កម្ពុជានិងថៃឯកភាពអនុវត្តនិងបន្តរក្សាភាពស្ងប់ស្ងៀមទោះជាសាលក្រមតុលាការឡាអេបែបណាក៏ដោយ
ក្នុងពេលវិលត្រឡប់មកពីតុលាការយុត្តិធម៌អន្តរជាតិនៅទីក្រុងឡាអេ នាព្រឹកថ្ងៃចន្ទនេះ ប្រមុខការទូតកម្ពុជា លោក ហោ ណាំហុង បានបញ្ជាក់ទៅកាន់ក្រុមអ្នកកាសែតថា លោកនាយករដ្ឋមន្ត្រី ហ៊ុន សែននិងរូបលោក បានជួបរួចហើយជាមួយនឹងនាយករដ្ឋមន្ត្រីនិងរដ្ឋមន្ត្រីការបរទេសថៃ ដោយបានឯកភាពគ្នាថា ទោះជាការសម្រេចរបស់តុលាការទីក្រុងឡាអេ យ៉ាងណាក្តី យើងត្រូវរក្សាភាពស្ងប់ស្ងៀម អនុវត្តដោយស្ងាត់ស្ងៀម ដោយស្រុះស្រួលគ្នា តាមការសម្រេចរបស់តុលាការនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ក្នុងដំណើរវិលត្រឡប់មកពីតតាំងក្តីនៅទីក្រុងឡាអេ ជាមួយភាគីថៃ ជុំវិញសំណុំរឿងប្រាសាទព្រះវិហារ នាព្រឹកថ្ងៃចន្ទនេះ លោក ហោ ណាំហុង រដ្ឋមន្ត្រីការបរទេសកម្ពុជា បានប្រាប់ក្រុមអ្នកកាសែតថា ប្រមុខដឹកនាំកម្ពុជា និងថៃ បានឯកភាពគ្នារួចហើយថា រដ្ឋាភិបាលប្រទេសទាំងពីរនឹងអនុវត្ត រក្សាភាពស្ងប់ស្ងៀមនិងស្រុះស្រួលគ្នា តាមការសម្រេចរបស់តុលាការឡាអេ។
លោកប្រមុខការទូតកម្ពុជា ក៏បានរម្លឹកពីសវនាការនៅតុលាការឡាអេចាប់ពីថ្ងៃទី១៥ ដល់ថ្ងៃទី១៩មេសាដែលលោក រួមទាំងមេធាវីបរទេសរបស់កម្ពុជាបានពន្យល់ពីផ្លូវច្បាប់លើកឡើងទាំងអង្គហេតុ និងទាំងអង្គច្បាប់ ដើម្បីស្នើសុំឲ្យតុលាការ បកស្រាយសាលក្រមឆ្នាំ១៩៦២។ ពោលគឺបកស្រាយនូវអត្ថន័យនិងវិសាលភាពនៃសាលក្រម ដែលកម្ពុជា ឈ្នះក្តីលើភាគីថៃ ក្នុងសំណុំរឿងប្រាសាទព្រះវិហារ។
លោក ហោ ណាំហុង ក៏បានលើកឡើងថា ទំនាស់នៅព្រំដែនប្រាសាទព្រះវិហារ ចាប់ផ្តើមតាំងពីឆ្នាំ១៩៦២ ក្រោយពីតុលាការសម្រេចក្តី គឺភាគីថៃ បានធ្វើរបងលួសបន្លា នៅមុខប្រាសាទព្រះវិហារ។ កាលណោះកម្ពុជា ក៏បានតវ៉ា ហើយទំនាស់បានអូសបន្លាយ រហូតដល់ឆ្នាំ២០០៨ ថៃបានចេញឯកសារ ទាមទារដីទំហំ ៤,៦ គីឡូម៉ែត្រក្រឡា ហើយនៅឆ្នាំ២០០៨ ថៃបានទាម ទារ ដីនោះ តាមរយៈយោធាទ្រង់ទ្រាយធំ។ នៅឆ្នាំ២០០៩និងឆ្នាំ២០១១ ថៃបានដាក់ទ័ពនៅតំបន់ភ្នំទ្រព្យ។
សាលក្រមឆ្នាំ១៩៦២ តុលាការឡាអេ បានតម្រូវឲ្យថៃដកកងទ័ពចេញពីប្រាសាទព្រះវិហារនិងតំបន់ជុំវិញប្រាសាទ យោងតាមផែនទីឧបសម្ព័ន្ធ១។ ផែនទី ដែលបានកំណត់ព្រំដែនប្រទេសកម្ពុជានិងថៃ ហើយតុលាការបានបញ្ជាក់ច្បាស់ថា ភាគីថៃ បានទទួលស្គាល់ផែនទីឧបសម្ព័ន្ធ១ ដែលផលិតដោយគណៈកម្មការព្រំដែនចម្រុះបារាំងសៀមនៅឆ្នាំ១៩០៦និងឆ្នាំ១៩០៧។
ជាមួយនឹងការលើកឡើងដូច្នេះ លោកប្រមុខការទូតកម្ពុជា បានគូសបញ្ជាក់ថា ក្នុងសវនាការ ភាគីថៃ នៅតែក្រឡិចក្រឡុច ដែលជាធាតុពិតរបស់ថៃ។ ថៃ បានលើកយកផែនទីដដែលៗ គឺផែនទីកំណត់ដែនទឹក មកនិយាយ ហើយផែនទីនោះ ត្រូវតុលាការឡាអេ ទាត់ចោល តាំងពីឆ្នាំ១៩៦២។ ថៃក៏បានមួលបង្កាច់កម្ពុជា ដោយថា ក្នុងទស្សវត្សរ៍ឆ្នាំ១៩៦០ កម្ពុជាមិនបានតវ៉ាអ្វីទេ នៅពេលថៃធ្វើរបងលួសបន្លា នៅមុខប្រាសាទព្រះវិហារ។ ប៉ុន្តែតាមពិត រដ្ឋាភិបាលកម្ពុជាកាលណោះ ក៏បានតវ៉ា ហើយទំនាស់បានបន្តរហូតដល់សព្វថ្ងៃ។
ជុំវិញការតតាំងក្តីលើសំណុំរឿងប្រាសាទព្រះវិហារ នៅតុលាការឡាអេ នៅព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានអំពាវនាវឲ្យប្រជាជនកម្ពុជា ជឿជាក់មកលើរដ្ឋាភិបាលកម្ពុជា។ រដ្ឋាភិបាល ដែលបានប្រកាន់ជំហរ នៅតែជាមិត្តនឹងប្រទេសថៃ ទោះជាសាលក្រមរបស់តុលាការឡាអេ បកស្រាយយ៉ាងណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ