ថៃនឹងផ្តល់ទិដ្ឋាការស្របច្បាប់ដល់ពលករខ្មែរជាង៨ពាន់នាក់
ក្រសួងការបរទេសថៃនឹងបញ្ជាឱ្យស្ថានទូតថៃប្រចាំនៅកម្ពុជា ផ្តល់ទិដ្ឋាការការងារដល់ពលករខ្មែរចំនួន ជាង៨ពាននាក់ដែលភាគីកម្ពុជាបានស្នើដើម្បីចេញទៅបម្រើការងារស្របច្បាប់នៅទឹកដីថៃ។ ប៉ុន្តែយ៉ាងណាក៏ដោយ ភាគីកម្ពុជានៅមិនទាន់ដឹងថាមានទិដ្ឋាការប៉ុន្មានហើយដែលភាគីថៃបានផ្តល់នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ពលករខ្មែរប្រមាណជាង៨ពាន់ ៣រយនាក់ នឹងទទួលបានទិដ្ឋាការការងារស្របច្បាប់ចូលក្នុងទឹកដីថៃ។ នេះបើតាមការបញ្ជាក់ពីក្រសួងការបរទេសកម្ពុជានៅថ្ងៃសុក្រទី២០ មិថុនា។
លោក គុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ថា ក្រសួងការបរទេសថៃ នឹងបញ្ជាឱ្យស្ថានទូតថៃប្រចាំភ្នំពេញ ផ្តល់ទិដ្ឋាការការងារដល់ពលករខ្មែរឱ្យបានឆាប់។ ការបញ្ជាក់យ៉ាងដូច្នេះគឺក្រោយជំនួបរវាងអគ្គរាជទូតកម្ពុជាលោកស្រី អ៊ាត សោភា និងក្រសួងការបរទេសថៃ កាលពីថ្ងៃព្រហស្បតិ៍ម្សិលមិញ និងតាមរយៈអន្តរាគមន៍កំណត់ទូតពីរផ្សេងគ្នារបស់កម្ពុជាកាលពីថ្ងៃទី៦ និងទី១៦ មិថុនាកន្លងទៅ។
សូមបញ្ជាក់ថា ក្នុងជំនួបរវាងអគ្គស្ថានទូតកម្ពុជា និងភាគីក្រសួងការបរទេសថៃនោះ ភាគីកម្ពុជាបានស្នើដល់ភាគីថៃធ្វើយ៉ាងណាឱ្យពលករខ្មែរមិនស្របច្បាប់ដែលនៅសល់ក្នុងទឹកដីថៃ ក្លាយទៅជាពលករស្របច្បាប់។ នេះបើតាមការបញ្ជាក់ពីអ្នកនាំពាក្យលោក គុយ គួងដដែល។ យ៉ាងណាក៏ដោយ ចំពោះចំនុចនេះ លោក កុយ គួងបានបញ្ជាក់ថា ភាគីថៃបានសន្យាយកបញ្ហានេះទៅពិភាក្សាជាមួយអនុគណៈកម្មការ ថៃទទួលបន្ទុកបញ្ហាពលករបរទេស។
សូមរលឹកឱ្យដឹងបន្ថែមថា ពលករខ្មែរចំនួ៣៨នាក់កាលពីថ្ងៃទី១៥មិថុនាកន្លងទៅ ត្រូវបានអាជ្ញាធរចាប់ឃុំខ្លួនពីបទប្រើប្រាស់ត្រាក្លែងក្លាយ។ ជាការឆ្លើយតបស្ថានទូតកម្ពុជាប្រចាំទីក្រុងបាងកក បានស្វែងរកមេធាវីការពារក្តីតតាំងជាមួយតុលាការថៃរួចរាល់ហើយ។ នេះបើតាមការបញ្ជាក់ពីលោកគុយ គួងដដែល។
សូមរំលឹកជូនថា តាំងពីដើមខែមិថុនានេះមក ពលករកម្ពុជាខុសច្បាប់ជាង២២ម៉ឺននាក់ហើយ ត្រូវបានបញ្ជូនត្រឡប់មកទឹកដីកម្ពុជា។ ទាក់ទងនឹកការបញ្ជូនពលករខុសច្បាប់កម្ពុជាយ៉ាងគំហុកដូចនេះភាគីកម្ពុជាតាមរយៈអគ្គរាជទូតបានស្នើឱ្យអាជ្ញាធរថៃផ្តល់ព័ត៌មានឱ្យបានច្បាស់ អំពីពេលវេលា និងច្រកព្រំដែន នៃការបញ្ជូនពលករខ្មែរខុសច្បាប់ ក្នុងន័យដើម្បីជៀសវាងការបញ្ជូនដែលមានលក្ខណៈច្របូកច្របល់ និងគ្មានសណ្តាប់ធ្នាប់។
ប៉ុន្តែយ៉ាងណាក៏ដោយរហូតមកដល់ពេលនេះនៅមិនទាន់ដឹងថាតើមានពលករកម្ពុជាប៉ុន្មាននាក់ហើយដែលទទួលបានទិដ្ឋការការងារស្របច្បាប់ពីភាគីថៃនោះទេ។ នេះបើតាមការបញ្ជាក់ពីក្រសួងការបរទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ