ជំនួយដល់ពលករនៅច្រកទ្វារប៉ោយប៉ែតក្លាយជាជម្លោះ
ទាំងអាជ្ញាធររដ្ឋាភិបាល ទាំងសង្គមស៊ីវិល និងបក្សប្រឆាំងនៅតែបន្តជួយអន្តរាគមន៍ជាបន្តបន្ទាប់ដល់ពលករឆ្លងដែនខុសច្បាប់ដែលអាជ្ញាធរថៃចាប់បញ្ជូនមកវិញ។ ប៉ុន្តែ ការប៉ះទង្គិចគ្នាខ្លះៗបានកើតឡើងរវាងអាជ្ញាធរនិងក្រុមយុវជនខ្មែរក្រោមក៏ដូចជារវាងអាជ្ញាធរនិងតំណាងបក្សប្រឆាំងនៅពេលចែកអំណោយដល់ពលករ។ អង្គការសង្គមស៊ីវិលដែលតាមដានរឿងនេះបានអំពាវនាវឲ្យមានការបើកទូលាយក្នុងការចូលរួមជួយពលករខ្មែរ។
ចុះផ្សាយនៅថ្ងៃ៖
ស្តាប់ - ០១:៥៨
គិតមកទល់នឹងថ្ងៃនេះ តួលេខពលករឆ្លងដែនខុសច្បាប់ដែលអាជ្ញាធរថៃចាប់បញ្ជូនត្រឡប់មកវិញបានកើនដល់ជាង២សែននាក់ហើយ។ នេះបើយោងតាមតួលេខដែលផ្តល់ដោយអាជ្ញាធររដ្ឋាភិបាល។ ការបញ្ជូនពលករខ្មែរមកវិញក៏នៅតែមិនទាន់ចប់នៅឡើយដែរ។ ស្របពេលដែលទាំងអាជ្ញាធរ ទាំងសង្គមស៊ីវិល ទាំងបក្សប្រឆាំងនិងសម្បុរសជននានាកំពុងសម្រុកចែកអំណោយដល់ពលករ ការប៉ះទង្គិចគ្នាខ្លះបានកើតឡើង។
ជាក់ស្តែង ក្រុមតំណាងរាស្ត្រគណបក្សសង្គ្រោះជាតិដឹកនាំដោយលោក កឹម សុខា ដែលបានទៅដល់ទីក្រុងប៉ោយប៉ែតនៅថ្ងៃព្រហស្បតិ៍នេះបានប៉ះគ្នាជាមួយសមត្ថកិច្ចនិងអ្នកគាំទ្រគណបក្សប្រជាជនកម្ពុជា។ ប្រតិភូរបស់គណបក្សប្រឆាំងត្រូវបានរារាំងដោយអ្នកគាំទ្របក្សកាន់អំណាចក្រោមហេតុផលថា គណបក្សប្រឆាំងនឹងទៅបង្កភាពអនាធិបតេយ្យនៅទីនោះ។ ក្រុមអ្នកគាំទ្រគណបក្សប្រជាជនបានស្រែកថាពួកគេមិនត្រូវការគណបក្សសង្គ្រោះជាតិទេ។
ភ្លាមៗនោះ គណបក្សសង្គ្រោះជាតិក៏បានចេញសេចក្តីថ្លែងការណ៍មួយដោយថ្កោលទោសចំពោះការរារាំងនេះហើយបានទាមទារឲ្យគណបក្សកាន់អំណាចបញ្ឈប់ការរើសអើងបែបនេះតទៅទៀត។ គណបក្សសង្គ្រោះជាតិក៏បានទាមទារឲ្យអាជ្ញាធរថៃគោរពសិទ្ធិនិងគោរពគោលការណ៍មនុស្សធម៌ចំពោះពលករខ្មែរផងដែរ។
លោក ស៊ុម ចាន់គារ មន្ត្រីអង្គការអាដហុកប្រចាំខេត្តបន្ទាយមានជ័យបានប្រាប់វិទ្យុបារាំងថា តាំងពីមុនការទៅដល់របស់មន្ត្រីបក្សប្រឆាំង មានក្រុមមនុស្សដើរស្រែកប្រាប់ពលករតាមមីក្រូថាកុំឲ្យជឿតាមការឃោសនារបស់បណបក្សនយោបាយ។ លោកសង្ស័យថានេះជាការរៀបចំរបស់អាជ្ញាធរ។ កាលពីយប់ថ្ងៃពុធក៏មានការប៉ះទង្គិចពាក្យសម្តីគ្នាយ៉ាងតឹងតែងដែររវាងអាជ្ញាធរក្រុងប៉ោយប៉ែតជាមួយយុវជនមួយក្រុមដែលមានពាក់អាវយឺតសញ្ញាទង់ជាតិខ្មែរកម្ពុជាក្រោមហើយដែលបានទៅចែកអំណោយដល់ពលករនៅទីនោះ។
មន្ត្រីអង្គការសិទ្ធិមនុស្សលោក ស៊ុម ចាន់គារ បានអំពាវនាវថា ការចែកអំណោយដល់ពលករគួរតែមានការចូលរួមទូលំទូលាយពីគ្រប់មជ្ឈដ្ឋានដោយគ្មានការរើសអើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ