ការហែក្បួនទៅតុលាការកំពូលរបស់អ្នកភូមិបឹងកក់ត្រូវបានរារាំង
ក្រុមសហគមន៍ដែលមានទំនាស់ដីធ្លី គឺអ្នកភូមិបឹងកក់ បុរីកីឡា និងថ្មគោលបាននាំគ្នាដើរហែក្បួនទៅកាន់តុលាការកំពូលនៅព្រឹកថ្ងៃចន្ទនេះ ដើម្បីទាមទារឲ្យតុលាការដោះលែងសកម្មជន២១នាក់ដែលសមត្ថកិច្ចចាប់ឃុំខ្លួនតាំងពីដើមខែមករាមក។ ប៉ុន្តែ ការដង្ហែក្បួនរបស់ពួកគេត្រូវបានរារាំងដោយកម្លាំងសមត្ថកិច្ចនៅត្រឹមមុខវាលព្រះមេរុ។ ទីបំផុតក្រុមអ្នកភូមិក៏បានបង្វែរទៅជួបជុំគ្នា នៅមុខវត្តឧណ្ណាលោមវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រុមអ្នកភូមិក្នុងសហគមន៍ដែលមានទំនាស់ដីធ្លីមកពីបឹងកក់ បុរីកីឡា សហគមន៍ថ្មគោល ព្រមទាំងសកម្មជនសិទ្ធិមនុស្សជាច្រើនទៀតដែលមានបំណងហែក្បួនឆ្ពោះទៅកាន់តុលាការកំពូលដែលមានទីតាំងនៅរដ្ឋសភាចាស់នោះមិនអាចសម្រេចបំណងបានទេ។ កម្លាំងសមត្ថកិច្ចរាប់រយនាក់ត្រូវបានដាក់ពង្រាយនិងបានរារាំងការហែក្បួនរបស់អ្នកភូមិទាំងនោះនៅមុខវាលព្រះមេរុក្បែរព្រះបរមរាជវាំង។
ការប៉ះទង្គិចគ្នាបានកើតឡើងនៅពេលដែលសមត្ថកិច្ចបានដកហូតឧបករណ៍បំពងសំឡេង និងសម្ភារៈមួយចំនួនទៀតរបស់ក្រុមសកម្មជនដូចជាស្គរដែលពួកគេប្រើសម្រាប់ទូងជាសំឡេងក្នុងពេលដង្ហែក្បួននោះជាដើម។ ប៉ុន្តែ ការបះទង្គិចនេះមិនបណ្តាលឲ្យមានបញ្ហាធ្ងន់ធ្ងរទេ។ ទីបំផុតទៅ ក្រុមសកម្មជនក៏បានបង្វែមកប្រារព្ធពិធីជួបជុំនៅលើទីលានមុខវត្តឧណ្ណាលោមវិញ។ នៅទីនោះ ក្រុមអ្នកភូមិដែលស្លៀកសម្លៀកបំពាក់ពណ៌សបាននាំគ្នាបួងសួងសុំយុត្តិធម៌និងក៏បានដាក់បណ្តាសារមន្ត្រីដែលប្រព្រឹត្តិអាក្រក់ផងដែរ។
សូមបញ្ជាក់ថា ក្រុមអ្នកភូមិមកពីសហគមន៍ដែលមានទំនាស់ដីធ្លីប្រហែល ១០០ នាក់ បាននាំគ្នាដង្ហែក្បួនចេញពីបឹងកក់ឆ្ពោះទៅតុលាការកំពូល។ គោលបំណងរបស់ពួកគេគឺទាមទារឲ្យតុលាការដោះលែងអ្នកជាប់ចោទ២១នាក់ដែលសមត្ថកិច្ចចាប់ខ្លួនកាលពីដើមខែមករា ហើយដែលបច្ចុប្បន្នកំពុងត្រូវបានឃុំខ្លួននៅឯពន្ធនាគារត្រពាំងផ្លុងក្នុងខេត្តកំពង់ចាម។
សកម្មជនទាំងនោះដែលមានទាំងលោក វន់ ពៅ សកម្មជនការពារសិទ្ធិកម្មករដ៏សកម្មម្នាក់ផងត្រូវបានចាប់ខ្លួនក្នុងព្រឹត្តិការណ៍បង្ក្រាបបាតុកម្មទាមទារប្រាក់ខែ ១៦០ ដុល្លារបស់កម្មករកាលពីថ្ងៃទី២និងទី៣មករា នៅឯតំបន់សេដ្ឋកិច្ចពិសេសក្រុងភ្នំពេញ និងនៅសួនឧស្សាហកម្មកាណាឌីយ៉ាតាមបណ្តោយផ្លូវវ៉េងស្រេង។
ការតវ៉ាឲ្យតុលាការដោះលែងអ្នកជាប់ចោទទាំងបោះបានធ្វើឡើងជាបន្តបន្ទាប់ពីសំណាក់សកម្មជនសង្គមស៊ីវិល និងសកម្មជនដីធ្លីចេញពីសហគមន៍បឹងកក់ បូរីកីឡា និងថ្មគោល ក៏ដូចជាសកម្មជនសហជីពផងដែរ។ ប៉ុន្ត រាល់ការតវ៉ាដែលមានពិធីជួបជុំនិងហែក្បួនត្រូវបានរារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ