិ មិនអាចទាក់ទងសុំការបំភ្លឺជុំវិញរឿងនេះ បាននៅឡើយទេ នៅព្រឹកថ្ងៃអាទិត្យនេះ។ ក៏ប៉ុន្តែ លោក សម រង្ស៊ី ប្រធានគណបក្សសង្គ្រោះជាតិ បានប្រាប់វិទ្យុបារាំងអន្តរជាតិ កាលថ្ងៃសៅរ ថា បញ្ហានេះ មិនទាន់មានអ្វីថ្មីនៅឡើយទេ។
សូមបញ្ជាក់ថា កាលពីថ្ងៃ សុក្រ ក្រុមការងារវិសោធនកម្មរដ្ឋធម្មនុញ្ញរបស់គណបក្សប្រជាជនកម្ពុជា និងគណបក្សសង្គ្រោះជាតិ បានជួបប្រជុំពិភាក្សាគ្នា ហើយក្រុមការងារនៃគណបក្សទាំងពីរបានឯកភាពគ្នារៀបចំវិសោធនកម្ម មាត្រា ៧៦ និង ការបង្កើតជំពូកថ្មីទាក់ទងនឹងអង្គការ រៀបចំការបោះឆ្នោត នៅក្នុងរដ្ឋធម្មនុញ្ញ។ ប៉ុន្តែក្រុមការងារបានខ្វែងគំនិតគ្នាលើការ ផ្តល់ស្វ័យភាពការងារដល់សមាជិកគណៈកម្មាធិការជាតិរៀបចំ ការបោះឆ្នោត និង ពាក្យពេជន៍មួយចំនួនទៀតនៅក្នុងជំពូកថ្មីនេះ ដោយរង់ចាំថ្នាក់ដឹកនាំធ្វើការសម្រេច។
ស្របពេលថ្នាក់ដឹកនាំនៃគណបក្សទាំងពីរមិនទាន់ឯកភាពគ្នាលើបញ្ហាដែលសេសសល់នោះ តុលាការសាលាដំបូងរាជធានីភ្នំពេញកាលពីថ្ងៃសៅរ ទី ០២ សីហា បាន ចាប់ខ្លួនសកម្មជនគណបក្សសង្គ្រោះជាតិចំនួន ៣ នាក់ និងបានឃុំខ្លួនបណ្តោះអាសន្ននៅពន្ធនាគារព្រៃស។ ហើយកាលពីថ្ងៃទី ៣១ កក្កដា តុលាការក៏បានចេញដីកាជាលើកទី ២ កោះហៅបេក្ខជនតំណាងរាស្ត្រ ៨ រូប និង សកម្មជនមួយរូបរបស់គណបក្សសង្គ្រោះជាតិឲ្យបំភ្លឺជាបន្តបន្ទាប់ពីថ្ងៃទី ០៨ ដល់ថ្ងៃ ១៣ សីហាខាងមុខផងដែរ។
គណបក្សសង្គ្រោះជាតិបានថ្កោលទោស ហើយហៅការចាប់ខ្លួន និង ដីការតុលាការថា ជារូបភាពគំរាមកំហែងថ្មីមួយទៀតមករបស់គណបក្សប្រជាជបកម្ពុជា មកលើគណបក្សសង្គ្រោះជាតិ។ គណបក្សសង្គ្រោះជាតិបានអំពាវនាវឲ្យដោះលែងសកម្មជនរបស់ខ្លួនជាបន្ទាន់ និង គ្មានលក្ខខណ្ឌ។ ចំណែក អង្គភាពព័ត៌មាន និង ប្រតិកម្មរហ័ស នៃទីស្តីការគណៈរដ្ឋមន្ត្រីបានចេញសេចក្តីថ្លែងការណ៍ដោយ ទាត់ចោលការថ្កោលទោសនេះ។ ក្នុងសេចក្តីថ្លែងការណ៍នោះ អង្គភាពព័ត៌មាន និង ប្រតិកម្មរហ័ស បានអំពាវនាវដល់គណបក្សសង្គ្រោះជាតិបញ្ឈប់ជាបន្ទាន់នូវការលាបពណ៌មកលើរដ្ឋាភិបាល និង គណបក្សប្រជាជនកម្ពុជា ដោយប្រែក្លាយបទល្មើសព្រហ្មទណ្ឌ មកជារឿងនយោបាយដែលនាំប៉ះពាល់ដល់ឯករាជ្យភាពរបស់តុលាការ។
ទោះបីជាបែបនេះក្តី លោក ជាម យៀប បានគូសបញ្ជាក់ថា ការចាប់ខ្លួននេះមិនប៉ះពាល់ដល់ការចរចារវាងគណបក្សទាំងពីរឡើយ។ មិនប៉ះពាល់ ព្រោះថា វាជារឿងដាច់ដោយឡែកពីគ្នា ហើយការចាប់ខ្លួននោះជារឿងរបស់តុលាការ ដោយគណបក្សប្រជាជនកម្ពុជាមិនជាប់ពាក់ព័ន្ធនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ