មន្ត្រីសិទ្ធិមនុស្ស៖ មេសហជីពទាំង៦កំពុងស្នាក់នៅកន្លែងសុវត្ថិភាព
ក្រោយពីការបង្ក្រាបរបស់សមត្ថកិច្ចទៅលើបាតុករ និងការបោសសម្អាតបាតុកររបស់គណបក្សសង្គ្រោះជាតិ មេដឹកនាំសហជីពនានាដែលបានចូលរួមតវ៉ាជាមួយគណបក្សសង្គ្រោះជាតិទាមទារដំឡើងប្រាក់ខែកម្មករនោះ បានបាត់ដំណឹងសូន្យ។ អ្នកសារព័ត៌មានមិនអាចទាក់ទងពួកគេបានឡើយ ប៉ុន្តែមន្ត្រីសិទ្ធិមនុស្សអះអាងថា ពួកគេកំពុងលាក់ខ្លួននៅក្នុងកន្លែងសុវត្ថិភាព ខណៈសាលាដំបូងបានចេញដីកាកោះហៅសាកសួរលោកសម រង្ស៊ី លោកកឹម សុខា និងលោករ៉ុង ឈុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
មេសហជីពកម្មករមួយចំនួនដែលបានចូលរួមធ្វើបាតុកម្មទាមទារប្រាក់ឈ្នួលកម្មករ១៦០ដុល្លារ កំពុងលាក់ខ្លួននៅកន្លែងសុវត្ថិភាព។ នេះបើតាមការអះអាងរបស់លោក អំ សំអាតប្រធានផ្នែកបច្ចេកទេសស៊ើបអង្កេតរបស់អង្គការសិទ្ធិមនុស្ស លីកាដូ។ មន្ត្រីសិទ្ធិមនុស្សរូបនេះបានប្រាប់វិទ្យុបារាំងអន្តរជាតិថា លោកបានទាក់ទងតាមទូរស័ព្ទនៅថ្ងៃអាទិត្យទី៥មករា ជាមួយលោក រ៉ុង ឈុន លោកអាត់ ធន់ លោកប៉ាវ ស៊ីណា លោកស្រីម៉ម ញឹម លោកស្រី យ៉ាង សុភ័ណ្ឌ និងលោកជា មុនី។ បើតាមការបញ្ជាក់លោកអំ សំអាត មេដឹកនាំសហជីពទាំងនេះត្រូវរកកន្លែងលាក់ខ្លួនបណ្តោះអាសន្ន បន្ទាប់ពីពួកគេបានលឺពាក្យចចាមអារ៉ាមអំពីការតាមចាប់ខ្លួនពួកគេ ពីសំណាក់សមត្ថកិច្ច។
ពាក្យចចាមអារ៉ាមនោះ ក៏ទំនងជាមិនខុសឡើយ ពីព្រោះនៅពេលនេះ បើតាមលោកអំ សំអាត សាលាដំបូងរាជធានីភ្នំពេញបានចេញដីកាកោះហៅលោករ៉ុង ឈុនហើយ ដើម្បីអោយប្រធានសមាគមគ្រូបង្រៀនកម្ពុជាឯករាជ្យរូបនេះ ឆ្លើយបំភ្លឺក្នុងសំណុំរឿង ញុះញង់ឱ្យប្រព្រឹត្តិបទឧក្រិដ្ឋ។ យោងតាមដីកាកោះនោះ លោករ៉ុង ឈុនត្រូវបង្ហាញខ្លួននៅម៉ោង៨ព្រឹក ថ្ងៃទី១៤មករានៅសាលាដំបូងរាជធានី។
និយាយអំពីដីកាតុលាការនេះ លោកនី ចរិយា ប្រធានផ្នែកស៊ើបអង្កេតរបស់សមាគមការពារសិទ្ធិមនុស្សអាដហុកយល់ឃើញថា ដីការបស់សាលាដំបូង គ្រាន់តែជានីតិវិធីនៃការសាកសួរ។ តែដីកានេះ វាអាចជាផ្នែកមួយក្នុងន័យគំរាមកំហែងពាក់ព័ន្ធនឹងរឿងនយោបាយ និងជាការរាំងស្ទះមិនអោយលោក រ៉ុង ឈុនបានចូលរួមជាមួយនឹងគណបក្សប្រឆាំងដើម្បីដឹកនាំធ្វើមហាបាតុកម្មអហិង្សាបន្តទៀត។ គួររម្លឹកថា កាលពីថ្ងៃទី១មករា លោករ៉ុង ឈុនបានអំពាវនាវអោយមន្ត្រីរាជការ គ្រូបង្រៀន និងសិស្ស និស្សិតអោយចូលរួមធ្វើមហាកូដកម្មទូទាំងប្រទេសមួយ នៅថ្ងៃទី៦ មករា ខាងមុខ ដើម្បីទាមទារដំឡើងប្រាក់បៀវត្សគោលមួយលានរៀល ថ្លៃសេវាសុខភាព និងប្រាក់ឧបត្ថម្ភសម្រាប់គ្រូបង្រៀន និងមន្ត្រីរាជការ។
លោក អំ សំអាត ក៏បានចែករំលែកការយល់ឃើញរបស់លោកដែរ។ មន្ត្រីសិទ្ធិមនុសុ្សលីកាដូអត្ថាធិប្បាយថា អ្នកនយោបាយកម្ពុជាតែងយកតុលាការធ្វើជាឧបករណ៍ ហើយតុលាការមិនទាន់អាចបង្ហាញទំនុកចិត្តជាសាធារណនៅឡើយទេ។
ទាក់ទងនឹងការកោះហៅលោករ៉ុង ឈុននេះ គេនៅមិនទាន់មានព័ត៌មានអំពីបង្ហាញខ្លួនរបស់លោកនៅតុលាការតាមការកោះហៅនោះ ឬអត់យ៉ាងណានោះទេ ខណៈដែលគេមិនអាចទាក់ទងប្រធានសមាគមគ្រូបង្រៀនរូបនេះបាននៅឡើយ។ គេក៏នៅរង់ចាំមើលជោគវាសនារបស់ប្រធានសហជីពកម្មករទាំង៥រូបផ្សេងទៀតដែរ ថាតើពួកគេនឹងមានដីកាពី តុលាការដូចគ្នាដែរឬអត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ