កម្ពុជាបង្កើតក្រុមការងារពិសេសដោះស្រាយការប៉ះទង្គិចនៅព្រំដែនខេត្តស្វាយរៀង
ក្រសួងការបរទេសកម្ពុជានឹងបង្កើតក្រុមការងារពិសេសមួយ ដើម្បីដោះស្រាយបញ្ហានៃការប៉ះទង្គិចគ្នារវាងពលរដ្ឋខ្មែរនិងវៀតណាម ដែលបានកើតឡើងកាលពីថ្ងៃទី២៨មិថុនានៅព្រំដែនខេត្តស្វាយរៀង។ ការបង្កើតក្រុមការងារចម្រុះនេះ គឺធ្វើឡើង ទៅតាមសំណើររបស់ភាគីវៀតណាម តាមរយៈកំណត់ទូតចុះថ្ងៃទី ៣០ មិថុនា។
ចុះផ្សាយនៅថ្ងៃ៖
ស្តាប់ - ០២:០៧
ក្រុមការងារចម្រុះនេះ ត្រូវបានបង្កើតឡើងជាពិសេស ដែលមានភារកិច្ច ពិនិត្យនិងបំភ្លឺ តែទៅលើឧប្បត្តិហេតុដែលបានកើតឡើងនៅបង្គោលព្រំដែនលេខ ២០៣ កាលពីថ្ងៃទី២៨មិថុនាឆ្នាំ២០១៥ប៉ុណ្ណោះ។ នេះបើយោងតាមសេចក្តីជូនដំណឹងរបស់ក្រសួងការបរទេសកម្ពុជា ដែលបានផ្ញើទៅកាន់ភាគីវៀតណាមកាលពីថ្ងៃទី២កក្កដា។ ក្រុមការងារពិសេសនេះ ដឹកនាំដោយក្រសួងការបរទេសកម្ពុជាដោយមានការចូលរួមពីអាជ្ញាធរដែនដី និងក្រុមការងារមួយចំនួនទៀត។ ប៉ុន្តែក្រសួងនៅទាន់បញ្ចេញពីសមាសភាពពិតប្រាកដនៅឡើយទេ។ លោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានបញ្ជាក់ថា ក្រុមការងារពិសេសនេះ កំពុងស្ថិតក្រោមការរៀបចំនៅឡើយ។
គួររំលឹកជូនថា កាលពីថ្ងៃទី២៨ ខែមិថុនាកន្លងទៅ ការប៉ះទង្គិចគ្នាមួយប្រាវបានកើតឡើង រវាងប្រជាពលរដ្ឋកម្ពុជា និងពលរដ្ឋវៀតណាម ត្រង់ចំណុចភូមិគោកធ្លក ឃុំត្នោត ស្រុកកំពង់រោទិ៍ ខេត្តស្វាយរៀង។ ការប៉ះទង្គិចគ្នា បានកើតឡើងក្នុងពេលដែលក្រុមប្រជាពលរដ្ឋខ្មែរដឹកនាំដោយក្រុមអ្នកតំណាងរាស្រ្តគណបក្សសង្រ្គោះជាតិ និងព្រះសង្ឃផង បានចុះទៅពិនិត្យបង្គោលព្រំដែនលេខ២០៣ ដែលមានការស្ថាបនាផ្លូវមួយខ្សែ ហើយដែលប្រជាពលរដ្ឋនៅទីនោះអះអាងថា បានរំលោភចូលដីកម្ពុជា។ ប៉ុន្តែដំណើរចុះទៅនេះ ត្រូវបានរារាំងដោយកងកម្លាំងទាហាន និង ពលរដ្ឋវៀតណាមដែលប្រដាប់ដោយដំបងនិងកាំភ្លើង។ ក្នុងហេតុការណ៍នោះ ភាគីកម្ពុជា១០នាក់ក្នុងនោះរួមមានអ្នកតំណាងរាស្រ្តម្នាក់ផងបានរងរបួស ចំណែកឯភាគីវៀតណាមបានរងរបួស៨នាក់។
បើតាមការជូនដំណឹងរបស់ក្រសួងការបរទេសកម្ពុជា ចុះថ្ងៃទី២កក្កដា ក្រសួងនឹងជូនព័ត៌មានទៅភាគីវៀតណាមអំពីសមាសភាពនៃក្រុងការងារចម្រុះនេះក្នុងពេលខាងមុខ។ ចំណែកឯកាលបរិច្ឆេត និងទីកន្លែងនៃកិច្ចប្រជុំក្រុមការងារចម្រុះនេះ នឹងជូនព័ត៌មានតាមក្រោយ។
សូមបញ្ជាក់ថា ក្រៅពីការបង្កើតក្រុមការងារពិសេសដើម្បីដោះស្រាយឧប្បត្តិហេតុនៅបង្គោលព្រំដែនលេខ២០៣នៅខេត្តស្វាយរៀងនេះ ភាគីកម្ពុជា-វៀតណាមក៏គ្រោងនឹងជួបប្រជុំគ្នានៅថ្ងៃទី៦កក្កដាខាងមុខនេះនៅឯខេត្តសៀមរាប។ កិច្ចប្រជុំដែលធ្វើឡើងរវាងក្រុមការងារគណៈកម្មាធិការចម្រុះព្រំដែនកម្ពុជា-វៀតណាម គឺដើម្បីដោះស្រាយបញ្ហាព្រំដែនដែលនៅសេសសល់ និងបាតុភាពទាំងឡាយដែលកំពុងកើតឡើងនៅតាមបណ្តោយព្រំដែនកម្ពុជា-វៀតណាម នៅក្នុងរយៈពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ